2021-09-02 08:02:27| 人氣321| 回應0 | 上一篇 | 下一篇

《台語時間》規矩的人生

推薦 0 收藏 0 轉貼0 訂閱站台

聽講S.W連續劇一定是早時一集,下晡時一集,我隨笑起來;比著我這款看入迷就無管早暗、紲咧(接續)看七八集的人,伊實在是足有撙節。這个朋友自少年就過足規矩的生活,想袂到老來看劇也遮爾(這麼)嚴。

伊的規矩包括:早起時準時去公園運動;一禮拜有固定的日子去上課、看序大、參加教會的活動;固定的時間寫稿,一日巡一遍email;家己一个人食飯,也一定愛有兩菜一湯;這頓食飯,下頓就食麵;這頓食肉,後頓就食魚;食飯時間固定,菜煮好的時間傷(siunn,過於)早,甚至等時間到才開動;逐日一定愛睏晝,而且,愛睏兩點鐘以上。……

有一遍,我請伊和兩个朋友來𨑨迌(thit-thô,玩耍),食晝飽無偌久,伊就趕緊欲轉去睏晝,我講慢且啦,來看阮樓頂的「空中花園」。彼時陣,花園的花開甲真鬧熱,當愛予人參觀。伊講:「後遍來才看。」堅持欲走。去樓頂看花才偌濟時間!

當然,無後遍矣,一年經過一年,逐家攏佇外口食飯,請朋友來厝內的熱情熄去矣。

朋友攏講S.W這款「照表操課」的生活,親像予一條無形的索仔縛牢牢,較無趣味,較無自由毋過後來我讀著一句智慧金言規律的生活上自由。斟酌想,確實有道理。

規律,做代誌有原則,有時程,啥時陣愛做啥就做啥,心頭定,較袂兇兇狂狂(慌張);才是心靈真正的自由。

我有覺悟,明白這个道理,毋過,「獅佇深山內」(知佇心肝內),欲執行卻真困難;彼款「真正自由」的生活和我無緣。連續劇好看就應當直直看落去,哪有法度「早時看一集,下晡時看一集」?

20219月號《文訊雜誌》

台長: Liu 靜娟
人氣(321) | 回應(0)| 推薦 (0)| 收藏 (0)| 轉寄
全站分類: 圖文創作(詩詞、散文、小說、懷舊、插畫) | 個人分類: 台語文作品 |
此分類下一篇:《台語日常》罔做議量
此分類上一篇:《台語時間》好穿就好

是 (若未登入"個人新聞台帳號"則看不到回覆唷!)
* 請輸入識別碼:
請輸入圖片中算式的結果(可能為0) 
(有*為必填)
TOP
詳全文