好玩之必要 生活很平淡，好玩就好。 設部落格，寫作，旅行，畫圖，練書法等等，都是出於好玩。 好玩就玩，不好玩就不玩。 隨緣。

332愛的鼓勵 11訂閱站台

朋友傳一个五四三的網路新聞，講硩年錢（壓歲錢）的銀票提出來了後，紅包橐仔（lok-á，袋子）毋通擲掉，共伊囥（khǹg，放）佇枕頭下面，抑是「佇紅包橐仔內囥168箍銀角仔，包括50箍2个、10箍6个和1箍8个」，隨時紮（tsah，攜帶）佇身軀邊，對這年的財運和福氣有幫助。

我講：「紅包橐仔我攏留落來。這陣，kan-na囡仔會予我紅包；橐仔媠，閣有囡仔的祝福。不過，身軀邊紮一堆銀角仔，siunn（過於）重。」

講著遮，想著一對綢仔做的紅包袋仔，隨提出來翕（hip，照）相予逐家看。彼是我看過上幼路的紅包橐仔，是工藝品，無可能隨便擲掉。

過年，逐家想欲有好彩頭，才會想空想縫「作法」。有的求運、求福的步數，免出門和人kheh（擠），免開錢，閣心適心適，我就罔做。可比共五个壺囥佇向門的玻璃櫥內底，代表華語講的『五福臨門』。細細的茶罐仔淡薄仔有歷史，其中上蓋古的是一个有虎喙、貯（té，盛裝）豆油的壺，是阮大家（婆婆）以前用的，面頂有寫「台北永發精米店」，電話番kan-na四碼爾爾。

五个壺本來就囥佇玻璃櫥內底，平常時袂去想著in；這陣，排佇一張紅紙頂頭，才有特別的「存在價值」。

一位朋友幾若年前教我過年的儀式是：新正行春，去人濟的所在，「沐人氣」；銀行開張彼工，趁開門的時辰去承接財氣－－上好是台灣銀行。沐人氣我做會到，行春兼拜拜；一四界的廟攏是人kheh人，人氣滿滿。去銀行承財氣，就感覺好笑；敢若門一下開，銀票會若大水按呢衝出來。

毋過，這兩年因為疫情，人濟的所在毋通去，沐人氣也省起來；今年直直落雨，佇厝內「行春」就好。

「佇紅包橐仔內囥銀角仔」的議題，有人講會使袋16800，就完全是銀票，袂重；最後，逐家講囥信用卡上實在，上輕。

2022/3/3《人間福報》