原載於〔澳門勞動報〕第十七期 29.01.2008
呢輪滿城盡說樓價高，買唔起，唉，乜淨係呢輪啫，其實呢幾年都已經買唔起啦。
話說自從澳門經濟起飛，樓價就跟住經濟起飛係咁飆，飆到澳門居民只能望樓興歎。莫講低收入人士買唔起樓，就算月入萬幾兩萬的荷官大哥，面對閑閑地二三百萬一個單位的樓，佢哋又買得起咩。特別係Ｄ後生仔，做荷官係就係搵快錢，但係點知可以搵到幾時，若果過咗呢三五年，博彩業萎縮，一個唔覺意俾人「調整」咗出嚟，即使好彩搵番份工，隨時連供樓都未夠，咁點死。所以，只能謀定而後動，都唔係話上車就上車。
有老友問，點解澳門的樓價會飆到咁高，係唔係俾香港班地產佬嚟搞亂檔。我話，香港地產佬係就係有興風作浪，但係你估澳門的建築商同地產佬唔識玩呢個遊戲咩？澳門人唔會炒樓咩？佢哋咪一樣玩到興高彩烈。所以唔好賴人。咁澳門點解會樓價直飆？在下認為最少有兩大原因：
第一，有人搞局。邊個？梗係食地產飯呢行的人。佢哋搏命吹澳門地產市道不知幾旺，大把人湧嚟澳門買樓，又話澳門博彩業興旺帶嚟大量的專業人士，市場上Ｄ貴價樓就係以佢哋為目標。地產界「好友」加上本澳大報的配合以訊息造市。營造一個好好的氣氛，即使成交唔係真係咁多，唔緊要，大家齊來托市；
第二， 政府幫手托市。其中重要一環就係特區成立後，唔再開始任何新的公屋計劃，包括社會房屋同經濟房屋，一律殺清，目的係幫Ｄ地產商掃貨，逼Ｄ稍有點點經濟能力的人被逼接貴貨，而由於公屋唔起，無殼一族買唔起都要租，令租屋市場上揚，亦有利於一手樓出貨；其二係政府搏命估高樓宇租值，過去幾年，應該係從零二零三年開始，個時個市都係好低沉，但係政府就逐區逐區重估樓宇租價，有Ｄ一估就高幾倍，目的可能係想為庫房增加Ｄ收入，但客觀效果就係推高樓宇租金，比如話某君有個單位，財政局估佢單位租值係每年一萬二蚊，咁即係每月一千銀，佢租俾個住客又係一千元，咁咪啱數囉。突然某日，某君接到財政局估佢個單位的租值係三萬銀，咁即係話佢間樓月租值二千五，咁要唔要加租先？於是咪搞到Ｄ租客喊咁口囉；其三，就係放開手腳俾班友搞投資置業移民，等Ｄ過百萬的樓有強力的承接力；其四，搞利息補貼，鼓勵人買樓，表面上睇係幫Ｄ想置業的居民，實質上係幫Ｄ地產商掃蟹貨，有經驗的人都知道，四厘補貼最終得益的咪係賣樓嗰個，因為呢個計劃一出，樓價就上抬，依家政府又嚟呢招重施故技，點解？因為Ｄ二三百萬一個的單位開始積貨嘛。總之，呢幾年樓市飆升，政府係「功」不可沒。
從以上原因可見，澳門樓市的飆升係自有其源。咁依家聽講話樓價又升喎，咁點算先？有少少理由，因為政府公開賣地，四千幾平方尺竟然賣到十四億，政府一直話佢哋唔公開拍賣土地係因為唔推行高地價政策，嗱嗱，係唔係呢，話咗啦，一拍賣土地就係推高地價，高地價就自然梗係推高樓價。特首係舊年四月係立法會上已經爆響口，話到時一定無人認數話係佢哋逼政府公開賣地而搞到推高樓價。所以，各位見到以高價搶到兩幅地的，啊，原來又係個班友，咁即係點，講得好聽的就係佢哋對樓市前景睇好，講得唔好聽的就係造馬。而拍賣完地唔夠三日，政府就拋出置業補貼計劃，引人上車，增加樓市的需求量，咁仲唔推高樓市，等Ｄ反對派揹起推高樓市累人賣唔起樓隻鑊。不過，機關算盡有時會反誤了卿卿性命。公開賣地賣得好價錢，正好說明過去咁多年唔肯公開賣地，一味免公開競投批地，實質上係證明咗賤賣土地，過百幅土地令澳門庫房損失在千億以上。識少少經濟學的人都知，決定市場價格，成本固然係一個因素，但更重要因素係需求量，求過於供，樓價上升，相反，則樓價下跌，呢Ｄ係經濟學ＡＢＣ，唔係唔識吓？所以，公開競投的土地，土地成本價當然高咗，但係唔係獲地者就可以將樓價任意推高呢？唔好當個個係傻仔啦。仲有，即使拍賣土地真的會因為成本而推高樓價，咁又點，反正樓價一早高企，大佬呀，，四千銀一呎我賣唔起，依家去到五千銀一呎，澳門大多數居民都係賣唔起，咁推唔推高樓價關我鬼事咩。我哋澳門人最緊要係有個竇口，賣唔起樓咁點呀？
好簡單，政府已經承認澳門住屋有兩個市場，一個係面對外來投資者的高級豪宅市場，另一個係面對澳門普羅大眾的普通樓宇市場。依家班建築商一窩蜂咁個個都話起豪宅，咁政府咪出手囉，本地居民的住屋由政府出手大建公屋。反正政府呢幾年收入甚豐，而賣地賣得咁好價，就攞呢筆錢嚟做公屋基金，挖掘土地的潛力，為澳門居民大建公屋，為貧困同低收入家庭提廉租的社屋，為Ｄ有一定經濟條件的本地居民家庭建經濟房屋，直接解決澳門本地居民的住屋壓力，咁至係正路，咁澳門居民又何懼私人樓樓價高企呢？
仲有兩年，特區政府做番Ｄ好事啦，流芳百世點都好過遺臭萬年啦。
文章定位：
