空中瑜珈好好玩!鍛鍊核... 外資:台灣最好的5檔股票平價高CP義大利麵!好幸福 連靜雯家中債務一肩扛 ...
2011-08-23 07:14:13 | 人氣(2,187) | 回應(1) | 上一篇 | 下一篇

青春愛戀的柔美情詩

推薦 0 收藏 0 轉貼0 訂閱站台

──讀陳潔民台語詩集《行入你的畫框》

 

  19989月發表佇《島鄉台語文學》第5號的〈目屎的屈勢〉了後,開始正式投入台語詩創作的陳潔民,12冬後(20109月)才出版伊的頭一本台語詩集《行入你的畫框》(彰化縣文化局)。這款寫作一紀年才出版頭一本冊的謙卑修為,減采佮伊宗教修持與世無爭的態度有誠大的牽連。《行入你的畫框》收錄67首詩作,作者共分做「行入你的畫框」、「夜雨新北投」、「誰是你永遠的夢」、「茶古內的鄉愁」、「夜半孤燈」、「我佇荒原寫詩」等六輯。其中,頭前三輯33首一半跤兜的詩作,主要是書寫愛情詩,會當講是這本詩集的主體,嘛是筆者個人認為陳潔民到目前為止,寫了上界優質的次文類。

  咱代先來看這本詩集內面上早發表的〈目屎的屈勢〉,作者佇26畷的詩行裡,一韻押到底。這款書寫方式佮袂少台語詩人初出江湖所展現的手路相像,這款普遍的現象,減采是受台語歌詞傳統押韻佮豐富音樂性的影響。事實上,台語詩的讀者定定攏有一個疑問,到底台語詩敢愛押韻?其實,欲判斷一首詩的好bái,有真濟種條件,親像這首詩的意象、結構、修辭等,毋是干單看伊敢有押韻,就來判斷這首詩是毋是好詩?Ùi〈目屎的屈勢〉的詩行裡,讀會出來作者徛佇男性的角度,寫出一位古意、頇慢表達家己的查甫囡仔,面對佮愛人仔分手的無奈佮委屈。詩的頭一葩,作者就展現出伊的詩才:「看著你兩蕊目睭露出深深的怨慼兩條春天的山溪用一種未反悔的屈勢對你雪赫呢仔白的喙phé洶洶湍流過」,其中,第三畷以「兩條春天的山溪」來明喻「查某囡仔的目屎」,是規首詩上界特出的手路,嘛共這首詩寫甲活靈靈。

     20016月發表的主題詩〈行入你的畫框〉(《台灣日報》副刊),是一首相當優質的愛情詩,捌前後入選《台語詩新人選》(2003,真平)佮《台語詩一世紀》(2006,前衛),詩的全文如下:

 

   有一個人∕行入你的畫框∕淡水的美景∕佮伊的形影∕攏畫佇捷運的大車窗∕作伙浮現眼前∕美麗色彩,抹出畫中的人生

 

   淡水河邊看過去∕紅樹林是伊∕扭未斷的相思∕密密啊生滿水邊∕關渡的朱紅大橋∕像伊的心情輕輕飛起∕翩翩伸向對岸∕卜去看你

 

   彼一日,淡水河的∕水色清清,大屯山的∕山風冷冷,觀音山的∕眉目亭亭,大眾捷運的∕路線明明∕直直駛入你的畫框∕互日日夜夜的相思∕延長,閣延長

 

   你一定知影∕有一個人∕想卜牽你的手∕相依相伴∕行佇淡水街頂∕亦行入你心內∕的畫框

 

  讀頂面這四葩詩行,的確袂輸咧欣賞一幅畫仝款。這首詩無論佇結構、意象抑是修辭各方面,攏有水準以上的表現。咱來看伊的結構:頭一葩ùi有一個人∕行入你的畫框」起鼓,引出「淡水的美景∕佮伊的形影」;第二、三葩將「淡水河」、「紅樹林」、「關渡大橋」、「大屯山」、「觀音山」遮的場景攏囥入愛的畫框;尾葩寫出作者真心的向望「想卜牽你的手∕相依相伴」,毋那欲「行佇淡水街頂」,閣較欲「行入你心內∕的畫框」。規首詩共看落來,有符合「頭」、「腰」、「尾」詩的結構、鋪排。「關渡的朱紅大橋∕像伊的心情輕輕飛起∕翩翩伸向對岸∕卜去看你」,是規首詩裡上界突出的意象。作者運用關渡大橋跨越淡水河兩岸的特性,予伊成做牽連愛人仔情意的橋樑,這座橋樑會當予伊的心情「輕輕飛起∕翩翩伸向對岸」,去佮愛人仔相會。關渡大橋「朱紅」的色緻,明顯點出作者喜樂的心靈狀態。佇修辭頂面,有「紅樹林是伊∕扭未斷的相思」的暗喻;有「關渡的朱紅大橋∕像伊的心情輕輕飛起」的明喻;有「水色清清,大屯山的∕山風冷冷,觀音山的∕眉目亭亭,大眾捷運的∕路線明明」的排比手路;其中,「清清」、「冷冷」、「亭亭」、「明明」毋那疊字閣兼押韻,加強詩的聲韻美,確是高招。

  浪漫的詩人定定攏會共春天佮愛情摻作伙,成做一首閣一首青春氣味的戀歌。陳潔民的〈春天未記得來〉、〈你是我的春天〉、〈春天的風吹〉三首,直接共「春天」戴踮詩題頂頭,講出伊的青春愛戀。其中,〈春天未記得來〉特別展現出「詩情畫意」的浪漫情懷。這首詩的第一葩頭一句按呢寫:「楓仔葉落成一座金紅色的墓」,這款頭一句就將詩寫做彩色畫面的高段手路,會當吸引讀者看著頭一句就想欲續接讀落去,續落來,第二、三、四葩的頭一句,作者運用相像的手路鋪排:「紅葉飛舞滿天」、「金色日頭沈落的時」、「春天青綠的翅」。講到遮,讀者干單看著每一葩開頭的畫面,下底筆者將規幅圖的意象較完整共呈現出來。第一葩開頭點出「楓仔葉落成一座金紅色的墓」,詩人講「一欉欉的楓仔樹∕就是一座座愛情的墓牌∕秋風佇怹身軀寫字∕一字字寫來,攏是相思」,楓仔樹佮楓仔葉本底就成做秋天的象徵,加上秋風、墓牌的意象,予這段相思加添淒美的感覺。第二葩開頭「紅葉飛舞滿天」,續接使用明喻「親像穿著紅紗洋裝的仙女」,予規個意象活骨起來,續落來,雄雄轉化「青山隱居佇白雲深深的所在∕伊是一位入定的老師父∕拄咧坐禪閉關∕一時無卜出來」,共青山暗喻做一位坐禪入定的老師父,形容甲不止仔鬥搭。第三葩以「金色日頭沈落的時」開頭,帶出詩人「心內寂寞佮稀微」,這個時陣「暮色滿山,有候鳥飛過窗外」,總是會「帶來一陣涼涼的秋意」。第四葩干單兩句,「春天青綠的翅∕早就飛離咱的天」,為這段相思、愛意譜出休止符。煞尾兩葩,詩人徛佇第二人稱的觀點講伊欲「開始寫詩∕用詩,去叫醒∕睏甲未記的春天」,設使春天袂記得來,伊會寫一首詩「拜託郵差去揣伊」。規首〈春天未記得來〉讀煞,雖然予人感受一段無完滿愛情的遺憾,不而過,因為作者心境轉換,到尾顛倒會當啖著一嘴薄薄的酸甘甜。

  〈問你〉(2010.7,《台文戰線》)是規本詩集內面,上新發表的情詩。陳潔民佇創作資歷粒積一紀年了後,這首近期的詩作閣倒轉去〈目屎的屈勢〉押韻的模式,不而過,手路加誠輕柔。咱來讀頭前三葩:「白雲∕問藍色的天∕自由的意義∕∕落葉∕問湍流的水∕流浪啥滋味∕∕蝴蝶∕問艷麗的玫瑰∕青春偌可貴」;頭前三葩以物代人設問,真正的目的是欲牽引出第四葩「若是我∕卜問你∕心內咁有位∕通囥阮的心」;續落來,第五葩作者用自問自答的方式寫出「薰衣草的芳氣∕猶原飄佇鬢邊∕溫柔的手心∕咁猶留有記持?∕多情的眼神∕咁捌收藏珠淚?」事實上,作者早就體悟著青春緊早慢攏會老去的真理,所以,伊將變幻無定的愛情看開,所以,伊用參透禪機的心,將這首情詩同時化身做哲理詩,咱ùi最後一葩「流浪者∕問永遠不回頭的時間∕為啥物∕追未著你?」就thìng好看出來伊的禪味。

  〈夜雨新北投〉是《行入你的畫框》規本詩集內底,筆者不止仔偏愛的一首愛情詩。佇這首58畷的詩裡,作者除了愛情以外,閣將濟濟元素囥落一鼎,經過伊巧妙的技藝,成做一首優質的愛情詩佮地誌詩。咱共看,內底有自然界的「雨」、「霧」、「溫泉溪」、「山茶花」、「金桂」、「樹林」、「山溝」、「天星」;人文界的「雨傘」、「普濟寺」、「石梯」、「涼亭」、「香爐」、「路燈」、「石欄杆」;頂面遮的豐富、多彩的元素透濫視覺、嗅覺,成做一首生動、唯美的好詩。最後,筆者佇遮無欲加話評論,原原本本將規首〈夜雨新北投〉呈現出來,予讀者家己去體會伊的媠到底佇佗位?成做這篇詩評的收束:

 

   冰冷的雨,趁著夜色

   罩落來

   佇新北投的天頂

    飛

 

   天氣冷到若冰

   哈出的氣

   霧茫茫的

    白

 

   一支雨傘

   佇新北投的

   街路

    散步

 

   路兩爿

   潽出嗆鼻的硫磺味

   溫泉溪,純純

    流過心底

 

   普濟寺頭前

   一級一級爬

   彎彎的石梯

   像曲折的心

    幽暗不明

 

   叨位來的芳味?

   是涼亭跤

   地藏王菩薩的香爐?

   抑是暗時的山茶花

    恬恬仔開?

 

   我想,是心內那欉金桂

   伊的花魂,提醒咱

    深深的戀夢

 

   行落石梯

   越頭看去

   路燈光輝清冷

   樹林翠綠,石梯烏潽相映

    一款趣味佇眼前

 

   一切咁會當佇遮停?

   無常感為啥物

    位心頭生?

 

   牽手落山

   沿路的硫磺氣

    猶原佇空氣中喘氣

 

   你伸手去試

   山溝內流泉的溫度

   猶原燒燒

    小雨猶原咧落

 

   即擺的相見

   假若卜將過去

   毋捌有的經驗

    一擺補淀

 

   石欄杆邊

   咱和石頭共款

    不言不語

 

   送我到門口

   最後一眼看你

   毋知影明仔哉

    咁會閣相見?

 

   新北投的夜雨

   親像消失的天星

    一時恬戚戚

 

──2011.2.7寫佇赤崁南門仔

    2011.8.15《笠詩刊》284

 

台長: wagi-sun
人氣(2,187) | 回應(1)| 推薦 (0)| 收藏 (0)| 轉寄
全站分類: 圖文創作(詩詞、散文、小說、懷舊、插畫) | 個人分類: 文學評論 |
此分類上一篇:台灣人無罪

吳瑞鴻
能否加入台語聲音,
文詞意境加入吟唱朗讀之CD,
會更佳。
期待著。
2014-06-24 13:30:27
我要回應
是 (若未登入"個人新聞台帳號"則看不到回覆唷!)
* 請輸入識別碼:
請輸入圖片中算式的結果(可能為0) 
(有*為必填)
TOP
詳全文