去年到北京工幹, 午飯時跟客戶聊到”擇日結婚” 這個話題, 才知道這槪念於內地已過時. 內地人一般選擇長假期前後結婚, 即五一/十一, 好等新人有充足時間休息. 相反, 在香港這個什麼都講求”潮”的社會, 由搬屋, 開張, 結婚到生仔都要擇日, 難到於吉日結婚就唔會離婚, 於吉日開張公司就唔會倒閉, 於吉時出世就一定會年年考第一做尖子攞傑青?
係唔係”好年”都好, 今年真係好多人結婚, 收咗五張帖就唔見咗五隻牛, 仲慘過收稅單. 9月24及25日就分別出席了老細/老闆娘及戴尼斯杜/愛麗信杜的婚宴. 老細個婚宴好明顯落足本, 由會場選址 (金鐘Conrad), 酒席數目 (30圍), 以至會場佈置 (旋轉樓梯/兩個四呎高的precious moment公仔棟係receiption隔離/婚宴前喺foyer招呼親朋戚友/全場四個無敵大銀幕不停播放兩人的結婚相)可見一斑. 這還不止, 有得食仲有得拎, 每枱都有十二個用薄紗包裹的precious moment紙鎮 (內有一張2R的結婚相) 給賓客留念, 集可觀性及紀念性於一身. 佢哋嘅結婚相, 部份係香港/台灣拍, 仲有啲係結婚當日下午回HKU拍的. 雖然有部份相拍到好似許志安精選碟封套咁, 但係真係好靚!!!
雖則席間”玩新郎新娘”遊戲欠奉, 但我們卻在整晚唯一一個遊戲中勝出並得到精美包裝蜜糖十二瓶. 遊戲非常之簡單, 每枱只需要為新人還未出世的兒女改名, 唯一要求是兒子的名字第二個字需為”本”字. 基於老細平時數口精, 我們第一時間便想到男的叫陳本利 (英文名 Bute bute Chan/Interest Chan/Principal Chan), 女就叫陳閨環, 取其意本利歸還.
事實上兩個婚宴的模式差不多, 食物差不多一式一樣, 唯一不同的是老細選擇註冊儀式一併在酒店舉行, 省卻了奔走註冊署的時間. 老細簽婚書時仲當正自己係歌星開記招簽約新公司咁, 簽簽吓停低俾人影相, 真係頂佢唔順.
兩個婚宴給我最深刻印象的 (感動位) 都是新人致謝來賓那一段. 雖然要多謝的人來來去去都係父母/外父外母/老爺奶奶/伴郎/伴娘/兄弟姊妹/等等, 但是他們的不熟練 (甩甩cut cut) 致詞反令我深深感受到他們對父母無言感激, 更甚的是他們對婚姻一生一世的承諾及對婚姻生活的憧憬, it’s really touching!!!!
總言之, 祝佢哋白頭到老, 永結同心!!!!!
http://community.webshots.com/user/catcsk
