春天ｅ霧 講台語、寫台文，是飄撇台灣人天生自然的本領。 　

505愛的鼓勵 3訂閱站台

　　一月中，日光照遍大地，下港ｅ天無輸熱人，六個人兩台車位台南府城駛向檨仔ｅ故鄉玉井；因為三工後是好友俊州生日，耀乾兄提議由寫過《義戰礁吧哖》ｅ定邦兄chua路，做陣去走揣余清芳91冬前ｅ跤跡；對文學人來講，走揣歷史、建構文學比唱歌撓曲加誠有意義。
　　關係礁吧哖佮余清芳，我捌寫過一首台語詩＜檨仔樹跤講古＞，筆者化身阿土伯公仔，以講古ｅ方式、二三十畷詩行對三五個猴囡仔說出「礁吧哖事件」；事實上，「礁吧哖事件」閣號作「西來庵事件」，是台灣抗日史上規模上大、死傷上濟ｅ革命行動；1915年10月底，台灣總督安東貞美下令設ｅ臨時法庭，對1957名嫌犯判決終結，余清芳、羅俊、蘇有志等866人被判死刑，另外453人被判九冬到十五冬不等ｅ有期徒刑，即件代誌嘸那轟動全世界，連日本國會嘛認為違反人道來議論紛紛。
　　自古以來，革命失敗犯ｅ是宰頭罪，咁講余清芳佮濟濟台灣人嘸捌即個道理？欲提家己ｅ身命窘笑！當然嘸是，外來政權殘酷ｅ統治，定著會造成「官逼民反」，這是千古不變ｅ道理。
　　余清芳ｅ跤跡踏遍西來庵、甲仙埔、曾文溪、礁吧哖，最後造成礁吧哖五千外個住民互日本軍宰甲臭青荒，八月ｅ菅芒花置風中唱著礁吧哖哀歌。
　　歷史ｅ底片閣向前絞轉去194冬前，置羅漢門(高雄縣內門鄉)鴨母寮飼鴨、人稱「鴨母王」ｅ朱一貴，踮大清帝國ｅ天年舞一齣三十萬人ｅ革命大戲，短短十外工佔領台灣已開發地區，康熙皇帝差一屑仔著驚搐青屎；朱一貴發動驚天動地ｅ全島大革命，嘸過歷史ｅ記錄真缺欠，民間傳說往往加添一層神怪ｅ色彩，使致朱一貴ｅ真面目互濛煙散霧罩椆咧，這嘛互文學、藝術工作者閣卡大ｅ創作空間。
　　舊年中，民視「台灣奇案」節目，以朱一貴做主角，參考濟濟資料改編一齣「媽祖劫」，連搬幾仔月日，引起我ｅ趣味；11月12，落南揣阿榮蹉跎，特別拜託伊即回定著愛chua我去羅漢門走揣鴨母王ｅ跤跡，伊將羅漢門ｅ行程改隔轉工，先chua我斡去路竹參訪寧靖王廟佮三級古蹟寧靖王墓，了後經過茄萣仔，下晡踅去台南大天后宮佮五妃廟參觀，互我即個掠台南做第三故鄉ｅ人，開眼界踏入在地文化。
　　朱一貴的確是大英雄，有領袖ｅ身命，若無，伊哪有才調一枝竹竿喝鴨仔成群結隊，若無，伊欲安怎互三十萬大軍像絞螺仔風橫掃遍野；可嘆！英雄氣短，三十三歲ｅ朱一貴置溝仔尾被活掠，夆押上北京城千刀萬割；雖罔「台灣奇案」為欲製造戲劇效果，安排朱一貴ｅ尾梢夆五馬分屍，就義進前喝出「台灣人萬歲！」ｅ滄涼尾聲；嘸過我相信，設使285冬前朱一貴chua領全台三分一人口ｅ革命成功，泛勢台灣建國會早美國半世紀，台灣人世世代代免受強權恐嚇、凌遲，唱太平歌、過太平年。
　　台灣島嶼自本美麗，鹿仔遍野、嫷花歸山坪！是安怎會受魔鬼咒懺，愛受外邦統治數百年，到旦猶無法度翻身！
　　發生置將近一甲子前，1947春天雨水滴ｅ二二八事變，成作台灣人心肝穎仔永遠ｅ傷痕，年年月月，台灣ｅ序大千交待萬吩咐序細愛有耳無嘴，受難者ｅ後代往往嘸知被掩嵌ｅ不幸，有ｅ歸世人暝暝惡夢纏綴，夢見老父被不明人士押走ｅ暗夜身影；算袂清ｅ冤魂若嘸是被就地槍殺，凊采埋置荒郊野外，就是跤手夆貫鐵線，搡落海底飼鯊魚；母土台灣ｅ心慒互利劍劍ｅ凶刀，鑿甲血流血滴，一甲子過去，孔嘴雖罔逗逗堅疕，療傷治疼ｅ過程卻是會好袂完全。
　　減采「二二八事變」ｅ年代參「鴨母王起義」、「礁吧哖事件」比併，佮咱卡偎近，加上1920年代以來新文學運動ｅ影響，所致文學創作ｅ量加誠濟，特別是小說部份，華文短篇小說牽連著二二八ｅ不計其數，甚至小說大師李喬寫出七十外萬字ｅ大河小說《埋冤一九四七埋冤》；母語文學方面，黃連寫出將近三十萬字ｅ台語長篇小說《愛恨一線牽》(1998年10月綠川出版)，胡長松集八篇二二八ｅ台語短篇小說合做《槍聲》(2005年10月前衛出版)一冊，即兩本小說集誠拄好攏以高雄地區做背景，描寫彼個時代受難者和小百姓ｅ生活面貌佮真相，成作開路先鋒。
　　「鴨母王起義」、「礁吧哖事件」、「二二八事變」，猶閣有台灣歷史上濟濟官逼民反ｅ故事，攏需要咱以文學ｅ筆將怹記錄落來，這是形塑台灣人ｅ民族記智佮集体經驗，上好ｅ一帖藥方。

－－2006.1.22寫置枋橋街