好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

   

有一年，參加《文訊》辦的重陽節文藝雅集，真難得，詩人周夢蝶先生也有參加。

餐會結朿了後，六七个人做伙去隔壁開講啉咖啡。我共（kā，跟）詩人講真濟年前，我猶是文藝青年的時，我有一本小說和名家的冊鬥陣排佇伊「明星咖啡館」前的冊攤，感覺家己嘛佇台灣的文壇掌故內底參一腳，真光榮哩。

  伊袂記得，毋過伊會記得我後來佇＜文星＞出的冊。

我閣講伊握手攏足大力，第一遍和伊握時，予伊的氣力驚一趒；我毋捌握著遐爾有力的手。伊仙風道骨，人焦閣瘦，握手時敢若用所有的氣力來表示熱情。

聽我按呢講，伊手伸出來，這擺，我親像欲共人遏手把（比腕力），用所有的氣力來握。結果換伊驚著，講第一擺「棋逢敵手」。

我講笑，「我少年時扛過米包啊。」這个老實人，竟然相信，頕（點）頭講，「嗯，應當有關係。」

我共伊講，聯副主編邀我去朗讀；我講我hân-bān（拙於）講話，佇眾人面頭前尤其講甲離離落落。主編講周夢蝶原來也無答應，講伊袂曉講話，講話閣慢；結果伊彼場朗讀，足成功，聽眾的反應足好。 我講我佮（kah，與）周夢蝶無仝款，伊徛（站）佇台頂就是一个風景，免講話就有號召力，反應當然好。

雅姿和周公是誠濟年的忘年交，共我講，「你徛佇台頂才是風景，周公徛佇遐是古蹟；愛好好仔保護的古蹟啦。」

阮兩人的對話，予周公笑甲本底就誠光的額頭愈光。

彼日，應鳳凰也是一个特殊的風景，伊uì 台南揹兩大袋物件來台北參加重陽聯誼，一袋是手提電腦，一袋是二十外本冊，其中有的已經絕版。我是對家己皮包的重量「斤斤計較」的人，自然咻咻叫，「遮爾（tsiah-nī，這麼）重，你毋驚肩胛頭崩落去！」伊講，「好機會，提來予可能會拄（tú，遇）著的作家簽名啊。」

這个永遠袂老的文青心內一定驚真濟作家會「絕版」！

伊欲予周夢蝶簽的冊是《還魂草》，周公掀掀看看，竟然講伊提轉去厝簽。啊？按呢就愛加一逝（tsuā，趟）工去提囉。我共鳳凰講，「遮爾仔慎重，莫怪伊講話袂赴（bē-hù，來不及）人聽。」

聽講有一擺佇公車面頂，一个女文友問周公一个問題，伊咧想按怎回答較明白，無出聲；女子等無半句，問，「你咧想啥？」問幾若遍，攏無回答，只好紲落（suà--lo̍h，接著）問別的問題。第一个問題猶未想好，換想第二个問題，周公愈為難，彼个女子閣一直問，「你咧想啥？」

問十遍，猶未回答，周公到站，就落（下）車了。

這个故事予逐家笑足久。

我共周公講，你講話遐爾斟酌，一定袂像我不時為著家己講話傷緊（快）、無妥當後悔。想袂到伊講伊嘛時常會為著講出喙的話懊惱，所以規氣（乾脆）無愛講！

  這是十年前的代誌，兩年前，周公做仙去囉。

毋知伊佇天頂，替人簽冊時猶會講提轉去厝才簽無？

2016.7.24《聯合報》副刋