小影迷Di[大]lemma 個人影評及生活隨筆 請移玉步到台長新部落格: http://agnestse.blogspirit.com/

1,920愛的鼓勵 0訂閱站台

雖然人人都話孔慶翔低B, 但我寧可睇佢低低地既演出, 勝在夠真. 好過睇香港人見到奧運健兒V嘩鬼叫、問埋唒d無聊問題; 好過睇時下所謂流行歌手, 大言不慚, 自稱天皇巨星, 其實豬狗不如....

貴為美國影星既Nicole Kidman, 行出黎唔係Chanel 就係Vintage. 最近俾老牌影星Lauren Bacall批評為新丁. 今次我覺得岩聽至極. 你地可以話Betty姐姐 (Lauren Bacall原名) 老餅, 佢假假地都係荷里活既Sultry Queen, 雖然產量唔算多, 但同佢做對手戲既, 唔係佢老公保嘉哥Humphrey Bogart (有名你叫《江湖俠侶》), 就係同Gregory Peck, 甚至女對手都係Marilyn Monroe、Ingrid Bergman, 年青少少仲有Barbra Streisand.... 每一個演員都係一個傳奇. 試問活躍係荷里活黃金時代既Betty姐姐, 有乜大場面無未見過?

至於Nicole Kidman呢, 其實佢同前夫靚佬湯都力求脫胎換骨, 嘗試不同類型片種同角色, 希望成為人人認同既演技派. 可惜兩個都太錫身, 點都要show自己最好睇既一面示人. 正所謂, 演戲演到爐火純青時, 扮乜似乜, 連靈魂都換埋. 無論兩位點整色整水, 裝假鼻、做武士, 甚至熱淚盈眶話願意切腹, 硬係有少少失真, 唔夠說服力. Nicole Kidman依然係Nicole Kidman, Tom Cruise依然係Tom Cruise.

如果只能以一句說話黎形容Lauren Bacall, 我即時諗到既係: 橫眉冷對千夫指.

※Lauren Bacall年輕時的照片. 她上鏡的姿勢幾乎全是頭部傾斜45度角, 作眼超超之貌.

P.S. 唔講唔知, Betty姐姐同保嘉哥既戀愛史都零舍唔同. 初次合作, 劇情安排保嘉哥教Betty姐姐吹哨子. 之後....保嘉哥當時出唒名惡既老婆睇到眼火爆. 保嘉哥攪掂離婚手續後, 就娶左年紀比自己細廿一年既Betty姐姐返屋企. 年齡上有距離, 但保嘉哥同Betty姐姐形神出奇地合拍. 保嘉哥魂歸天國後, Betty姐姐放左一支金哨子係佢棺木入面, 以紀念當年"吹BB奇遇結良緣"!

(寫於9月10日)