小影迷Di[大]lemma 個人影評及生活隨筆 請移玉步到台長新部落格: http://agnestse.blogspirit.com/

1,920愛的鼓勵 0訂閱站台

係便利店見到一個娘娘腔o既學生哥, 同兩位女同學傾計, 話校長點樣迫佢地執正個校服look, 言下當然揶揄下校方. 佢地既言行舉止, 唔會令我覺得討厭, 相反仲有d羨慕. 佢地真係好梳乎, 眼中最大件事, 都不過係同學校勢力抗衡. Camp Camp學生哥仲發表珍寶珠滋味心得: 「草莓味? 好難食架, 呢隻先好味...」

想當年, 我都係一個「學校=全世界」o既傻女生, 學業上未算荒廢, 但肯定無落足心機. 肯豁出一點點o既, 只有中文科同美術科.

中四下半年, 中文科老師 (兼教文學) 離校進修, 撇低兩班會考班. 學校另請一個怪人老師接教棒, 佢講野極度文縐縐, 簡直超現實. (我試過以班長身份, 居然放學後同阿sir係教員室傾左成粒鐘, 痛陳同學目無尊長) 所有同學都唔帶教科書, 只帶厚厚o既「精讀」(收錄教科書原文內容, 模擬問題等), 日日上堂七嘴八舌, 一於當阿sir隱形. 我亦懶理噪音, 將「精讀」當枕頭. 一個暑假後, 怪人老師唔獲留任, 另一位資深Miss接左個燙手山芋. Miss好有熱誠, 總算感動到一班冰極心腸o既頑劣學生, 齊齊面對課文程度追唔上o既問題. 半年內追番一年既進度. 而「精讀」根本就無乜作為.

逢星期二同星期五放學前兩堂係美術堂, 美術Miss要我地星期二留到五點鐘, 苦練素描同畫畫技巧. 多得美術Miss, 我有時覺得自己選修美術幾巴閉, 可以囉住舊木, 係金工房玩雕刻、可以玩天拿水印刷 (?) 、可以玩裝置藝術 (其實係一個呼拉圈). 美術Miss又肯主動帶學生睇展覽 (年年聖誕去北角睇會考展, 觀摩會考作品!), 比齋坐課室「恰眼訓」聽書更加擴闊視野. 但係當時我能力有限, 會考美術科成績平平, 留待重讀一年, 再苦練美術, 先囉到個好成績.

如果我既學生世界係咁簡單就好! 每一個不滿學校建制o既學生, 都認為校內梗有多股邪惡勢力, 譬如迫你drop科既人妖Miss、要求Band Two學生變成名校精英, 淨係識吹水認叻o既架世老師等等 (仲要成日出d賤招折磨學生). 於是我心入面連帶科目(數學), 討厭埋個老師都得. 係世界裡頭, 我係黑五類, 老師同某d囂張同學就係紅衛兵...

所以, 我都幾明白「珍寶珠弟弟」對學校o既睇法 (當然, 佢冇我咁不幸, 中學五年係dark age!) . 佢停留係鑑賞珍寶珠同笑罵校長既階段, 完全唔需要顧及世俗, 真係「幸福」!!! 而我, 唔上唔落, 偶然懷緬過去, 恨極自己都無補於事, 真係折墮!

如果, 世界好似一支珍寶珠咁簡單, 你話幾好...!