好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 12訂閱站台

 
  食飯的時，囡仔談論、分析國際大代誌，我攏恬恬聽－－有時根本聽無；一半擺會插喙的只有一寡趣味的小代誌。可比，最近非洲有一个國家選總統用珠仔（彈珠）。

竟然逐家攏無看著這个新聞，問我是按怎選？

我講彼个國家的人民大部份毋捌（不識）字，所以無用選票，是共珠仔囥（khǹg，放）入去有貼候選人相片的票箱，選完了後才共珠仔鋪佇有空（孔）的水泥板頂頭計算，板有200个空和500个空兩種規格。當然珠仔較濟的人贏。

我「替古早人操煩」，「毋知是用啥款珠仔？玻璃、塑膠抑是鉛？若欲偷食步做票，比用紙的選票較麻煩，也較重啊。」

囡仔問我彼是佗一个國家？講著名，我的頭殼就拍結，「敢若叫做、叫做啥物干。」

「烏干達？」

「著著，可能是。」

遮爾無肯定，囡仔猶是感覺懷疑。我講，「彼个落選的總統是獨裁者，已經做幾若任；這遍本來承認失敗，後來竟然講無算，愛閣再投一擺票。」我補充，「彼个獨裁者敢若叫做賈，叫做賈－－啥物。」「賈」我用華語講。

有講若無講，囡仔顛倒笑起來，「是食飯抑是食麵？」

那講那想，閣想起一項資訊矣，「彼是和咱有過邦交的國家，舊年抑是前年才斷交。有一年馬英九總統去訪問的時，和彼个總統拚場做伏地挺身。」

囡仔講，「你講的是甘比亞總統賈梅啦。」

著著。

「哈哈，講烏干達嘛無毋著（沒錯），平平有一个甘（干）。」

2017.1.17《聯合報》副刋

   相片是甘比亞的國徽