各位親愛o既朋友, 我番o左o黎喇~ 前幾晚搭o左四個幾鐘頭機, 仲要delay o左差唔多成粒鐘, 差唔多零晨一點先番到屋企, 所以真係好疲累呀!!! 大家係咪好掛住我呢???
我玩得好開心, 咁當然有dd唔盡美啦~ 講o左d衰o野先, 我地都好唔妥o個導遊囉, 佢個態度好差, 好唔負責任咁, 全個團得12個人, 見我地兩個女仔都唔多d照顧下, 幾唔gentleman!!! 又唔帶我地去d extra o既地方, 又好早帶我地番酒店, 時間又分配得唔好, 真搵笨!!! 仲有呀, 佢一得閒就同我地講佢賭波o既祕技, d人點樣點樣打假波, 真係好唔想聽!!!
仲有, 團中有個口水佬, 係咁吹水, 係咁講自己o既旅遊經歷, o係半島食set lunch成三, 四百蚊算係好平喎, 我地個個呆晒囉, 食lunch成幾百蚊都話平, 多謝晒喇!!! 食刺身時, 佢唔食赤貝, 諗住益下隔離枱, 都要加多句: “我唔食赤貝o架, 粗o野o黎o既!” 我地又呆晒囉~ 最乞人憎o既係佢地兩公婆成日玩特別囉, Hello Kitty Land又唔去, 富士急又唔去, 咁唔鍾意依d行程就唔好跟依個團啦!!! 咁有錢, 咁勁就自己去啦, 駛乜跟團咁難為呀??? 奇奇怪怪o既團友仲有一家人, o個兩個後生仔, 一男一女, 好似係姐弟, 但係個feel勁似情侶, 感情好得好緊要o個隻! 依兩個後生仔一時好熱情, 一時好cool, 我地好少同佢地接觸, 去旅行, 通常同d年青人o岩玩d, 同依兩個唔o岩key都真係第一次, 太奇怪, 佢地依家人似係o個d低調富翁去環遊世界o個d feel囉~
講番d正常人先, 有個鬼佬同埋個鬼妹性格o既中國藉女友, 幾特別, 第一次同外國人一齊去旅行, 仲可以練下英文tim, 而且個鬼佬好搞笑o架, 好風趣, 成日都用廣東話講 “冇問題”, 而佢女友叫afina (唔肯定個串法), 好索o架, 幾型tim, 人地著泳衣, 佢著三點式o架, 因為佢真係幾正, 我地都有 “目及”下佢~
有兩個人同我地玩得最friend同最癲o既, 依pair又係情侶, o岩o岩o係poly nursing畢業, 我地最o岩key, 我地成日一齊遲到, 一齊行街, 夜晚一齊宵夜, 一齊影相, 一齊浸溫泉, 一齊為Kitty著迷, 一齊吹幾個鐘水, 一齊講笑, 相處得好開心, 依d先係年青人嘛! 只係得依兩個同我地交換o左電話number咋, 因為我覺得同佢地都可以keep到份友誼~
講番個行程, 大家應該覺得好奇怪, 因為我要講Disney, 而唔係Hello Kitty Land, 我最鍾意去Disney的一天, 我那天真的真的好好好好開心~ 好開心~ 我地玩o左好多個game, d game看似好簡單, 唔刺激, 但係你每一天玩都一定好開心. 簡簡單單的 “巴斯光年星際歷險”, 坐架類似過山車物體o既車, 以為好似小朋友咁好輕鬆, 但係裡面好大好靚, 架車幾快, 真係好似漫遊太空咁, 玩完之後真心覺得個design好正, 唔普通, 一定要玩!!! 有好多款game都好正, 次次玩完出o黎都好滿足, 感受到Disney的誠意和創意, 我覺得絕對抵玩. 我地上天下海都玩過晒, 點下海??? 玩划艇呀, 以為要端午節先可以玩o既, 以為要識划龍舟先可以試o既居然俾我地玩到, 個feel好得意o架!!! 總之裡面所有設計都好靚, 務求令你目不暇給, 而我又真係睇得好開心, 好快樂!
Mickey竟然同我擁抱(我仲feel到佢係男人o黎tim, 哈哈哈), 佢仲吻我的臉呀! 見到高飛狗, 佢係咁跑, d遊人追住佢想同佢影相, 我都有追埋一份, 點知佢竟然拖住我一齊跑, 我feel到自己有少少面紅, 因為我都未試過同一個人o係湖邊拖手跑步o架!!! 依d經歷如果平時同人地講, 人地就會話我 “發夢!!!”, “痴線!!!”, Mickey攬我喎??? 高飛狗拖住我跑喎??? 無端端咁講都幾無稽, but依個真係事實!!! 哈哈哈, 大家唔恨得咁多~!~
另外一樣令我興奮o既係巡遊, 真係大開眼界, 超乎我想像中的好睇, 好熱鬧, 我一路睇一路笑, 我真係跟住d工作人員o既指示做動作配合, 好好玩!!! 我企得近, 俾我發現做Peter Pan的那個西人超級超級靚仔, 咁多日以來最靚仔o既一個, 我呆望佢好耐, 佢o個架花車仲企正o係我面前停低show了好一會, 正!!!!!!! 夜晚o個個巡遊我都有睇, 亦都見番佢, 佢依然係做番Peter Pan, 依然係好靚仔!!! O係Disney, 我搵番我失去一排o既童真, o係入面做咩白痴o野都唔會有人歧視你, 越白痴越好tim, 玩得好投入都唔會有人話你癲, 好鬼正, 我o個日真係玩得超級開心!!! 希望我可以去晒其餘幾個Disney, 真係好想再去!!!
涉谷同新宿最令我失望囉, 唔係想像中咁多o野買, 可能我地唔識行啦, 又可能我期望太高啦, 不過感受到日本人的街頭文化都幾特別, 別有一番風味~ 我最鍾意係日本街頭係專登有個zone for食煙o個d人, d人要食煙就入o個個zone, 唔好搞到其他人, 依樣我真係覺得香港要學下囉, 去o左東京五日, 我都未吸過二手煙, 真係身體都好d呀!
最新鮮o既就係o係小涌園浸溫泉喇~ o個度真係好正o架, 有好多款溫泉, e.g. 酒, 茶, 咖啡, 薰衣草等等, 連死海都有!!! 問你死未??? 我地都每個泉都浸一浸, 影下相, 因為真係太有特色, 太特別喇, 硬係覺得唔試過會蝕底咁!!! 嘻嘻~ 室外都有個zone, 鳥語花香咁, 仲有溫泉瀑布, 坐o係石頭俾d水dup 落o黎o個d呢~ 我地就係咁著住泳衣四圍走喇~ lastly, 我地終於踏足最後一款溫泉, 依款溫泉唔準人著泳衣, 唔準人拎毛巾入去, 我地三個女仔始終都幾怕醜, 幾保守, 見入面冇乜人, 係都要痴住條毛巾入去, 好彩冇俾人投訴咋!!! 不過, 我地都終於都赤條條咁落o左水, 嘩! 真係好正o架!!!! 個feel好free!!! 嘻嘻~ 浸浸下我地都豁出去, 就咁走入個桶度試埋個桶式溫泉, o個日天氣好好, 太陽曬落d水度, d樹度, 加埋我地三個, 真係一幅好靚o既圖畫呀! 哈哈哈!!! 最衰得兩個鐘頭啦, 兩個鐘包埋沖涼換衫喎!!! 依個景點起碼玩三個鐘啦, 個導遊真係有病o架!!!
講下食o野啦, 我同肥茵食o左一大碟刺身, 好食到非筆墨所能形容, 終於知道點解旅遊特輯o個d人每食完一樣o野只係識得講: “好鮮味….好正….好有口感…..唔…..” 因為我每食一件, 我都剩係識得講依d咋, 係真o架! 依次應該係我咁大個女食刺身食得最享受o既一次, 好回味!!! 仲有, o係日本食o左o既烏冬同埋拉麵都係超好食o架~ 仲有, 不可不提日本o既飯, 都幾好食, 一粒一粒咁, 幾 “煙un”, 幾正o架! 香港o個d都真係爭幾班~!~ 最鍾意都係食日本菜, 正!!!!!
總括o黎講, 我地依五日係咁暴走東京, 次次自由活動, 我地都好趕咁集合, 基本上, 得我地四個次次都臨近遲到先識得走o既!!! 但係我覺得咁先係正常, 其他人都癲癲地, 次次我地上車, 佢地梗坐o係度等o架喎!!! 佢地唔覺得唔夠時間o架咩???? 唉, 所以玩得最埋都係我, 肥茵同o個兩個poly最o岩key囉~ 有一晚我地o係tatami o既套房入面玩啤牌, 食o野, 談天說地, 都不知幾咁開心呀! 最搞笑係我地o個晚係咁講個導遊壞話, 我地第二日硬係覺得個導遊有所改善, 一定係偷聽我地講o野啦!!! 我地o個晚講o野確係好大聲o架, 而且確係唔知d隔音係點, 不過是但啦, 我地直話直說o者!!!
而且, 我地因為依個trip而學識好多body language, 因為日本人o既英文實在差得很, 根本就唔識, 而我o既日文就更加係有限公司啦, 所以我地依五日就用極浮誇o既表情加完全冇grammar可言o既極簡單o既英文同日本人溝通, 而每當o個度d人用超快o既speed亂掃一大堆日文俾我地, 我地就會 “O”晒咀咁回望佢地喇~ 佢地就會知我地完全唔明, 一係佢地就走, 一係佢地就搵個識英文或者識國語o既同我地溝通(我地LAST一晚出去食o野, 食兩間o野, 每間都有個識講國語o架, 嘩, 幾有親切感呀!). 最過癮o既係, 我地o係日本依幾日可以成日肆無忌憚郁d講人壞話, 因為人地唔識聽嘛, 有咩唔鍾意都可以即時講, 咁有同團o個d人就梗係收聲啦~ 番到香港, 都真係有少少唔慣, 慣o左係咪都suimasen(唔好意思咁解)先嘛, 真係有禮貌~
嘩, 唔覺唔覺, 打o左咁多o架o拿~ 其實依五日發生o左好多o野o架, 睇下我個o急有幾多o野就知o架喇!!! 我仲hand carry o左一大袋番o黎tim, 不過, 大家唔好急住問我拎手信, 大家亦唔好有太大期望, 因為我開始發覺唔係好夠分, 冇辦法, 我人面太廣喇~ 哈哈哈~ 總之, 大家唔好太介意啦~
想睇相, 就去依個網址啦,
http://groups.msn.com/C-wai/shoebox.msnw
一部份o黎o架咋~ 一, 兩個禮拜後就update新o既一部份啦~ 冇辦法啦, 我地實在太自戀, 而o個度又實在太靚喇~ ^O^
