〔澳門勞動報〕網上版 本報創刊於2007年8月1日 為澳門政府承認刊登法律廣告之有效刊物 澳門新聞局檔案編號：320 社長：何興國 電話：+853-28457456 傳真：+853-28457044 email：macau_labour_bi@yahoo.cn 逢星期三出版

224愛的鼓勵 0訂閱站台

　　　　　　　　　　　　　　　　　　　　　民主新

原載於〔澳門勞動報〕第十三期　02.01.2007

　　在立法會內，經過30幾次的內部會議，有80幾條條文的勞動關係法法案至討論咗60多條，但記住，只是討論過，其實沒有多少條條文是可以達到共識的。以呢個討論進度，相信要通過這份新的勞工法仲有排等。
　　不過，各位工友又無需失望，以現時澳門立法會的組成狀態，即係資方佔居完全主導位置，代表基層利益的議員鳳毛麟角之下，通過到的勞工法，都唔會真係保護到勞工權益，隨時可能仲差過原來的勞工法。所以，若果問我，我就唔心急。事關依家係小組會討論時，都只係討論。所謂「討論」其實只係議會內的資方利方議員同勞方利益議員各抒己見，官方代表亦會在雙方討論中表表態，說明官方係某條條文上的立場，或者解釋吓某條條文的立法原意，所以純屬口水會，資方與勞方議員係「講人自講」，各自表述。但係若真的拿到立法會大會表決時，情況就完全不同。條文細則性審議時當然係逐條表決。而表決當然係少數服從多數，而當代表資方利益的議員佔主導地位時（29名立法議員中，有14位來自商界，有3位是依附於商界的律師及核數師），立法會通過的勞工法又點會是乜野好貨色。
　　聖誕節前，來自工聯的間選議員李從正在討論勞工法的小組會中突然憤然離席。唔係啩？一向立場溫和的工聯議員都離席抗議，梗係好激烈定嘞。跟據傳媒報導，李議員的抗議係因為在討論勞工法過程中，官方早有立場，令工聯會致力爭取的「欠薪刑事化」同「長期服務金」都受阻，因而憤然離席。如此立場非常正確，點解要欠薪刑事化？出糧對受雇者來說係大過天，唔係為出糧，做乜咁辛苦日日捱騾仔。部份老細經濟條件真係搞唔掂，拖遲少少出糧，大家將就吓，都可以話係無可奈何。但係有Ｄ無良雇主刻意拖欠工友薪金，係唔係都拖你一頭半個月糧，佢就花天酒地、燈紅酒綠，就係唔出糧俾伙記，呢Ｄ人渣老細，唔刑事化佢真係唔驚。但係孫局長就話喎，依家無條件刑事化，因為若欠薪刑事化，仲可能拖慢處理速度，仲會因為要加入欠薪刑事化內容而拖慢勞工法的制訂時間，所以政府立場係唔會將「欠薪刑事化」放落去新勞工法裏面。
　　難怪李議員嬲，如此立場又真係狗屎。第一，有欠薪刑事化的規定係唔係真係會拖慢勞資糾紛的處理進度呢？或者係，但法律訂立的目的唔係要處罰人，而係要發揮阻嚇作用。正因為欠薪無須負刑事責任，個Ｄ無良雇主就大剌剌拖欠伙記人工，料你都吹我唔脹。告到勞工局，等勞工局來處理時咪自動更正，出番糧囉，咁又拖咗幾個月，奈我咩何。但欠薪刑事化就唔同，你老闆敢惡意欠薪，有錢都唔出糧，一經核實隨時會要告上法院，一經罪成會係坐監或最少會留案底，拖欠薪金的成本就高得多。法律就發揮到阻嚇作用嘛，孫局長，你唔係咁都唔識吓？
　　第二，因為要加入欠薪刑事化內容而拖慢勞工法的制訂時間就更離奇。據悉，係社會協調常設委員會個黑箱裏面，就對欠薪刑事化進行過唔少的討論，代表勞方的支持，代表無良雇主的部份資方代表當然反對，關鍵係睇政府持乜野立場。而在法律技術上根本亦唔存在問題，話因為欠薪刑事化而拖慢整個勞工立法進度，根本就係攞嚟講。況且，正如筆者前面所講，若做一份根本無改進的新勞工法，甚至仲差過依家原有個份的，咁唔做好過，趕嚟做乜？
　　所以，李議員憤然離席係有理由的，否則佢好難向工友交待。不過，依筆者來看，官方表達立場亦不能說是錯，只係議會才是立法機關，李議員若在議會裏面無法為工友爭取一個更合理的勞工保障，就應該透過發動民眾，透過社會行動向政府同立法會施加壓力，而唔係一走了之。不過，真係要發動民眾時，工聯又唔知制唔制呢？
　　至於長期服務金，且聽下回分解。