「阮阿公啊欲啊死啊有啊交代哦～～～迄個臭啊khi7仔就毋thang提(theh8 )來拜～～」Chin2是teh搬to2一齣戲劇？啥mih koh是臭khi7仔咧？臭khi7仔袂tang3上廳頭？就毋是袂出嫁的姑婆koh！
這段是現實人生的戲文啦，恁聽我慢慢唸來恁就知。
迄工阮阿公做忌 阮爹想著就咽氣
在生袂赴iu2孝伊 伊就車禍來相辭
pe7囝短短十外年 是伊這世無福氣
看我chhoa7某生囝兒 享受天倫好日子
在生無kah一粒豆 毋是囝兒我不孝
也毋是我無chai5-tiau7 迄chun7我猶koh年少
than3錢萬項攏袂曉 chin2時我khah than3有食
雖然毋是大好giah8 總是有siu7 thang好徛(khia7)
三牲四果來答謝 答謝養育ka7我成(chiaN5)
有一項tai7愛汝知 恁孫空kham2不應該
臭賤水果上廳台原諒伊是「E世代」 「LKK」的tai7-chi3伊毋知～～
Sioh歇一下(e7)，哈(ha )一嘴仔茶咧！講(kang2 )chiah kin2 koh袂跳針，ka7我講kah無一te3 thang好。無人教我是欲會知彼是臭賤mih哦？「E世代」講「不知道的沒有罪啊」，「LKK」kam2毋捌聽過？
雖罔外表紅koh水(sui2) 人人講伊臭賤mih
愛ui3生長來講起 生性本是臭賤命
無人成養kong3-kong3大 一phu5屎放落塗跤
替伊掖種佮生湠 毋免經過兩冬外
春iN2也會變粗芽(ga5) 毋是我咧話bangkah
汝若毋信汝試看 一粒汝ka7食落肚
屎請汝ka7放落塗 毋免三年的路途 恁tau全家有thang哺(pou7)～～
Phui3-phui3-phui3,thai2–ko兼la3-sap鬼，遐呢iau鬼食欲死。
臭就臭佇chia哦！無人伊紅水烏大扮，joa7體面咧，koh嫌人臭賤？原來是歹出世哦。人講做雞做鳥無了時；後世出世大厝人囝兒。偏偏伊就歹命兒，sian出世人攏叫伊臭khi7～～
歹勢歹勢koh歹勢，我是「E世代」，歌仔冊唸袂來。用我的氣口講話khah袂害。
莫怪人人叫伊是臭khi7仔哦，ui3進口到出口伊的子攏袂消化，古早人野外排解一下，伊就koh會生湠囉。Che就是柑仔蜜的命啦！
柑仔蜜？臭khi7仔？嘿～天差咧地咧。蜜neh,蜜joa7甜咧neh?Na2會伊叫臭khi7仔koh叫柑仔蜜咧？
有影伊tioh8酸酸甜甜kai3好食啊，袂輸柑仔chham蜜。而chhiaN汝毋thang 看伊衰bai2 neh,最近伊是真hittou哦。電視ka7拍開一看，哦～～攏是伊的天下。一堆電視明星替伊背書掛保證，好飲koh有效毋驚恁比較(毋知有記毋tioh 無？)
今年阿公做忌，公媽廳猶原chhe-chhau滿桌墘。彼是啥？除了十胡仔牌、bih-lu3、新樂園，迄罐紅ki3-ki3的血水是拜啥意思的？十胡仔牌、bih-lu3、新樂園，恁聽起來是趣味趣味，我是無啥希奇，逐年嘛愛chhoan5一味，若無是poah8會無杯，chhan5-chhan5看伊thui,阮是流noa7兼iau-ki。問題是，迄罐是啥？
阮爹講伊嘛真怪奇。Chang暝阮公來托夢，獨獨欲愛的就是迄項－－柑仔蜜汁。
我問阿爹是安怎？伊講伊嘛毋知影？可能tiaN7-tiaN7大魚大肉，想欲有菜kah?可能天頂有電視，恁公仔有看見，想欲試滋味？
啊伊毋是講臭賤mih袂sai2拜？阮爹講：「伊講加工過的不chhiang5-chai7。無拜杯毋來！」
我講：「阿公也想欲做『體內環保啦！』」
阮爹講：「英雄毋驚出身ke7。時機若到，黃袍加身做皇帝！」
文章定位：
