中晝，雨停了後，天邊出現美麗的七色彩虹。
半晡，一陣春風吹過這粒恬靜的山頭，予踮佇這踏的人感覺心涼脾肚開。
這時，燒和的日頭光照入這間別莊二樓的樓窗，予拄食飽無偌久、躺佇眠床頂歇睏的林彩虹淡薄仔溫暖。
房間內面當咧轉踅的曲盤，憂憂仔唱出哀怨的〈月夜愁〉：
月色照在三線路
風吹微微 等待的人那昧來
心內真可疑 想昧出彼個人
啊…怨嘆月暝
更深無伴獨相思
秋蟬哀啼 月光所照的樹影
加添阮傷悲 心頭酸目屎滴
啊…憂愁月暝
敢是註定無緣份
所愛的伊 因何乎阮放昧離
雙邊來散開 斷腸詩唱昧止
啊…無聊月暝
這塊曲盤不止仔有歷史，是三十外冬前林彩虹灌錄的頭一塊台灣歌謠專輯。
彼陣，林彩虹已經出版三、四十塊華語曲盤，每一塊攏傳遍鄉村、都市的大街小巷，會當講蒸甲掠袂牢。
雖然，林彩虹是彼個時代上界受注目的紅歌星，不而過，佇伊心肝穎仔第一致意的代誌，是會當早日出版台灣歌謠專輯。
事實上，出版台灣歌謠專輯的過程並毋是遐呢順序。
林彩虹猶閣會記得，彼年第二號風颱掃過台灣了後頭一個上班日，伊家己一人去唱片公司揣頭家吳桑，佮伊參詳出版台灣歌謠的代誌。
吳桑表面上對林彩虹十分客氣，請秘書小姐泡上等的藍山咖啡請伊，毋過，伊聽林彩虹講明來意了後，嘴笑目笑按呢講：「林小姐，這幾冬妳佇咱遮出的唱片，逐塊攏誠受聽眾朋友歡迎，公司傍妳的福氣，錢水嘛加誠活流，我本人代表所有股東向妳說一聲多謝。」吳桑停睏啉一嘴咖啡，「這台灣歌謠好聽罔好聽，不而過，現此時每間電視台逐日干單會當放兩首台灣歌，市面上到底會有啥款反應，我愛閣佮其他股東參詳看覓才有法度決定，請林小姐諒解。」
林彩虹聽笑面虎吳桑講一綰話，終其尾猶是無欲接受伊的建議，面色略仔變款，皮包仔提咧做伊徛起來，「吳桑，耽誤你寶貴的時間，我先失陪。」
吳桑手指林彩虹桌頂彼甌咖啡，「林小姐，這咖啡專工唯Jamaica（牙買加）進口的，免細膩捧起來啉看覓。」
「吳桑，歹勢，我慣勢啉茶無咧啉咖啡。」林彩虹應。
「敢無欲閣坐一時仔，我喚秘書小姐泡一鈷凍頂烏龍茶請妳。」吳桑猶原嘴笑目笑。
「免麻煩矣。」林彩虹向吳桑抌一下頭，行出伊的辦公室。
一月日後，林彩虹佮伊的老母作伙去唱片公司拜訪吳桑。
林彩虹的老母外表生做膨皮膨皮，眾人攏喚伊福氣嫂仔。福氣嫂仔做人海派、嘴水好、敖佮人盤撋，林彩虹佇演藝界會當大成功，除了本身天份、頂真拍拚佮歌迷相挺以外，上界大的功勞者就是伊的老母福氣嫂仔。
這工，福氣嫂仔專工揀一盒美國進口的上等蘋果，捾到吳桑的辦公室。一入門，福氣嫂仔先伸出伊的正手，笑容滿面佮吳桑握手。
「吳桑，久見，捾這盒美國進口的蘋果欲來孝敬你。」福氣嫂仔雖然大吳桑袂少歲，不而過，伊的身段不止仔柔軟，會曉看扮勢伸勼。
「福氣嫂仔，罕行，人來就好哪著遐功夫，妳今仔日定著無事不登三寶殿。」吳桑確實是江湖老劍仙，看頭就知影尾。
「吳桑，既然按呢，我就無細膩矣。阮今仔日來遮，就是欲佮你參詳彩虹出版台灣歌謠曲盤的代誌。」福氣嫂仔直透講出來遮的目的。
「今，妳福氣嫂仔親身出馬，無予妳一個交代嘛袂使。按呢啦，一禮拜內絕對回恁消息。」吳桑面子做予福氣嫂仔。
「吳桑，無閒做你。按呢，阮先失禮矣。」福氣嫂仔那講話那給林彩虹使目尾。
佇福氣嫂仔佮吳桑對話的過程裡，徛佇邊仔的林彩虹無話無句，袂輸伊是第三者，這層代誌佮伊無治代。
有影，無到三工，林彩虹本人接著吳桑親身敲來的電話，講唱片公司答應出版伊頭一塊台灣歌謠專輯。
一禮拜後，唱片製作人佮林彩虹摧撟錄音的時間表。
兩月日後，林彩虹頭一塊台灣歌謠專輯《月夜愁》正式上市。
無偌久的時間，通台灣街頭巷尾四界攏聽會著林彩虹咧唱〈月夜愁〉、〈雨夜花〉、〈河邊春夢〉遮的優美、哀怨的歌曲。
這塊曲盤，相像予唱片公司趁著袂少錢。
林彩虹用實力證明伊當初的堅持一點仔都無毋對。
林彩虹唯新加坡轉來台灣已經月外日，伊唯一的查某囝韓雯琪佮隨身助理陳碧霞參伊同齊轉來。現此時，怹蹛佇林彩虹故鄉大溪鎮隔壁鄉角板山的一間別莊，這間別莊是林彩虹頂回轉來台灣彼時蓄的，不而過，因由伊給秘密保守甲密啁啁，所致外界根本毋知影這個所在。這踏山嶺青翠、溪水透涼，鳥隻唸歌、花蕊清芳，徛佇海拔六百外公尺的所在，袂傷寒嘛袂傷熱，是一位渡假的聖地。
毋過，若欲講林彩虹這擺是回鄉渡假，凡勢講伊轉來踮遮隱居靜養較有影。
事實上，林彩虹轉來台灣進前，已經佇新加坡的大病院檢查出得著卵巢癌尾期。這款專屬查某人的病症，一般的初期無啥物明顯的症頭，往往患者本身僫得發覺致著這款病。當等主治醫師親嘴向林彩虹講出伊得著卵巢癌，尚且家族近親內面若有人捌得著這款病症，其他親人閣再致病的機會併一般人加懸誠濟。這時，伊的腦海內才逗逗仔想起外媽斯當年嘛是致著卵巢癌來過身。
《月夜愁》曲盤內面十二首歌唱了，林彩虹喚助理陳碧霞放第二塊台灣歌謠專輯《春花望露》來聽：
今夜風微微 窗外月當圓
雙人相愛要相見 思君在床邊
昧見君 親像野鳥啼
哎喲 引阮心傷悲 害阮等歸暝
明夜月光光 照在紗窗門
空思夢想歸暝恨 昧得倒落床
昧見君 親像割心腸
哎喲 引阮心頭酸 面肉帶青黃
深夜白茫茫 霜雪落在窗
思思念念君一人 孤單守空房
昧見君 怨嘆目眶紅
哎喲 引阮病這重 情意害死人
聽著這首主題歌〈春花夢露〉，林彩虹目眶略仔紅紅，規個人陷入深落的記智內面。
彼陣，第二塊台灣歌謠專輯拄出版，林彩虹佇伊拜六暗主持的歌唱節目「春風歌聲」裡，現場演唱專輯內面的〈四季紅〉、〈滿面春風〉兩首歌，按呢安排，原底並無違反廣播電視法，仝一間電視台佇一日中間上濟會當唱兩首台灣歌的規定。不而過，林彩虹佇節目尾聲佮觀眾朋友講再會同時，〈春花夢露〉的音樂聲輕輕響起，雖然，伊才唱煞頭一葩就進廣告，毋過，三工後電視台收著新聞局的公文，講林彩虹佇伊主持的「春風歌聲」節目裡，違反廣電法規定，相連續唱三首「方言歌曲」，處罰這個節目停止放送一月日，林彩虹本人仝款一月日袂使出現佇電視節目裡。
聽著這個譀古消息的時，老實講，林彩虹氣甲規腹肚火，直接闖到電視台節目部揣經理王聖文理論：「王經理，『春風歌聲』遮呢受觀眾朋友歡迎，為著佇節目尾聲加唱一葩台灣歌，就愛停止放送一月日，你家己憑天良講，這款處罰敢有合情理？」
「林小姐，妳暫且莫遐呢受氣。」王聖文先安搭林彩虹，「阮攏知影妳受委屈，這層代誌我早起有向總經理報告過，……」
「總經理伊按怎講？」林彩虹拍斷王聖文的話語。
王聖文無奈掠伊看一下，「總經理伊誠肯定妳對電視台佮節目的貢獻，毋過，既然新聞局發正式公文，咱無遵守嘛袂使。」
「按呢，這一月日恁拍算按怎做？」林彩虹問。
經理秘書捧兩甌燒茶入來辦公室，囥咧王聖文佮林彩虹面頭前的桌頂。
「林小姐，這泡春仔茶是今年著等的冠軍茶，趁燒緊啉看覓。」王聖文好禮款待。
這時，林彩虹的老母福氣嫂仔接著消息趕來經理辦公室。
雖然，伊心內佮查某囝仝款真凝，不而過，表面上伊猶原激甲笑咳咳，用柔軟的態度佮王聖文盤撋。另外一方面，伊嘛好嘴苦勸林彩虹代誌拄著矣，不如看較開咧，這一月日煞袂曉給當做渡假日，兩母仔囝相招通台灣島遊覽予伊夠喟夠喟。
落尾，電視台佇原底「春風歌聲」節目的時段，剪接進前放送過的片段，另外號名「周末點唱機」，照常放送林彩虹的歌聲，不而過，便若林彩虹的畫面攏換做台灣各地的光景影片。雖然，電視台佇放送「周末點唱機」的時，有拍簡單字幕說明「春風歌聲」只是暫時停止放送。毋過，隔轉工起，電視台總機小姐電話接袂離，有的人君子風度好禮仔建議，有的人忍袂牢直接操幹譙，喚電視台趕緊恢復「春風歌聲」節目。
電視台高層除了感受著濟濟觀眾的怒火以外，同時有名的廣告廠商嘛予怹相當大的壓力，若毋趕緊恢復「春風歌聲」節目，原底預定的廣告就欲撤銷。最後，電視台總經理佮節目部經理親身到新聞局交涉，後來，新聞局另外發一封公文，頂面寫講因為電視台佮林彩虹本人誠心悔改，所致，將原底節目停止放送一月日的處罰縮短到兩禮拜。到底，電視台彼兩位高層是用啥物禮數款待新聞局，除了當事者以外，實在無人真知。
林彩虹轉來台灣，佇角板山隱居靜養，除了查某囝韓雯琪佮隨身助理陳碧霞以外，無甲一個人知影。毋那平素時仔敖甲會飛天鑽地的媒體記者無人聽著風聲，連林彩虹佇台灣的親人嘛毋知影伊確實的形蹤。這一切根底的原因，是林彩虹特別交代韓雯琪佮陳碧霞，千萬毋通露洩伊的消息，尚且欲轉來台灣彼日，林彩虹穿插簡單樸素，面裡全然無畫粧，提伊本名林春芳的護照通關。的確因為班機半暝才佇桃園機場降落，毋才無引起海關人員佮其他旅客的注目。
《春花夢露》專輯十二首歌一輪唱煞，陳碧霞主動給曲盤換做第三塊台灣歌謠專輯《送君珠淚滴》：
一路送君到車站 二人情份不甘放
依依難捨心情重 煞來目眶紅
望君真情相疼痛 為君守空房
咱情意不通昧記 我是你的人
二人離別越頭看 點點珠淚滴昧煞
親像真珠打斷線 傷心送情伴
為國服務著出外 甘願來拖磨
在軍中著愛保重 不可受風寒
三聲無奈要分開 我是堅心塊愛你
心情堅定才應該 寫批乎我知
為君思情暗悲哀 期待倒返來
阮不管三年五載 也是要等待
聽著曲盤咧放送這首〈送君珠淚滴〉，陳碧霞規個腦海內隨充滿少年時的甘甜記智。
彼個年代，林彩虹的歌迷雖然分布佇社會各階層，不而過，踮佇各地加工區的女工，會當講是伊上界死忠兼換帖的支持者。出身散赤家庭的林彩虹真知，這陣死忠兼換帖的姊妹，無論佇工場做工，抑是歇睏時仔踮宿舍裡，不管時攏咧聽伊唱的歌。因由眾人的鼓勵、支持，佇藝界這條坎坎坷坷的路裡，林彩虹才會得啖著甘甜的滋味。
彼冬，為欲感念這陣台灣經濟無名英雄的付出，林彩虹特別撥工，揀選勞動節前後連續三個拜六暗，唯南到北分別佇高雄的楠仔坑加工區、台中的潭子加工區佮桃園的龜山工業區，舉辦三場勞工之夜歌唱會。
彼陣，台南庄跤囡仔陳碧霞佇龜山工業區的華歌爾內衫公司做領班，逐日空課無閒切切，暗時罕咧免加班。伊歇睏時仔上大的娛樂，除了佮姊妹仔伴去踅夜市仔以外，就是踮佇宿舍內面聽林彩虹的曲盤。
彼工，陳碧霞佇公司召開的幹部早會裡，親耳聽著總經理對所有幹部宣布，兩禮拜後的拜六暗，林彩虹欲來龜山工業區舉辦勞工之夜歌唱會，地點就踮佇華歌爾公司的大禮堂。向望課長以上的幹部鬥發落一寡行政的事工，其他幹部嘛給消息轉告予所有員工，鼓吹逐家時到熱烈捧場。
這也莫怪，華歌爾公司是彼當陣龜山工業區所有廠商內面，廠房面積上界大間，禮堂場地嘛上界舒適的第一選擇。閣較重要的是，華歌爾女工掛職員人數一千較加，歌唱會辦佇遮，用跤頭窩想嘛知定著人群佳易沖沖滾。
幹部早會一開煞，陳碧霞規個人歡頭喜面，半行半走闖轉去製造部，佮伊仝班的姊妹仔伴李淑惠看伊遮呢歡喜，手頭空課先囥一邊偎過去，「領班，妳昨昏是對著愛國獎券是否？若無，哪會透早就嘴笑目笑。」
「比對著愛國獎券閣較歡喜一百倍，」陳碧霞出手拽徛佇邊仔的張玉玲嘛閣來聽，「淑惠、玉玲，恁敢知影咱這回運途透天矣，林彩虹欲來咱公司大禮堂辦歌唱會。」
「啥物時陣？」李淑惠、張玉玲同齊問。
「聽予斟酌，兩禮拜後的拜六暗，時到恁毋通四界拋拋走，愛加招寡人來鬥捧場知否？」陳碧霞慎重交代。
「知啦，領班。」兩人同齊應。
歌唱會彼日欲暗仔，陳碧霞佮濟濟華歌爾女工，為欲迎接怹心目中的大歌星，逐家相爭搶宿舍浴間仔洗身軀，李淑惠佮張玉玲跤手慢鈍搶無浴間仔，佇外面行來行去，陳碧霞聽著怹的聲嗽，喚怹入來佮伊鬥陣洗，張玉玲應：「領班，按呢敢好？」張淑惠講：「平平查某囡仔，妳是咧驚頭殼一空。」伊那講那牽張玉玲的手闖入陳碧霞的浴間仔。
怹給身軀洗予清氣沾沾、頭鬃拭予焦鬆，隨人攇一領慰甲俏俏的制服，徛咧落地鏡頭前，給這領面頭前一排圓鈕仔、尻脊骿繡「Wacoal」標誌的藍色制服揪予齊整。未到六點，陳碧霞、李淑惠、張玉玲這三個司公仔聖杯就闖去大禮堂佔好位。
規個大禮堂經過專業人員的布置了後，舞台氣派十足，燈光佮音響嘛張設甲予遮的平素時仔屈佇工場內面車衫的女工，隨個啊隨個目睭展大蕊、耳空搤利利。
暗時七點，佇〈望春風〉的背景音樂聲裡，身材瘦窕、規身軀白衫、白褲、白帽仔的林彩虹唯後台行出來舞台正中央。坐佇台跤，看過去規群烏黔黔的女工，袂輸看著白馬王子仝款，對舞台頂的林彩虹喝咻、拍噗仔。
背景音樂漸漸細聲，林彩虹給mai-khuh舉到離嘴量約一粒拳頭母的所在，用十分誠懇的口氣對台跤的觀眾講話：「各位死忠兼換帖的姊妹逐家好，盈暗真歡喜轉來故鄉桃園的龜山工業區舉辦勞工之夜歌唱會。今仔日，坐佇台跤的各位，攏是台灣經濟的無名英雄，嘛是這場暗會的主角。我想，咱遮有濟濟姊妹的查甫朋友，抑是親人兄弟當咧做兵、為國效勞。所致，彩虹代先為各位獻唱這首〈送君珠淚滴〉。」
〈送君珠淚滴〉的音樂聲起，林彩虹徛踮舞台中央唱煞頭一葩，間奏的時，逗逗行落跤台那行那唱：「二人離別越頭看∕點點珠淚滴昧煞」，唱到這踏的時，坐踮頭一排的陳碧霞雄雄目眶紅紅，林彩虹真拄好行到伊面頭前，陳碧霞勉強展笑容，徛起來佮伊上界欣慕的歌星握手。
事實上，陳碧霞會佇聽著林彩虹唱〈送君珠淚滴〉的時目眶紅，除了林彩虹歌聲的感染力以外，上界重要的原因是伊青梅竹馬的愛人仔，去北部做兵了後，愛著家境富裕的台北小姐。毋才會一聽著這兩句歌詞，就予伊回想著永過遐的傷心代。
彼暗的歌唱會，佇規場鬧熱滾滾的氣氛佮依依難捨的情緒裡圓滿結束。
自彼回親目睭見著林彩虹了後，陳碧霞規個人心情變甲加誠輕鬆，失戀的苦楚嘛親像一陣風，來無影去無蹤。
續落來，便若知影林彩虹啥物時間佇佗位演唱抑是錄影，只要是歇睏時仔，陳碧霞攏甘願開車錢佮時間去相挺，甚至伊嘛儉腸捏肚買花送禮物予林彩虹，成做一位死忠兼換帖的歌迷。因為按呢，伊佮林彩虹接觸的機會愈來愈濟，嘛佇林彩虹的心內留落深刻的印象。
落尾，林彩虹的聲勢愈來愈大、歌迷愈絞愈濟。全台灣的歌迷串連起來，揀一個良時吉日踮台北成立「彩虹歌友會」。熱心聯絡會友的陳碧霞，被選做頭一任的副會長。後來，林彩虹的老母福氣嫂仔年歲較有，林彩虹需要一位隨身助理鬥發落代誌，陳碧霞自按呢綴佇身軀邊，一直到甲林彩虹嫁去新加坡嘛綴伊過去。
黃昏，窗外天色漸漸暗落來，涼冷的山風咻咻叫，透過窗仔一陣一陣吹入房間內。
林彩虹倒佇眠床頂欲偎三點鐘，規身軀腰痠背疼，伊喚查某囝韓雯琪扶伊起來，伊想欲出去門口埕散步一時仔。搭心的韓雯琪攇一領外衫予林彩虹疊咧，順續替伊幔一條圍巾，按呢較袂感著風寒。
韓雯琪陪老母佇門口埕散步三、五分鐘，就扶伊坐踮別莊外面特製的柴椅頂懸。
林彩虹給韓雯琪的雙手搦牢牢，一面用溫柔的眼神看查某囝，一面用伊不止仔虛弱的聲音，勻勻仔唱出第四塊台灣歌謠專輯的主題歌〈望郎早歸〉：
思念我君坐在窗 東邊月娘紅
春風吹著阮一人 未得照希望
離開這久的台灣 無想咱鄉村
家內又擱這呢散 誰人未怨嘆
離開比水流卡遠 放阮在田庄
佮子一日吃一頓 消瘦面青黃
傷心怨嘆全無睏 一暝哭甲光
我君是你失打算 怎會去這遠
看見水底的鴛鴦 加添阮憂愁
目屎那流也那想 未得返家鄉
腹肚那夭也無飯 三頓蕃薯湯
想欲做工腳手軟 誰人心未酸
林彩虹每唱兩句就停睏一時仔，才閣繼續唱落去，誠無簡單才給這首歌唱甲透。
「媽，外面風透，我扶妳入來厝裡歇睏。盈暗二九暝，碧霞阿姨咧等咱圍爐。」韓雯琪驚老母身體袂堪哩。
「雯琪，閣坐一時仔，我講故事予妳聽。」林彩虹陷入囡仔時的記智。
林彩虹，出世佇大溪鎮草店尾，因由佇三月二十春分彼日出世，所致阿公給伊號名春芳。
林家厝內散赤，老爸林三貴逐工透早天未光，就趕去併故鄉大溪加鬧熱誠濟的桃園鎮做人力車伕。除了當咧載人客的時間以外，林三貴大體上攏會佇桃園車頭外面排班聽候。這款走車碌路、體力定定用盡磅的頭路，一月日趁無幾銑錢。為著鬥相共維持家庭的生活開銷，春芳的老母楊寶猜只好佇大溪鎮引一寡洗衫的穡頭轉來罔做。
林彩虹這世人會遮呢恰意唱歌，全然是細漢時受老母的影響。
伊猶會記得，彼陣伊大概仔五、六歲的款，略略仔捌代誌矣。有一擺，老母佇厝外咧洗衫，手裡衫那撋，嘴裡那咧唱：「思念我君坐在窗∕東邊月娘紅……」，稚稚漢仔的春芳干單感覺阿母唱歌誠好聽，毋過伊聽無阿母歌裡的意思。
「阿母，妳拄才咧唱的歌號做啥物名？哪會遮好聽？」天真的春芳問老母。
「春芳仔，這首歌號做〈望郎早歸〉。妳去舉一隻椅頭仔過來邊仔坐，阿母講古予妳聽。」春芳乖乖仔入去厝裡舉一隻椅頭仔，恬恬仔坐咧聽老母講古。
這個古是真實發生佇春芳的老爸三貴仔身軀頂的故事。
林三貴自日本時代尾期，就佇桃園街做人力車伕，伊載人客的範圍攏是佇桃園驛頭彼箍圍仔。
彼陣，日本皇軍佇南洋的戰事捷拍捷輸，統治當局總督府透過台灣各地的保正，四界招募軍伕，講招募較好聽，事實上是強扭軍伕，給遮的當青春少年的台灣查甫囡仔，送去南洋各地參加戰爭。
林三貴彼時拄佮楊寶猜結婚兩月日，就予當局召去南洋做軍伕。無偌久了後，楊寶猜發現家己有身矣。
「恁阿爸予日本人召去做軍伕了後，我才知影家己有身矣。逐日都咧數念伊，向望伊早一日轉來厝裡團圓。」楊寶猜講到遮，目眶做一下紅起來，用手紻去拭目屎，「我一個查某人揹一圈肚，暝日咧做厝內的穡頭，逐工攏嘛給目屎準飯吞。」
半冬後，日本戰敗降服。楊寶猜心內暗歡喜，想講翁婿真緊就挺好倒轉來，無定著會當親目睭看著伊腹肚內的囡仔出世。不而過，這個卑微的向望最後破滅矣。閣過半冬，林三貴才規身軀衣衫襤褸唯南洋倒轉來，彼時，伊的大漢查某囝思君已經出世三月日。
林彩虹故事講到遮，陳碧霞飯菜已經煮好，碗箸僎好勢，行出別莊外面，佮韓雯琪一人一爿扶林彩虹入去厝裡圍爐。
自彼回唱歌、講古予春芳聽了後，楊寶猜就漸漸發覺這個屘查某囝對台灣歌謠誠有趣味，聲喉無較輸伊本人。別日仔時機若到，按算欲栽培伊成做歌星。自按呢起，伊給所有會曉唱的台灣歌謠，一首啊一首傳教予春芳。
過無偌久，春芳讀大溪國民學校，楊寶猜利用透早去溪仔邊洗衫的機會，掣春芳去遐練唱台灣歌謠，按呢較袂吵著厝邊頭尾。逐擺春芳若踮溪仔邊唱歌，仝庄頭佇遐洗衫的阿嬸、阿姨攏會給伊呵咾兩句，予伊心花開，笑容袂輸天頂的日頭遐呢燦爛。
有一工，天拄拍昲光，春芳綴老母去溪仔邊洗衫，佇遐練唱〈河邊春夢〉：
河邊春風寒 怎樣阮孤單
舉頭一下看 幸福人做伴
想起你對我 實在是相瞞
到底是按怎 不知阮心肝
昔日在河邊 遊賞彼當時
實情佮實意 可比月當圓
變心做伊去 將阮來放離
乎阮那想起 恨伊薄情義
四邊又寂靜 聽見鳥悲聲
目睭看橋頂 目屎滴胸前
自恨歹環境 自嘆這薄命
雖然春風冷 難得做犧牲
凡勢是春芳唱了傷過頭感動人，予邊仔遐的婦仁人聽甲耳仔仆仆仆，蹛佇怹兜厝邊的月嬌姨仔，一時聽甲憨神失注意，一領猶未洗清氣的衫仔煞予溪仔水沖走去，害逐家笑甲攬腹肚。
林春芳讀大溪初中二年的時，台北的天下廣播電台舉辦第一屆台灣歌謠比賽，老母楊寶猜鼓吹伊報名參加。為著予查某囝佇舞台頂佮人會比併，楊寶猜開袂少錢買一袾粉紅色的洋裝予林春芳。比賽彼日透早，楊寶猜特別給穡頭放咧，將林春芳粧甲袂輸一位小公主，親身陪查某囝去台北社教館參與這場盛會。
彼屆報名參加比賽的選手攏總五、六十人，林春芳選節奏輕快、青春活跳的〈望春風〉上台演唱，結局拍敗五十外人得著第四名。對一個唯庄跤所在來、頭擺參加歌唱比賽的十四歲囡仔來講，這已經是誠無簡單的成就。不而過，唯楊寶猜失望的眼神裡，林春芳看會出來老母對伊的表現無滿意。
彼暗，轉去厝裡，楊寶猜舉秀梳仔給林春芳捎幾落下，捎煞，家己匿入房間仔內哮，哮一睏，才提一罐雲南白藥出來給春芳抹。佳哉，彼陣拄好寒天，學校規定制服卡其衫配長褲，林春芳的傷痕才無予老師、同學發現。
因為反應熱烈，隔轉年天下廣播電台續落辦第二屆台灣歌謠比賽。
彼陣，林春芳初中已經卒業幾落月日。這成冬來，伊歌練了閣較勤，毋那透早綴老母去溪仔邊洗衫的時練唱，黃昏時仔，伊嘛定定家己孤一人走去無人的田裡大聲唱歌。一首閣一首，一遍續一遍，伊向望今年袂閣予阿母失望。比賽彼工，楊寶猜相像陪林春芳去台北社教館，佇路裡，兩母仔囝無話無句，楊寶猜干單用眼神給查某囝講，妳愛加油。
彼回攏總有上百人報名比賽，林春芳特別揀〈補破網〉上台演唱，這首歌佇比賽進前，伊演練毋那百遍。這擺，伊演唱的時台風不止仔在穩，喉韻盡展，歌聲裡含帶酸甘甜的滋味，佮樂隊的伴奏配合甲不止仔密，一個音都無走閃，予全場觀眾噗仔聲拍袂離，坐佇台跤的楊寶猜聽甲心涼脾肚開，感覺誠安慰。
欲暗，經過一日搭搭的歌唱比賽結束。評審給手頭統計了後的名次交予主持人，這回佮第一屆仝款取六名頒獎。主持人唯第六名開始唸起，第五、第四、第三，唸到第二名猶無聽著「林春芳」三字。
林春芳坐佇台跤緊張甲規個心臟強欲趒出來，顛倒楊寶猜老神在在。
「第一名，林－春－芳，」聽著家己得著第二屆台灣歌謠比賽頭名，林春芳流落歡喜的目屎，越一下身佮老母楊寶猜相攬。
「咱恭喜林春芳，遮呢少年就提著第一名，請林春芳小姐上台領獎。」主持人繼續給話講煞。
林春芳上台接受天下廣播電台董事長親身頒獎，身軀頂揹一條第一名的紅色彩帶，手裡接著一座金光閃閃的獎杯佮一個厚篤篤的紅包。
轉去厝裡了後，楊寶猜給林春芳歌唱比賽頭名的獎杯峙咧大廳，順續點幾欉清香給廳頭公媽稟告，講林家囝孫春芳今仔日光宗耀祖，祈求歷代祖先保庇春芳會當早日出頭天。
得著歌唱比賽頭名，並無代表林春芳此去一帆風順、順風駛船。
比賽結束了後，一直攏無啥物進展。經過月外日，楊寶猜決定主動替查某囝舖路，伊備辦一份伴手禮，掣林春芳去台北拜訪天下廣播電台總經理賴永泰，請伊無論如何愛牽成林春芳，予伊有機會將咱優美的台灣歌謠傳承落去。
落尾，透過賴永泰牽線，給林春芳紹介去怹朋友開佇台北圓環邊的蓬萊歌廳，佇遐做駐唱歌手演唱台灣歌謠。新人林春芳頭一日去歌廳報到，就夆安排頭一個登台，伊頭一首就選進前歌唱比賽得頭名所唱彼首〈補破網〉：
見著網 目眶紅 破甲這大孔
想要補 無半項 誰人知阮苦痛
今日若將這來放 是永遠無希望
為著前途罔活動 找傢私補破網
手提網 頭就重 悽慘阮一人
意中人 走叨藏 針線來鬥幫忙
孤不利終罔振動 舉網針接西東
天河用線做橋板 全精神補破網
魚入網 好年冬 歌聲滿漁港
阻風雨 駛孤帆 阮努力無了工
雨過天晴魚滿港 最快樂咱雙人
今日團圓心花香 從今免補破網
〈補破網〉唱煞，台跤觀眾的噗仔聲摧無停，逐家攏咧互相探聽這個查某囡仔到底是誰人？歌哪會唱甲遮呢仔好聽？
初起頭，十五歲囡仔的林春芳，干單是一個小歌手，逐月日的月給所趁無幾圓，楊寶猜佮伊的親小弟參詳，安排春芳暫時借蹛佇伊板橋的厝裡。
林春芳為著欲省車錢，甘願忍受枵飢佮跤痠手軟，逐暗攏唯圓環邊的歌廳步輦，行轉去母舅板橋的徛家，轉到厝攏已經三更暝半。母舅對這一切是無話無句，不而過，伊彼個强跤阿妗不時給翁婿怨嘆，講逐暝才拄睏佳睡，聽著電鈴聲就愛起床替伊的外甥女仔開門，實在真忝頭。
「若無，妳喚我起來，我來替春芳開門。」有一擺阿妗閣咧踅踅唸，阿舅按呢應。
「你逐暝攏袂輸睏到十八殿咧，敢喚會起床？」阿妗隨給抵轉去。
阿舅予阿妗抵甲無話通應。
有一暝，林春芳自歌廳下班，相像唯環圓邊行轉去板橋。到位的時，伊仝款揤電鈴，毋過，伊揤幾落下，電鈴攏無響甲半聲，伊驚挵門會吵著規家口仔佮厝邊隔壁的睏眠，就暫且坐咧併踮門邊歇睏。隔轉工早起，阿妗欲出門買菜，春芳聽著開門的聲隨醒起來，阿妗掠春芳看一下就做伊去。春芳關門的時，無拄好發現電鈴的線已經被鉸斷，莫怪昨暝電鈴按怎揤攏無聲。
事實上，春芳早就發覺阿妗無啥歡迎伊蹛佇怹兜。經過這個事件，伊認為是該當愛離開的時陣矣。彼下晡，睏醒了後，趁阿舅出門無佇厝，春芳趕緊給衫仔褲款款咧，拖著簡單的行李恬恬仔離開。
春芳離開阿舅的厝，拖著行李一路行到歌廳，透過歌廳經理的紹介，佇就近稅一間無到五坪的房間。這間房間隘隘仔、暗毿暗毿，不而過，總嘛是家己會當徛居的所在。雖然，逐月日愛加一條厝稅的開銷，但是，毋免閣親像進前按呢，逐暝行遠路拚轉去板橋。
林春芳相連續佇蓬萊歌廳駐唱五冬，做人單純、乖巧、得人疼。空課外的時間，伊袂佮人你兄我弟四界溜溜去，歇睏的時陣，伊大體上攏留踮稅厝徛，讀伊唯舊冊店買來的小說。儘管伊干單初中卒業，毋過，伊對文字的世界加減有淡薄仔趣味。因為蹛的所在隘，無利便佇房間仔內練歌，伊攏利用逐日透早，行去就近的鐵枝路邊，等火車經過的時，伊才訓練家己的聲喉，按呢才袂攪吵著別人的清靜。
林春芳二十歲彼冬，歌廳頭家感覺伊的歌藝已經不止仔成熟，就給伊紹介去朋友開的山海唱片公司灌錄曲盤。毋過，彼個年代欲偎靠台語曲盤出頭天，會使講是阿婆仔生囝──誠拚，所致公司要求伊先灌錄華語曲盤。
山海唱片公司頭家吳桑替林春芳號藝名林彩虹，入去唱片公司三月日了後，林彩虹頭一塊曲盤《春天的彩虹》正式出版。這塊曲盤上市無偌久，就親像一陣風橫掃遍野，主題歌〈春天的彩虹〉四界流傳，大街小巷攏聽會著林彩虹清新的歌聲，毋那電台逐日攏咧放送這首歌，電視台的歌唱節目嘛相爭邀請林彩虹現場演唱。
一目睨的時間，「林彩虹」這三字成做台灣社會注目的焦點。
食生理飯講生理話，唱片公司看林彩虹遮呢受歡迎，短短半冬內閣相連續推出幾落塊曲盤。彼幾冬，林彩虹的歌當時行，一年上濟捌灌錄十外塊專輯，逐塊都攏誠受歡迎。
一直到甲五、六冬後，林彩虹才有機會出版頭一塊台灣歌謠專輯《月夜愁》。
林彩虹用虛弱的聲音唱〈望郎早歸〉予查某囝聽彼暗，拄好二九暝圍爐，伊胃口無偌好，扒無幾嘴飯就入去房間歇睏。
彼暝，伊睏甲誠熟眠。
隔轉工早時，初昇的日頭光透過窗仔照入房間，林彩虹規個人看起來加誠清彩，毋過，伊心內真知，伊踮佇這個美麗世間的歲月，直欲時到日到。
林彩虹給最後這段日子陪伴佇伊身軀邊，上界親近的查某囝佮助理喚來面頭前，特別交代：「雯琪、碧霞，多謝恁這段日子無暝無日咧照顧我。我知影時間到矣，恁毋免悲傷。即馬過年時仔，我過身的消息，暫且莫予疼惜我的歌迷知影，按呢才袂影響怹過節的心情。」
林彩虹交代遺言的隔轉日，佇睏眠中過身，面裡現出微微的笑容。
這工咱人正月初二，查某囝轉外家的日子。
初五隔開，韓雯琪、陳碧霞給林彩虹的遺體送到桃園殯儀館火葬場火化，才閣將貯伊骨頭灰的金斗甕，送轉去故鄉大溪鎮的聖德寶塔服伺。
新曆二月十四西洋情人節彼工，台灣各大媒體攏接著重要的採訪通知，隨人差派一線影視記者趕到記者會現場。
記者會由林彩虹隨身助理陳碧霞主持，當伊宣布林彩虹一月日前佇角板山別莊過身，現場所有記者攏露出驚惶的表情。
記者會結束，各電視台動員新聞部佮節目部，調出倉庫內面的資料帶，剪接了後第一時間緊急放送林彩虹過身的消息。
隔轉日透早，國內四大報規個頭版攏是林彩虹的相片佮報導，內頁原底囥重要政治新聞的二、三版嘛全版回顧林彩虹的一生佮懷念的文章。
世界各地林彩虹死忠兼換帖的歌迷，紛紛起哩「彩虹歌友會」網站留話，無到二十四小時，留話的篇數超過數百篇。
三月日後，透過「彩虹歌友會」會友積極聯絡動員，踮佇桃園體育館舉辦「林彩虹台灣歌謠追思會」。現場無邀請任何歌星演唱，全然給林彩虹以早唱過的台灣歌謠影片，重新剪接放送予在場觀眾追思懷念。彼暝，桃園體育館攏總拚入來規萬人，給規個場地揳甲滇滿滿。
頭一首歌，安排林彩虹本人相當恰意的〈望春風〉：
獨夜無伴守燈下 清風對面吹
十七八歲未出嫁 看著少年家
果然標緻面肉白 誰家人子弟
想要問伊驚歹勢 心內彈琵琶
想要郎君做尪婿 意愛在心內
等待何時君來採 青春花當開
聽見外面有人來 開門甲看覓
月娘笑阮憨大呆 乎風騙不知
陳碧霞看著大螢幕頂面，林彩虹咧唱〈望春風〉的形影，伊的腦海內隨浮現 九二一大地動彼年的往事。
彼時，林彩虹佇新加坡聽著故鄉發生天大地大的災難，隨交代隨身助理陳碧霞匯台票兩百萬轉來幫助災民。落尾，伊閣聽講彼陣「彩虹歌友會」會長廖幸雪蹛佇故鄉埔里的爸母，因為這擺地動不幸來過身。
地動一禮拜後，林彩虹轉來台灣，陳碧霞陪伊去埔里安慰失去雙親的廖幸雪，順續捐助一批日常物資予在地的受難鄉親。伊佇埔里攏總蹛五日，彼幾工伊佮所有災民仝款，暗暝睏佇臨時搭的布篷內面，一點仔都無大明星的屈勢。
欲離開埔里彼日，林彩虹用歌聲安搭受難鄉親的心情，伊佇眾人面頭前唱〈望春風〉，消敨逐家一時的憂悶。
遮的畫面對陳碧霞來講，親像近在眼前的記智仝款。
彼暝，兩點外鐘的追思會，予愛慕林彩虹的歌迷永生難忘。
散場了後，有濟濟人猶毋願離開現場，一直到甲夜靜深更。
──2012.7.5寫佇赤崁南門仔
2013.4《台文戰線》第30號
文章定位：
