好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

 

和朋友啉茶，講著運動，我講我個外月無去公園運動矣；因為阮彼个五六个人的小團為著欲覕（ bih，躲）日頭，徙去一个有石桌、石椅的棚仔跤，場所較狹。

「別人有去遐（hia，那兒）運動無？」M問我。

我講有。

「別人會使，你哪會袂使！」

我講去公園，上佮意（kah-ì，喜歡）的是開闊的空間，做操的時會當看天、看雲、看樹仔；佇（tī，在）棚仔跤看石桌、石椅，無爽快。

「無愛去運動，就揣（tshuē，找）理由！」

我講我徛（khiā，站）佇棚仔外面運動，也會當看天、看雲、看樹仔；毋過……。

話猶未講完，M講：「著啊，若有心欲運動，總是有變通的辦法。」

我講徛較遠，音樂聽無啥有；棚仔跤閣不時有人咧答喙鼓。

講到遮，我忽然間奇怪起來，這是啥狀況，哪會M責問一句，我就辯解一句？伊是共我當做啥人？學生？被告？

我隨想著伊不時會講 in（她的）翁的「歹話」：「老歲仔規工覕佇厝內哪會使得？叫伊出去散步行行咧，伊就嫌熱嫌寒，揣一堆理由！」「叫伊晾衫，伊竟然假鬼假怪，講手痠甲攑（gia̍h）袂起來。」「叫伊去買報紙，伊也講無氣力；愈無運動，才會愈無氣力。毋聽人勸，竟然講我是『酷吏』。」「無愛振動，規日坐佇客廳做廳長。」

可能是批評翁慣勢，對朋友才也有彼款要求、用彼款口氣講話。

兩日前，我拄好（恰好）看一齣韓國電影《82年生的金智英》，女主角做查某囝、女學生、女職員、家庭主婦、新婦、媽媽各種女性身份久長以來受著的委屈，積佇心內，過年的時佇大家（婆婆）面頭前發作起來，忽然間變做家己的老母，共大家講，「親姆，既然你的查某囝轉來矣，就予阮查某囝轉去：我嘛真寶貝阮查某囝。」

有時，伊變身做媽媽的老母，有時伊的身份是翁婿的丈姆。

好佳哉，M精神正常，家己的身份無變；只是無意中，共我變做in翁，才會按呢講話。

《聯合報》副刋2020.12.15