昨暗，雨水滴歸暝，窗外雨水好親像咧奏小夜曲，嘀嘀嗒嗒．．．；夜半兩點，一個人，倒置雙人枕頭膨床頂，茲呢庶是ｅ客房，一時煞來睏袂去。
因為耀乾兄致蔭，才有即款好機緣，接受李森琳老師熱情ｅ招待，蹛踮伊經營ｅ民宿內底；過年時仔，上好趁錢ｅ時機，李老師無對外開放，顛倒免費招待朋友，位茲，看會出來伊無半點生理喟口；汝若知影，一個瑞芳高工退休ｅ物理老師，過年前才拄仔參加「南鯤鯓台語文學營」，逐禮拜閣置「黃金博物館」做志工，便感受著伊ｅ人文素養。
昨昏早仔，猶未十點已經來到「石牌仔捷運站」，偎近十點半，徛置路口，看著耀乾兄手伸出車窗，向我熱情拽手，車後座坐嫂仔Demi，Angel佮Lily兩姊妹仔；這是頭擺參怹歸家口仔作陣出外蹉跎，真幸福！欲去即畷目標地--九份仔進前，先來去深坑老街仔繞(lau)繞咧，順續食中晝；常再聽人講深坑仔豆腐偌好食，嘸過，無機會踮茲停跤，今仔日有口福，揀即間人氣上旺ｅ「大樹下」餐廳，五個人分享四款美味ｅ豆腐餐。
食飽，上高速公路，過免收費ｅ「汐止收費站」，無偌久，落高速公路，車勻勻仔駛向瑞芳彼角勢，車窗外落霎霎仔雨，沿路塞車；路裡，提起欲將「八田與一」ｅ故事寫做小說，耀乾兄聽講鹽分地帶作家黃崇雄，宛那有即款計劃，嫂仔替我讚聲；我想，愈濟人寫「八田與一」意義愈大，無仝風格、無仝手路、無仝語言，營造出無仝ｅ文學光景，我嘸驚挑戰！無定，下回落去台南，好友招招咧，來去烏山頭水庫，向「八田與一」翁某致意。
雨，落無停；車，一直塞；往瑞芳ｅ車陣，假若袂振袂動ｅ溪河；李老師手機仔哠哠敲，耀乾兄han-dor-luh紡袂行；攢(nng3)過兩座磅孔，離磅孔口三、四百公尺，李老師ｅ車咧熾雙黃燈；兩車會齊，李老師予阮一張通行證，置過年時仔，交通管制ｅ流擺，阮才會凍傍伊ｅ福氣，作伙去參觀「黃金博物館」；欲去「黃金博物館」路裡，彎彎斡斡，袂輸新店往宜蘭ｅ「九彎十八斡」，嫂仔講「九彎十八斡」猶輸茲忝忝，我看，用「十彎二十斡」來形容，一點仔都無超過。
經過彎來斡去ｅ山路，下晡點外，阮六個人來到徛踮金瓜石ｅ「黃金博物」；雨，猶落無過癮，雨水滴落黃金城，一陣大過一陣；入去參觀「黃金博物館」進前，李老師代先chua7阮看邊仔彼間「太子賓館」，賓館1922年起好勢，已經八十外冬ｅ歷史，論真講起來，日本人做代誌誠頂真，起即間賓館考慮山勢，置無偎坑坎即爿頭到，是警衛仔蹛ｅ所在，保護太子ｅ安全，邊仔是下跤手人ｅ房間，卡偎內底，才是太子參太子娘ｅ睏房佮冊房；賓館有設射箭場和高爾夫場，看歸晡久，才發現原來佮咱心目中ｅ印象差真濟，茲無歸遍ｅ草埔，只有簡單紅毛塗硿ｅ場地，專門予太子家族蹉跎使用。
行入舊年11月開放ｅ「黃金博物館」，每禮拜二置茲做解說志工ｅ李老師，即擺擔任阮五個人ｅ專任講師，一項啊一項逗逗仔解說予阮聽；行無十分鐘，人愈偎愈濟，愈綴愈大陣，實在無法度隨項啊隨項導覽，李老師只好揀重點講予阮聽；即畷入館參觀，我印象卡深ｅ有--鍊金仔ｅ傢俬佮技術；無人會凍用一枝手徙離桌面ｅ12公斤梯形金仔角；逐家相爭歙像紀念ｅ220.3公斤大塊金仔角；上界奇巧是藝術家用金仔雕出523隻無仝形体、無平大細ｅ蚼蟻，汝若在場，恐驚會呵咾甲觸舌；看著當時挖金仔工人，頭殼頂戴ｅ頭燈，食中晝紮ｅ四角鐵便當盒仔，引我想起十三冬前ｅ熱天。
藝專一年升二年歇熱，有兩個月時間，我咧做搬戲無台詞ｅ臨時演員；有一暫仔，相連續為電影「無言的山丘」出外景，逐早五點半置華視門口集合，坐遊覽車去金瓜石拍戲現場，身穿日本時代挖金仔工人ｅ粗布衫，跤踏澹澹溼溼ｅ草鞋，布巾包四角鐵便當盒仔綁置身軀頂，額頭戴一粒頭燈；即款裝扮，離開演藝界了後，只有置「無言的山丘」影片內面，才看會著。
行出「黃金博物館」，欲暗五點，無金黃色日頭落山ｅ畫面，澹溼ｅ空氣中，干單六枝雨傘下底，予雨噴甲澹漉漉ｅ人影；轉到李老師ｅ民宿，師母早就僎便便等阮，一碗燒燙燙ｅ芋圓、一甌燒滾滾ｅ茶米茶，溫暖雨水沃歸下晡ｅ心；耀乾兄紮一罐好酒、兩項永康土產做伴手禮，我提兩本薄冊相送，予李老師閒時罔挽詩花；暗時，李老師翁某有代誌先離開，將暫停營業ｅ民宿，交待耀乾兄發落；七點統仔，我佮耀乾兄和Angel、Lily，作陣行落基山街食暗頓，即條九份仔上鬧熱ｅ街路，置落雨天ｅ暗頭仔，雖罔無人揳人，嘸過，新正年頭按算踮茲過暝ｅ出外人，猶是用熱情點灼暗sam3暗sam3 ｅ路燈；八點外，耀乾兄佮我食煞雜菜丸仔湯，綰一袋仝款ｅ點心，轉來予留踮民宿替Lily吹焦牛仔褲ｅ大嫂止飢；兩個查某囡仔，踅街到九點半雙手空空轉來；我佮耀乾兄置大廳飲茶、喫瓜子，開講到十一點才回房歇睏。
天光早，天無光，雨猶原無時停；透過雨霧ｅ樓窗，干單看著三十公尺內ｅ物件；倒手爿一棟樓仔厝，正手爿一間低厝仔，面頭前一欉老樹頭，偆ｅ歸遍罩濛；八點統，置民宿門喙，向耀乾兄一家四人拽手say good-bye，怹欲爬崎上車往宜蘭蹉跎；我落崎經過「九份小學」頭前石階跤，攢過基山街欲坐巴士，初四早，店開無幾間，遊客無幾人出來食早頓；行出基山街，去對面等車，量約十五分鐘坐上「基隆客運」。
巴士落崎，往瑞芳車頭，車內我想起昨昏下晡李老師講ｅ一段話；伊講「金瓜石」永過號做「九份仔」，「九份仔」卡早叫做「更寮跤」，「更寮跤」就置現此時「九份仔」山跤；我頭擺聽著即種故典，咁有影！
－－2005.2.20 寫置枋橋街
2005.5《海翁台語文學》第41期
文章定位：
