百萬入門款豪華敞篷車開賣 三代同堂出遊露營最佳車款最新!投信連續3日買超股 天天刷牙仍有牙菌斑 沒...
2001-09-25 14:01:01 | 人氣(563) | 回應(1) | 上一篇 | 下一篇

【台語散文】羊蹄甲佮我的十七歲

推薦 0 收藏 0 轉貼0 訂閱站台

[羊蹄甲與我的十七歲](台語散文)/陳潔民

  人若是過了三十歲,可能攏會開始懷念少年。拄佇新年過了無偌久,我就寫了即首詩,算講是對家己少年時的一種紀念啦!

[秋天的腳步]

秋天的腳步
遠囉,遠遠行過
親像過往的記智
就安呢一去無回
樹葉仔惦惦落置土底
飄轉旋,旋落的是我彼咧
永遠袂閣轉來的十七歲

彼叢羊蹄甲
靜靜開著粉紅的花
點著幾蕊茄仔色的胭脂
猶原置人行道的斡角
徛甲直直
飄送著伊野喟的清香
鑽入我十七歲的舊夢

彼年的我
有一粒容易感傷的心
掃土跤的時陣
提著大枝大枝的竹帚
總是真不忍心
將羊蹄甲的落花
掃入去畚箕底

羊蹄甲的落花
宛然慢動作彼款
逗逗仔置空中轉旋
親像我不再回頭的十七歲
已經落置土底
隨著秋天的腳步
對我的生命中遠遠行過

  十六、七歲的時陣,我捌為lo2 lo2瘦瘦的羊蹄甲伊青翠閣有精神的枝葉中間,赫仔紫紅、粉紅色雜雜作一夥的花蕊與芳味沉迷過……,彼時陣並嘸知影伊的芳名,會記得彼當陣我很迷「似曾相識」彼齣電影,閣私底下將羊蹄甲號名作「似曾相識」,逐擺若是看到伊,就會想到女主角佇電影中攝的那張相片
,耳孔邊閣會響起影片中彼個音樂箍仔的音樂帕格尼尼變奏曲咧!
  讀高一的時,教室佇彰化高商的明德樓,樓前是歸排的羊蹄甲,嘛號作紫荊花。伊歸日攏飄散著迷人的芳味,透早的拼掃時間,我的空課就是負責掃彼一排舖著潽色石板的路,就是紫荊花生長的所在。我逐工必須愛提著大大枝的竹帚,將落花掃作一堆,才閣底入去畚斗內,若是無做好即個空課,阮即班就很歹提到整潔競賽的冠軍。所以,我總是佇每一工透早六點半的時陣來到學校,開始拼掃。嘸閣,遂總是佇每一個不得不揮落掃帚的動作中間,為家己的殘忍感覺驚惶。而且,很歹無家己自我責怪,感覺家己袂輸若像惡毒的老巫婆,雄心刈傷一個清麗佳人的臉容彼
一般,就做出了「黛玉葬花」的憨代誌來矣。
  我驚人笑,攏是趁同學無注意,就給花掃作一堆,然後提去教室後壁的黃土底埋矣,閣誠感覺悲哀,傷心嘸咁離開。彼時,我閣亦袂讀過「紅樓夢」彼本冊中「黛玉葬花」彼一段。也若無,應該袂安呢做啦,因為「東施效顰」,學甲無像就漏氣矣。但是,我的良心責備並嘸是到即時就準煞,我亦會佇週會的時間上台代表阮即班領整潔競賽的獎牌的時陣,深深自責家己對伊的冷酷無情咧!
  大學時,又閣一擺佇校園內拄到羊蹄甲,幾落年無見,猶然叫我為伊清新脫俗的嫷驚喜。即擺相逢了後,我開始恰意佇歸排的羊蹄甲樹跤抾花蕊;嘛真愛坐佇樹跤思考代誌;若是夯頭看去,排歸排的翠綠與紫紅,伴隨著陣陣的芳氣,迎面而來,實在使人感覺心情攏清雅起來;而且,我真歡喜家己嘸免閣做彼個雄心的老巫婆,做什麼拼掃美麗的空課。佇大學內底,羊蹄甲伊清純的美麗,袂閣是一種錯誤,嘛袂閣一種罪過。我真愛看落雨了後的羊蹄甲,因為,彼時陣伊的芳氣袂甚野,袂輸赫仔過頭芳的胭脂粉味,攏互雨水沖洗清氣,干單飄散著純純的清芳,佇落雨過
的空氣。
  羊蹄甲,總是使我想起十七歲彼年的心情。真儕年了後,開車經過彰化市郊,佇街路的斡角洶洶看到伊的影跡,我充滿思戀的心情越頭甲看過去,干單看到兩三欉的伊,恬恬徛佇人行道頂頭,伊的丰采猶然親像過往的印象赫呢嫷,我對伊的懷念嘛猶然赫呢深。









台長: 陳潔民
人氣(563) | 回應(1)| 推薦 (0)| 收藏 (0)| 轉寄
全站分類: 圖文創作(詩詞、散文、小說、懷舊、插畫) | 個人分類: 自然哲理 |
此分類下一篇:心蓮一蕊/陳潔民
此分類上一篇:寫互雲的詩

阿呆
借問一下
『紫荊』台語發音是?
2017-03-13 12:36:43
我要回應
是 (若未登入"個人新聞台帳號"則看不到回覆唷!)
* 請輸入識別碼:
請輸入圖片中算式的結果(可能為0) 
(有*為必填)
TOP
詳全文