今日一起身個天就黑沉沉, 好似想落雨咁, 不過呢幾日都曬到成隻野咁, 都係時候要落下雨喇...
我地今日要去既地方就係台場(係一個新發展既旅遊區), 我地每人買左一張圍繞住台場行既無人駕駛既一日乘車証去遊台場~ 抵d嘛~ 去到第一站我地就去左車站附近既海濱公園, (但係我覺得似沙灘多過似公園囉...) 落到去個沙灘度, 離遠見到舊黑雲(大事不妙喇...) 除此之外, 仲可以望到彩虹橋, (個款有d似香港既青馬大橋) 頭先搭無人駕駛果陣都穿過佢架~ 呢條彩虹橋都十分之出名, 好多日劇都係搵左呢條橋唻取景架~ 我地喺個沙灘度只不過企左一陣, 但係個頭...已經比風吹到....顛左...更恐怖既係....d沙比d風吹到飛起哂, 我地離遠已經見到d沙捲緊過唻...(簡直好似拍緊龍捲風暴咁呀~ 好恐怖...) 本來好想大叫走人既我, 即刻合返埋個口, 因為已經....太遲喇...見到d沙已經殺到埋身, 我地攪笑到即刻搵自己個袋唻擋住d沙, 跟住縮埋左一舊............(唉...好後悔點解唔帶個大d既袋...)一場沙暴過後, 沙灘上面即時多左兩條顛婆...係兩條衣衫不整... 頭髮蓬鬆...既顛婆..........
正所謂一波未停, 一波又起呀~ d雨...開始打到唻喇......我地唯有極速走去下一個景點 -- 台場小香港, 呢個『台場小香港』係喺一個商場既頂樓, 果度佈置到成個幾十年代既香港咁, 去到果度, 簡直好似返左香港咁呀~ (忽然間好掛住香港d野食呀~) 不過果度完全係昆水囉...一碗鰠香港廿蚊有找既雲呑麵, 或者係一碟普通既楊州炒飯, 都貴香港幾倍...(心諗如果我喺果度擺返檔嗱喳麵....咁咪...發達??~~haha...) 去到第二層...又有好多懷舊既野買, 以前既玩具呀, 零食呀咁, 哈~ 忽然有種感覺就係覺得自己好老呀........
離開左商場之後, 我地就去左參觀富士電視台, 個電視台既外形好特別, 最頂果度有個類似波既物體喺中間, 果度原來係25/F既球體展覽室, 上到去, 可以360度咁望哂成個東京, 仲好清楚咁望到頭先果條彩虹橋呀~ 根據指示板上既指示, 由某方向一直遠望過去, 仲會見到富士山呀~ 但係唔知係咪因為天氣唔好既關係...我地望來望去望到眼都突埋...都望唔到富士山囉....連影都望唔到.....呃......人.....既...
跟住我地就落到去24/F既toilet, 個toilet好鬼攪野, toilet側邊有好多制, 其中一個制press落去會有聲(係模擬廁所既沖水聲), 哈哈~~ 聽到之後我簡直笑到停唔到口......但係就諗來諗去都唔知有乜用...個toilet仲有好多其他騎呢既functions, 好似cleaning, warm咁, 最奇怪既就係...連massage都有呀~ 哈哈~ d日本人真係"近"(勁)呀! 我同我細妹就係咁...一人一格好開心咁喺度研究佢d functions.... haha~~ (不過好在冇人咋~ 又或者可能係....d人聽到toilet裡面傳唻一陣陣既笑聲....而唔敢入唻.................)
再落到去5/F, 呢層介紹左好多電視節目, 仲展覽左好多有紀念價值既野, 有d明星簽過名既紀念品, 仲有好多節目既佈景板比我地影相呀~ 有同<慎吾媽媽>呀~ 不過如果好彩既話仲可以見到d現場錄影既節目呀!~ 不過好可惜, 我地撞唔啱時間啦, 唔好話smap呀, 茄喱啡都撞唔到個呀.....如果撞啱現場錄影就正喇~~~
離開電視台已經係傍晚lu, 我地離開台場之後就去到涉谷, 去到一間一年365日都咁多人既壽司店度坐低左, 間壽司店既材料全部都係喺築地新鮮送過唻架~ 仲要係大多數都係100yen一碟咋~~ 真係抵到爛呀~ 但係呢間野實施左一項攪野既人潮管制, 就係要限住半小時之內要離座, 仲要至少每人食到7碟或以上, 當然, 對於我同我細妹經過一日既飢荒簡直係絶對冇問題啦~ 不過當我地食食下之制, 見到眼前既壽司師父徒手(無帶手套)咁伸隻手入去飯桶度攪攪下, 跟住就攞舊飯出唻渣渣下咁.... 又對住d飯大聲講大聲笑(無帶口罩), 跟住有個日本人問佢攞wasabi(原來喺日本食壽司, d wasabi唔興擺上台自己攞架, 係要問人至會有...), 個師父攞左一大碟既wasabi出唻, 跟住徒手攞起左一"bet", 用手將佢磋圓左之後就擺落碟壽司度....感覺上果粒磋圓左既wasabi有d似....nose x(haha...唔好意思, 唔出得街架...自己估下啦~)我同我細妹既胃口就係咁...比起之前即時減左一大半......
不過原來SARS對日本人既影響...真係一d都唔大...我諗如果呢間野喺香港經營既話, 我諗佢既下場就會係........聽執笠罷啦...
文章定位：
