小影迷Di[大]lemma 個人影評及生活隨筆 請移玉步到台長新部落格: http://agnestse.blogspirit.com/

1,920愛的鼓勵 0訂閱站台

周不時聽到有人妄自菲薄, 大鬧香港/香港人唔掂, 敗家有餘, 氣數已盡云云.

唔該, 請收番呢句說話.

係有好多香港人唔知黐左邊條筋. 表表者係高官同貴人. 最叻將香港最有特色既景物毀去, 然後痛定思痛, 又話要起番一個新既出黎!

大笪地, 仆直. 董生, 仲起唔起漁人碼頭呀? 香港曼克頓呢?

係有好多香港人唔知黐左邊條筋. 最近有人興波作浪, 要做現代精衛, 話填平個海, 出入會方便好多, 仲會起多d公園, 醫院同學校.

唔好呃人啦! 啟德機場跑道一段, 清理同淨化地下油污, 最快都要十年. 幾時等到青蔥一片、春風化雨、作育英才、身心康泰?

係有好多香港人唔知黐左邊條筋. 唔知點解, 香港d土撥鼠愈來愈多, 又成日做心贓搭橋手術. 由A地到B地, 由B地到C地, 由A地又可以到C地, 最盞鬼係, 由B地仲可以快少少到D地啊!

聽聞過政府本來計劃鐅通港島區, 一條地下鐵路氹氹框圍住港島四周咁走. 地鐵因"土撥鼠"技術掌握得比九鐵更好, 本來有望投得工程合約. 弊家伙, 屋企冇柴火─財赤! 計劃不得不人工流產去. 查實鐅通港島南面, 係咪真係咁妥當呢? "The next station is The Billionaire 's Mansion!" 你都咪話有錢佬唔把幾火.

係有好多香港人唔知黐左邊條筋. 鍾意Band Band咁既聲, 轉頭又笑Rock 'N Roll 班霸Rolling Stone老餅. 霆鋒開快車, 好野. Juno, I love you with more pocket money, yeah yeah! 家醜不外傳, 但人人都知道呢班馬騮做梗乜. 黃家駒生前真係做左一次預言家: 香港樂壇早已死了.

雖然香港有一部分真係幾不堪, 但唔代表香港已死. 話香港已死既人, 其實都係香港人─你知唔知廉恥架?

從邊方面可以睇到香港仲有一絲希望?

唔計SARS期間所發生既事, (講真, 傳媒上下狂讚謝婉雯醫生, 我覺得反應過於偽善. 最重要係醫護人員同病患既死帶俾香港人乜野啟示 ) 後SARS時代令人唔再麻木, 重拾人埋藏已久既真情.

好似尋日係地鐵車廂顯示版上得知有個兩歲男童係山上失蹤, 我當時心諗: 唉, 凶多吉少. 點知吉人真係自有天相, 個細路好地地坐係石澗度訓覺, 消防員好開心咁緊抱著小朋友落山.仲感化發現男童既消防員, 認為係最完美, 最有意義既任務. 一個小生命可以牽動成team人, 你話感動唔感動? 今朝打開報紙, 我認為呢單報喜新聞最令人安慰. (不過, 希望有關當局留意下個阿媽, 唔好俾佢攪多一鑊)

七‧一遊行, 我地唔怕大陸砌香港生豬肉 (大陸真係唔敢隨便郁香港!) , 走到街上大大聲講出自己心聲. 大陸有人好感動, 更支持香港人既行動. 因為香港係全中國唯一可以咁做既地方! 香港既自由彌足珍貴, 實在得來不易.

最近有套叫《盲井》既大陸電影上映. 內容探討中國"甚麼都缺, 就是不缺人"既陰暗面. 當初呢部電影唔可以係大陸公開放映, 直至佢係德國柏林影展打敗左"大王, 殺不殺? 殺!"既《英雄》(中國真係從來唔缺人!) , 奪得銀熊獎, 致令中方高度重視. 四月中, 香港舉行香港國際電影節, 有好多人驚到死, 買左飛都怕到飛起要撻訂.《盲井》既導演來港參加交流. 佢話:"香港是全球華語地區中 (包括台灣) , 唯一可以上映這部電影的地區, 所以我一定要來!"─ 無言以對吧? 香港對部份中國人來講, 係不可多得既言論同影像自由既地區!

(雖然香港人尺度保守得好緊要, 最鍾意見到人春光乍洩, 然後V嘩鬼叫, 大彈乍洩者道德敗壞. 有咁既反應既傳媒, 至係道德敗壞)

星期三下午, 我話返中大, 其實係去聽小思 (盧瑋鑾教授) 既香港文學演講. 佢講乜我唔多提. 由中學時代開始, 我地要去明白中國文化、 人文精神, 每一課課文都隱然交待. 可惜慧根有限, 點極唔明. 睇到小思以單薄既身驅去傳揚中國文化, 由佢身上, 我可以見到自唐君毅等人、傳至盧瑋鑾等人、再傳至在學, 在坐每一人身上既薪火. 前人話, 仰慕神交孔孟, 唔需要真係認識對方, 而係從對方身上, 體會偉人既努力同成就,即"重敬". 雖然, 我唔認識小思, 小思唔認識我, 但我終於明白中國人既人文精神既可貴.

席上有人發問:"乜野驅使你咁熱心於整理香港文學資料?"

盧教授回答: "愛. ", "因為我愛香港." , "我所整理既香港文學資料, 唔係屬於我一人, 係屬於每一個香港人."

愛, 愛, 愛! 同樣有人話愛, 但‧力度‧真係‧差‧好遠!

我唔敢話自己愛香港, 但我好高興能夠係呢塊土地上認知我既人生路.

點呀, 仲想鬧香港XYZ嗎? 諗清楚至好鬧.