春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

　　偎近中年，到旦萬事皆空，卡無，嘛著給身体顧互勇；自底 　
罕咧運動，舊年尾想講若會凍，逐月日至少爬山一bai，這是我新
年度最大ｅ映望；三拖四拖，理由一大綰，到一月底ｅ今仔日
(2005.1.30)，才開始頭一bai ｅ山嶺踏跤行。
　　目的地－太極嶺．五城山，主辦單位－紅鷹山隊；這是兩工
前踮自由時報「週休登山活動表」得來ｅ消息，這兩工仔，攏總
51項登山活動，為怎樣會選嘸捌聽過名ｅ登山隊，嘸捌看過影ｅ
太極嶺．五城山？原因誠簡單，集合地點「新埔捷運站二號出口
」，離徛家上近。
　　即bai，招阿足陪我作陣爬山。因為我嘸甘一位少年查某囡仔　
，日也拚me也拚，為事業無閒走闖，使致身体拍歹，置做會到ｅ
坎站，我願意陪伊親近自然，爬山練跤力，身体若勇健，免驚趁
無食；透早六點，手機仔無接，真驚即回伊會予我放粉鳥，七點
跤兜，看著伊ｅ笑容，心肝卡定著；捷運站二號出口，一男一女
，兩位濟歲人，行偎給問，是紅鷹登山隊無錯，報到簽名，奧巴
桑陳金枝，拄好佮我差一字，連阿足算參落，阮三人齊姓陳；因
為奧里桑欲去別位活動，金枝奧巴桑單獨chua阮兩人去對面坐
245公車，向目的地起行。
　　土城德霖學院卡過，落245公車，一陣十外名，向金枝奧巴
桑拽手，看著阮兩個鉸報紙來參加ｅ菜鳥仔，逐家感覺誠稀奇，　
熱情歡迎；位枋橋來ｅ時，好天好勢，來到地，塗跤煞小可澹澹　
；鳳嬌姊仔誠好禮，提一張後季ｅ活動表予我，伊佮副隊長銘宗
兄是翁某，怹攏姓楊；沿山路向前行，行無五分鐘，來到觀音寺
，寺ｅ倒手爿，兩三港人造水沖(chiang5)，聽著水聲，心涼脾肚
開，水沖跤，一口小魚池仔，歸陣色彩艷麗ｅ鯉魚，相爭探頭參
阮相借問；厝裡五千金ｅ林桑，知影我讀廣播電視，講怹細漢查
某囝讀大眾傳播，現此時佮朋友合股開廣告公司，林桑做人誠伍
仁，愛講笑，踮伊身邊笑聲滿天。
　　今仔日，山頂濛濛霧霧，塗跤醬漉漉，對罕得爬山ｅ菜鳥仔
來講，路卡歹行淡薄，尚且阮穿ｅ只是普通布鞋，嘸是專業ｅ登
山鞋，一畷路加減出現驚險ｅ畫面；減采我卡好運，攏無拍缺角
著，欲去太極嶺ｅ中途，一步踏差，阿足滑倒置我面頭前，緊給
扶起，佳哉，衫褲和手糊著路糊糜，人無受傷，害我搐一趒！到
茲，林桑叫阿足給伊牽椆咧，免驚閣跋倒，順續教阮學毛蟹行路
，跤步踏互在，銘宗兄押隊綴後，保護阮ｅ安全；爬上太極嶺，
續來是五城山，好天時仔，茲ｅ景緻聽講真讚，即陣，霎霎仔雨
，罩濛ｅ山崙，帶有一款嬌媚ｅ体態。
　　煞尾，欲去山中湖，遐永過號作翡翠湖，路觀牌即時猶是峙
舊名；置雙叉路口，眾人參詳欲行佗一路？倒手爿卡近，大約十
五分鐘久，嘸過路滑歹行，正爿加誠好勢，但是愛步輦點外鐘才
會到位；最後決定省時間行近路，林桑拜託比伊卡勇跤、穿短ng
ｅ陳桑，chua阿足行即節，阿足捍陳桑ｅ肩胛頭，一步一步勻勻
仔行；十一點統，來到山中湖，路邊一座涼亭仔，逐家踮茲歇喘
食晝，有人僎滷味、有人焚水煮麵，食飽，和阿足去湖邊chan廳
門口埕唱卡拉OK；湖中鴛鴦水鴨伴相隨，毛毛小雨落綿綿，置光
景內面夯mai-kuh，拄好即世人頭一回；阿足唱「新不了情」、我
唱「愛到才知痛」、雙人合唱「屋頂」、續落我唱「你即馬好否
」、伊唱我ｅ招牌歌「秘密情人」、最後合唱「藝界人生」；阿
足今仔日喉韻真好，攏無走精，顛倒是我漏喟步盡展，唱到破聲
。
　　一點二十，接送專車準時起行，送阮到245公車總站，坐245
轉枋橋，車內，金枝奧巴桑、阿足佮我，偷時間小瞇一下，落車
，我問阿足：「後bai若閣招妳爬山，妳咁敢去？」「當然嘛敢！
」阿足笑笑仔應我。
　　紅鷹登山隊誠有人情味，不只仔照顧阮兩個；咱人正月初五
，阿足若位下港庄跤轉來，我欲招伊來去土城甘露寺，參加新春
團拜，時到，泛勢我會正式加入紅鷹，參各位先輩作伙行踏台灣
ｅ美麗山嶺。

－－2005.2.1 寫置枋橋街
　　2005.3.7《台灣教會公報》2767期