　　　　　　　　　　　　　　　　　⊕潘文良　撰

　　有一括人，實在莫名其妙，想著著咧嘩‥
「廢除注音符號ㄅㄆㄇㄈ，改用羅馬拼音，這樣才能跟國際接軌。」
　　其實，若真正要佮「國際接軌」，實在佮有用、無用「羅馬拼音」無關係，也佮要廢除、呣廢除「注音符號」無關係——看𣍐透、想𣍐開，不明就理的人，則會佇𨑜烏白嘩！是安怎講？
　　因為‥美國目前是世界強國，所以「英語」（美語）成為世界通行的語言。
因此，若是想要佮「國際接軌」，著愛學好英語。
　　要安怎，則會當學好英語？
　　用「羅馬拼音」，敢會當學好英語？
　　英語老師講‥
「用羅馬拼音學英語？
　你是咧『騙𤞚的』是無？
　拜託！你呣好想講‥要用你學過的拼音方式，來佮我學英語！
　請你𢵰所學的拼音，𢳱去邊仔，則來佮我好好學習！」
　　為啥麼‥「羅馬拼音」，乃至已經行出中國大陸，走入世界的「漢語拼音」，也𣍐當用來學英語？
　　簡單講，因為‥羅馬拼音，乃至漢語拼音，攏是「自家標準」——
是為「學習漢語」，而家己制定的標準，所以‥根本佮「英語」的發音、規則、方法、標準無共款，按爾是要安怎，套用「自家標準」的拼音方式，去學習英語？
想要用漢語拼音（羅馬拼音）的方式，去佮「國際接軌」，根本著接𣍐起來——
硬要「接軌」，可能會去「接著鬼」！
　　羅馬字母（拼音），本身都呣是，為漢文語言設計的，是家己硬摕來用，而設定家己的標準，比如‥
漢語拼音的〔ｑｘｚ〕，唸做〔ㄑㄒㄗ〕——
這佮外國人的認知（發音），都無共款！
　　簡單舉一個例‥（歹勢！貧惰用新例，只好「複製」進前寫的文，若看過的人，敬請諒解！）
羅馬拼音符號「ｏ」‥
華語、客語，讀做〔ㄛ〕。
台語卻是讀做〔ㄜ〕——
泉州特殊音，則讀做〔ㄛ〕，如「好」〔ㄏㄜˋ〕[ho2]，讀〔ㄏㄛˋ〕。
　　如是，一個拼音符號，各家標準不一，各自解讀，是要安怎「接軌」？
　　而英文單字內的「ｏ」，敢是讀做〔ㄛ〕，抑是讀做〔ㄜ〕？
比如「狗」的英文是“dog”，呰個“o”，是要安怎讀？
　　　　【dog】KK [dɔg] DJ [dɔg] （豆哥）
人的「ｏ」，呣是讀做〔ㄛ〕，抑呣讀做是〔ㄜ〕，
而是讀做〔ㆦ〕[ɔ]——台語「天烏烏」的「烏」。
　　而台語的〔ㆦ〕[ɔ]，拼音是記做「oo」——
如是「oo」，佇英文單字內底，敢是讀做[ɔ]〔ㆦ〕？
比如「動物園」的英文是“zoo”，呰個“oo”，是要安怎讀？
　　　　【zoo】KK [zu] DJ [zu:] （像台語「汝」〔ㆡㄨˋ〕[ju2]）
人的「oo」，呣是讀做[ɔ]〔ㆦ〕，而是讀做[u]〔ㄨ〕。
　
　　英文單字內底，所用的字母，同一個字母（符號），往往佇頭前，佮佇後面的時，是讀無𫝛音。比如：
　　　　【of】KK [ɑv] DJ [ɔv] ……的，屬於。
　　　　【to】KK [tu] DJ [tu:] 向、往、到。
「of」的「o」，佇頭前，讀[ɔ]〔ㆦ〕（台語的「烏」）。
「to」的「o」，佇後面，讀[u]〔ㄨ〕（華語的「屋」。）
　　若是「注音符號」，一符一音、一音一符，比如‥〔ㄨ〕著是〔ㄨ〕——
呣管是孤一個，抑是佇頭前、佇中央、佇後面，攏是讀作〔ㄨ〕，比如‥
　　　　華語：屋〔ㄨ〕　我〔ㄨㄛˇ〕　抓〔ㄓㄨㄚ〕　住〔ㄓㄨˋ〕
「英文語言」佮「漢文語言」的規則無共款，漢語拼音（羅馬拼音），是要安怎去「套用」？
　　
　　因為㑑的拼音，是設計來學「漢語」的，漢語讀音較單純‥
　　　　聲母＋介音＋韻母＋音調　如：惰：dio4（華語）〔ㄉㄨㄛˋ〕
　　　　聲母＋韻母＋音調　　　　如：葉：se4（華語）〔ㄧㄝˋ〕
　　　　聲母＋零韻母＋音調　　　如：紫：zi3（華語）〔ㄗˇ〕
　　　　零聲母＋韻母＋音調　　　如：啊：a0（華語）〔ㄚ˙〕
　　台語另外有入聲促音：
　　　　聲母＋介音＋韻母＋促音　如：澀{白}siap4〔ㄒㄧㄚㆴ〕
　　漢語的聲母（子音）在前、韻母（母音）在後，屬於單音節的語言。
　　英文字，有單音節、有雙音節，也有多音節，是比漢語較複雜。（音節以單字中的母音數，做為計算。單字中，只有一個母音，稱為「單音節」；兩個母音，稱為「雙音節」；三個以上的母音，稱為「多音節」。）
　　李約瑟《中國的科技與文明．卷七》（P13）：
「漢語中，從來不用像其他自然語言那樣，尋找令人厭煩的詞根，或者派生詞。
　她的詞根，就是單詞；單詞，也就是詞根——
　他們也從來不用考慮，人稱的變格、動詞變化、數、性、語氣、時態，
　以及其他語法上的細節。
　除了大自然，帶給她的光線以外，
　她沒有任何規則，也完全不需要擔心，會發生任何混淆和困惑。
　因此，他們的語言，樸實、簡單和容易，
　就像大自然，在說話時，應該的那樣。」
　　…………
　　呵呵！罷了！實在呣免講𪝋濟，加講加費氣，實在誠悿，著簡單講‥
漢文語言，佮英文語言，是兩套無共款的語言系統，
學漢語所用的拼音方式，無法度套用去學英語，硬要用，只會「徒增困擾」——
若要學好英語，著愛照人的標準、人的方法去學，則會「事半功倍」。
　　如是，學生囡仔，有學「羅馬拼音」、無學「羅馬拼音」；會曉、𣍐曉「羅馬拼音」，實在佮「學英語」無關係！因為‥若是自細漢（幼稚園）學英語，自然著愛用「羅馬字母」（英文字母）。
　
　　如是，若要學習家己的「漢文語言」，用「注音符號」、用「羅馬字拼音」，實在攏會使，反正學會曉著好——兩項共齊參咧教學，嘛是𣍐衝突——
但是，若要講「注音符號」較好用，抑是「羅馬拼音」較好用？
只要進一步，去分析、比較一下，著會知影‥
其實是用「注音符號」，教學漢文語言，效果較緊也較好！
因為‥注音符號，是為漢文字，量身創製的一套標音符號！
外國人，用注音，較𣍐習慣，所以較愛用伊家己，熟似的拼音方式（英文字母），
但若是進一步，了解注音符號的來源佮妙用，只要解說予伊聽，伊也著會當接受，真緊著學會曉，也會曉運用——家己看有注音的書，著會曉唸。
南港中央研究院，有真濟外國人，若願意去「調查一下」，看用注音符號，學習中文的外國人，佮用羅馬拼音（漢語拼音），學習中文的外國人，有啥明顯的差別？
若用注音學習漢文語言的外國人，發音著會比用拼音學習的人較準確！
　　注音符號，一字的讀音，上濟只是四個符號（聲介韻調），簡單認、簡單唸，如此優勢，豈是拼音能比？
　　國內的拼音，赫恁濟套，國語、客語、台語、原住民語，各自一套，也無統一，要學別族的語言，難免因為拼音的標準差別，產生困擾，而降低學習的意願——
除非是用「注音符號」，抑是用「國際音標」，
則有法度，「解決、降伏、統一」，國內外，所有的拼音亂象，
同時教學台語、客語、華語，則𣍐有衝突、𣍐有矛盾、𣍐有困擾！
　　會喊嘩「廢除注音符號」，實在是‥不識自家珍寶！
啉了一寡「洋墨水」，竟然著感覺‥外國的月娘有較圓，真正是‥無知之見！
　
　　所以講‥
若真正要佮國際接軌，自細漢，好好啊學英文、英語著好！
學好英語，著會當遊世界！

　　啊若學𣍐好英語，其實也無啥要緊！
　　科技始終服務於人性！

　　要出國旅遊，呣免煩惱英語學無好——驚無錢爾爾！
　　以後，手機仔的「翻譯功能」強大，呣管去陀一個國家，彼此攏有法度，透過手機仔的「快譯通」來交通（交流溝通）‥
㑑對手機仔，講㑑的話，對方的手機仔，自然翻做伊聽有的話（看有的文字）；
對方對手機仔，講𪜶的話，㑑的手機仔，自然翻做㑑聽有的話（看有的文字），
實在方便嘎！
　
　　所以講‥
拜託‥政治人物、學者頭人、朋友親情、先生小姐！
呣𢓶更再「自欺欺人」，食飽換枵烏白嘩！
予呰個社會，會當較安平和樂咧！
　
　　　　　　　　　　　　　　　　　　　2018.03.05.一　00:01:00　初稿
■台語註解
【𪝋】{本}ㄒㄧㆫ　siunn1　{變}ㄒㄧㆫ├　siunn1~7　太、甚。※台創漢字。
【𫝛】{白}ㄒㄧㄤ├　siang7　{變}ㄒㄧㄤ└　siang7~3　相同。
【佇𨑜】ㄉㄧ└　ㄏㄧㄚ ti3 hia1　在那。　𨑜，台創漢字。
　
■相關連結
◎周育如K.K 音標英文教學(自然發音) - YouTube
　https://www.youtube.com/watch?v=eLSOXxHa8Ps
　
■相關文章
◎潘文良《注音符號當自豪》。2009.09.25.五　09:21:00（網誌）
　https://avun1230.wordpress.com/2009/09/25/◎注音符號當自豪/
◎潘文良《注音符號當自豪》。2009.09.25.五　09:21:00（新聞台）
　http://mypaper.pchome.com.tw/avun01/post/1374926133
◎潘文良《論國家語言拼音政策》。2017.05.16.日　07:00:56
　http://mypaper.pchome.com.tw/avun01/post/1370748563
◎潘文良《注音與拼音》。2017.05.06.六　16:27:33
　http://mypaper.pchome.com.tw/avun01/post/1370886868
◎潘文良《廢除拼音用國際音標》。2018.03.02.五　10:00:00
　http://mypaper.pchome.com.tw/avun01/post/1374850683
◎潘文良《要怎佮國際接軌》。2018.03.05.一　00:01:00
　http://mypaper.pchome.com.tw/avun01/post/1374868773
　
※本文首發於「新聞台」。2018.03.05.一　00:03:32
◎潘文良《要怎佮國際接軌》。2018.03.05.一　00:01:00
　http://mypaper.pchome.com.tw/avun01/post/1374868773
※本文分享於「臺語學院」。2018.03.05.一　00:07:00
　https://www.facebook.com/groups/978821105480673/permalink/2027824283913678/
※本文分享於「台語生活社」。2018.03.05.一　00:09:00
　https://www.facebook.com/groups/1524327644503170/permalink/2077470605855535/
※本文分享於「臺灣話資料交流所」。2018.03.05.一　00:09:00
　https://www.facebook.com/groups/434167333333483/permalink/1655073751242829/
　
■標籤：英語、漢語、台語、客語、華語、廢除、注音符號、羅馬拼音、
　　　　自家標準、國際音標、國際接軌。