踏頭話
自我雙跤踏離開媽宮(馬公)的土地，文明閣再離我愈來愈遠。這是這兩日來第二遍有這種心情uì心芛流瀉。頭擺是我飛離台灣，雲佮我愈親，文明世界針黹的網路愈退後。Tsiáng時坐佇船頂，海湧píng來湧去，將我tshik入1座予人棄捨的島嶼，彼個人teh講的移民天堂—白沙鄉，大倉。
傳說
自早，tsia是澎湖人交易的所在。而且時常有海賊佇tsia出入行踏，sù-siông有珍貴奇巧的寶物寄草佇tsia，這個寶物倉庫就予人叫做大倉。
另外1個講法是先民陳盛自通梁搬徙來本島發覺環境衛生袂bái，蠓蟲真少。而且海洋資源真濟ná像大魚倉，所以叫做大倉。這個傳說佮島民tsín時的生活形體較親像。
因為島上種做的土地有限閣再加上uá海，土地的鹽份帶真重。植物的生長真僫。島民uá海食海。揣海討食，將大片的海成做in上珍貴的田園。1年1年，1代傳1世。只是......管伊汗按怎流，日袂出做kah日落海。這座島嶼漸漸沬落去文明的水湧。
地理環境
大倉島屬佇澎湖內海，佮西嶼白沙、馬宮3島嶼四面攬咧。Chia的人號伊是內海之珠。Tsia四摳圍仔的海岸平坡，水向的時海埔曠闊，大型的石滬是tsia的先民留落來特殊的地理奇觀佮文化資產，也是怹tsia人文生活的印記。講做石滬是有較風譀，島民是用咾咕石峙做石頭墩，聽候水入的時tsah來魚群。心適無！這比咱文明社會khap袂著就用粗魯的方式，像電魚，毒魚來對待海洋閣較高明，甚至是閣較文明的方式。做1個陷阱，欲來boáit hài，願者上勾。水氣！
離開馬宮的後窟潭佇澎湖灣píng來湧去，馬宮愈細大倉碼頭勻勻仔展大。一直到船停佇碼頭邊，碼頭誠細。Ná像仳仔漢的少年囡仔栽。這是我第一印象。上島了後kuì欉仔南洋杉仔，杉仔跤kuì個仔島民親切對阮講兩句仔，然後繼續怹的酒攤。我問怹：「Teh秋凊哦，無出海哦？」面仔烏趖的大哥講猶未咧，小捲仔閣teh歇睏。盈暗才來佮怹tshit-thô。
生活面貌
濫摻pué會suah，阮行入定好的板仔厝。無偌久，船長阿ní-kí攢蘆薈欲來予阮退hông。實在是澎湖的日頭咬人過頭，阮1個失注意曝kah白劉備變做紅關公烏張飛。
船長阿ní-kí講這蘆薈照巡仔抹，liâm-pinn皮膚就袂疼呀。伊講澎湖島一粒仔kiánn，往過無海水淡化廠的時水攏嘛愛靠軍艦uì台灣載來。若無利用在地天然資源，生活真歹過。Ah若再離島的大倉更加是按呢。民國64年，阮開始想辦法發電，一直到海底電纜接通阮tsia才有thang 電火牽電線，日落到日上岸。阿ní-kí講毋是伊損斷，伊講這是伊心肝頭風花的反叛，樂暢爽快家己一直到台電的數單寄到厝為止。
伊閣先托頭予阮知，枋仔厝是無有線電視予阮啖糝消磨量上的時間。實在是了錢的生理無人欲做，檢采澎湖阿婆袂顧咧炊粿tsit。
阮看阿ní-kí手內瘍瘍糊糊的蘆薈淡薄仔梟疑。阿ní-kí講臭頭厚藥lah，毋thang看tsia個物仔無點。阮tsia所有的物仔攏嘛有伊的用途。蘆薈治炎日，搭壁蓮(三角仙人掌)做冰，耐旱耐鹽，瘦地出產的風茹是阮澎湖人的草仔茶，食退火的。阮tsia唯一量上的是時間。
有影，上岸到tann tsia的島民予人的感覺就是慢。烏面趖的大哥、踞踮已經予芙榕侵佔攲倒的牆khue 跤teh suh薰的少年家。我想tse檢采是怹對世俗的一種無耐抑是一種tháu脫。凡勢是怹討海人的生活態度，踏佇紮腹的土地顛倒予怹感覺眩船。聽候出海佮海湧拚輸贏，怹血內的鬥志tng teh滾絞。
我行著勻仔是的跤逝來到碼頭，這時的日頭有較殮手啊。徛佇岸邊看uì遠遠的日鬚，透著淡淡鹹siam海風。尻脊的疼凡勢是蘆薈藥氣teh行，檢采是黃昏的美景使人心醉，茫茫袂記得炎日對阮的ng-chhng。
這時的碼頭漸漸鬧熱。雖然毋是譀古kah挨挨陣陣，隨個漁民攏開始無閑tshih-tshih，準備盈暗的拚注。捕魚網的、修理船的，也有徛佇岸邊釣石狗公的。小島唐突間phin-phin-phong-phong將我酒醉的心拍精神。我看向來時的路。應該講是來時的海。一隻魚船tauh-tauh仔駛入碼頭。聽候船停睏好勢，kuì個囡仔冊揹仔托佇頭殼頂，ná落船ná唸船過水留痕，留佇怹的冊揹仔頂。
汝看，隨個仔隨個偌風摔摔咧。坐船上課，uì台灣頭到台灣尾毋攏捌聽過。檢采我詼諧的呵咾減輕生份人的身份，囡仔袂顧之碼頭岸青苔光滑，跳落船了後袂顧之澹糊的冊揹仔，大聲問我欲去國校仔挖寶無？
真久。我聽見人teh叫，毋kú伊的腔口ná怪怪。少年的。伊閣uì我tsia拽手ná咻我才確定伊teh叫我。原來是阿ní-kí的牽手，伊咻我趕緊來福利站食糜。阿ní-kí早就碗捧咧毋知扒幾碗公去啊。啊若我？我tng teh臭腥荒的校園佮一陣囡仔栽踮âm貓。
來來來，阮柴把這味的恁台灣食無的，尊照古法做的，吞落汝就知。
討海人就是按呢，面對的是無邊的大海，講話嘛tuè咧膨大海。一直到我嘛tuè咧將海產糜吞落肚，彼種拜服之情uì我腸肚tìnn瀉。絕對毋是放屁歕風，嫂仔的手藝一流，阿ní-kí的「吞」字更加使人感服。
講是古早味，其實食材的原味就是咱挂佇嘴邊的山珍海味。石蚵的青甜，石狗公的幼綿，魩仔脯佮金猴蝦的芳氣，有青才敢講是好味，好味才敢提來佮朋友相鼻。嫂仔講佮偌臭揚咧，連鹽公司出產的阮都無交關。攏是在地的滋味，石蚵透早才去拾的，石狗公是後山海坪家己飼的。後山光生的海坪算是上天賜予tsia的島民的田園，島民用竹篙插佇海裡，牽魚網掠魚。做山有一半，做海攏無看。佮海討趁佮博kiáu無tsing差，運氣運氣。一時風駛一時船，世間無穩輸，無包嬴。總是趁一嘴飯thang食，其他交互天啦。
阿ní-kí佮嫂仔講怹tsia的人掠魚佔多數，啊若怹兩個翁仔某掠的是阮這陣uì天頂飛落來的魚。檢采有阮這陣魚群來tsia行踏，若無這座島更加稀微。
飯煞，我沿島上的紅毛塗路散步。我想。若毋是稀微，這座島kám猶是保留著tsín時的景緻？沿路行去，經過一間廢灰去的破厝間了後一個細細的郵筒掛佇壁頂。Tsia是全島唯一的柑仔店。手銃的猴囡仔飆來飆去。看我行來，草丑仔性對我講這間店仔欲愛啥就無啥！顧店的老人講tsia個囡仔外口世面看siunn濟，古早的物仔涎袂過予文明晟養過的嘴。我對老頭家講ná會，佮7-11比起來，愛啥有影無啥。但是我佇tsia含著向時的記持，飲著囡仔時的氣味。只是，老人彼句外口的世面看siunn濟ân-ân tau佇我心ínn。檢采是老大人對這囡仔栽的毋甘？凡勢是對文明文化衝擊的無奈。抑是對無平等對待的憤慨。
直咾噪的教育路
彼暝，小島已經入眠。我the佇渡假村的涼亭跤。黃昏，國校大門前的忠心菊猶是死忠看顧著拋荒的運動埕的情景致使我孤單清醒。紅花猶原伸長孤獨的枝骨等待學生囡仔走飆的笑聲。
大倉，這座珍珠美麗的島嶼承接袂tiâu文明世界湧股的衝擊，人口漸漸搬徙。Tsín時的大倉號叫老人島，囡仔島凡勢閣較uá意。島上差不多半kah加是外籍新婦，汝thang瞭解大倉查埔人想欲揣牽手的困境。所以這個所在人人teh講是移民天堂。只是這個天堂ná像無神的看顧。
佇漁村裡，翁某算是一對手。某hōann船頭翁拋網，兩人共心拍拚。毋kú世事就無thang遐呢照人意，用錢銀起起來的愛情臭銅癬味帶真重嘛無的確。閣再加上無俗的生活，想厝的心悶，理想婚姻的精差，tuà會tiâu的外籍新婦咱有影袂使支厘咱的噗仔聲，予怹上大的安慰。總是，猶是有kham袂tiâu的，破碎的家庭。閣者，三頓就袂顧得thang飽佮海teh車拚，ná有閑工看顧囡仔教育的問題。就算媽媽有心，也就tuè咧學起。就算媽媽存心欲學，這條路直咾噪。這條路有強烈無情的東北季風khau削，這條路有iap著無限險惡的海水，這條路有外口世界精tsuah的眼光。
2005年，大倉國民學校因為學生無夠額正式行入歷史。出擢的獨木船畢業展禮也因為按呢來絕嗣，無才調生湠。大倉的教育資源正式停站，只tshun拋荒的校園留予島民淡薄仔安慰，留予囡仔挖寶的場所。彼個人去樓空，恬靜孤單徛在的教育聖堂呀。
但是大倉猶是teh生活，大倉人猶是teh生湠。這寡新生的珍珠檢采就愛這般的拖磨才thang修成正果，才有thang提煉成珠？
當這陣台灣之子的教育權予人剝削，啥人閣願意將囡仔留佇tsia？毋願離開的拚命生湠，但是這種惡質的環境予想欲離開的走佮噴弓。這種惡性循環，恐驚閣較濟新生的幼珠愛接受這種惡質的拖磨，這種無合理的剝削。
失去加貝的保護，珍珠kám有成珠的一工？猶是怹只是予人棄捨去、交落去的珍珠爾爾。這個想法將我的睏神霸tiâu咧，一直到天拍phú光。這座海洋資源多元，自然生態、人文景緻豐富的天堂kám也有予日光注神的未來？
文章定位：
人氣(500) | 回應(0)| 推薦 (
0)| 收藏 (
0)|
轉寄
全站分類:
不分類
