食道瘤卡胸?北慈突破胸... 杜拜煙火幻燈秀開啟2018好股票加碼的兩個時機 ?雅人、高?充希共演夫...
2014-05-03 00:33:02 | 人氣(1,096) | 回應(0) | 上一篇 | 下一篇

【台語散文】秘密

推薦 1 收藏 0 轉貼0 訂閱站台

【台語散文】秘密  

文:陳潔民 2013.07.22初稿2014.01.27定稿

 

自細漢到大漢,到昑馬行入中年,這四十外年來,我熟識未少朋友,毋閣有的人昑馬已經無算是我的朋友──怹卡早捌做過我的朋友,有的人甚至是我的知己,有久年的交情,嘛真有話通講。

 

為啥物到路尾,怹會變成毋是我的朋友?做朋友的這段期間,論真講起來,嘛無發生過啥物代誌,抑是產生啥物誤會。怹就焉爾恬恬仔、沓沓仔,位我的生活中消失嘍!消失甲無影無跡,莫名其妙,完全失去聯絡。

 

茫茫的人海,越頭,已經無怹的眼神看顧。

 

當然,可能有人會講,這號作緣份。

 

緣份是啥物?緣是空間,份是時間。本來有空間、閣有時間做朋友的人,是焉怎會變作無空間、無時間的人咧?──真正是位有緣行到變成無緣。

 

有一個朋友伊講:「緣是天意,份是人為,緣有天意嘛是業力所感召而來的;份是自我超越的人為部分。這攏需要『般若』的觀念佮智慧來自我引導,才未枉費咱這世人。」伊講了真好,我誠同意。

 

我佇遮閣補充一個看法,我認為「緣要前世訂,份要今生圓。」若無前世訂的緣(因),今生就無圓的份(果)矣。為難的是,業力難轉,佳哉只要咱用功修行,佇果報抑未成熟進前,抑是有轉變的機會,只驚咱毋肯下定決心用功,人心不死,就會甘願再三輪迴。

 

 朋友的交情消失,失去聯絡,若是用「因緣」抑是「緣份」來解說,是真有道理,毋閣若是卜認真揣出原因,嘛是可以。我除了檢討和反省家己做人的態度以外,閣發現一件趣味的代誌,我遮的消失的朋友,怹有一個共同點--就是怹攏向我講過怹性命中一個不堪回首、未當向別人講起的「秘密」。

 

對啦,應該就是這個「秘密」。

 

這個秘密,是怹佇一時的情緒,抑是感性的氣氛之下,忍未稠,就將怹性命中一個天大地大的秘密,直接向我講出來。講出來了後,怹就要求我保守秘密,我嘛差不多攏會答應,只是心內感覺怹真奇怪,既然是「秘密」,為啥物赫爾想卜講予我知。

 

了後,我為著遵守約束,一直真忠實來保守怹向我講出來的「秘密」。

 

奇怪的代誌發生矣!自從我知影怹的秘密了後,和怹的交情竟然開始起波湧,沓沓仔產生變化。位卡早的「知己」、「好朋友」,變成「普通朋友」,愈來愈客氣,本來閣會約出來食飯、飲咖啡,變成只存通電話,閣來存通電子批,閣來失去聯絡,總講一句,我變成一個怹準講佇街仔路拄到,嘛無想卜主動和我拍招呼的「生份人」。

 

怹選擇無卜閣和我聯絡矣──主要的原因──就是因為我已經知影怹彼個無人知影的「秘密」。若是看到我,就予怹想到怹的秘密被我知影,從此以後,怹無法度閣再用自然、開闊、真心的態度和我鬥陣矣,因為怹的「秘密」佇我的面頭前是透明的,因為怹未自在矣!

 

而且,怹閣會煩惱怹的秘密是毋是會予別人知影。所以,怹佇咧秘密講煞了後,心內攏真後悔。上害的是,怹煩惱我會安怎看待怹,而且閣會家己一直烏白想,想講我到底是安怎閣安怎看待怹──怹就一直用頭殼內的妄念,折磨怹家己的心。總講一句,怹後悔,真誠後悔。後悔竟然會一時衝磅chhiong-pōng,甲我講這個無想卜予人知影的「秘密」。

  

只要若是想到我、看到我、和我聯絡,就予怹想到怹有一個秘密去予我知影嘍!焉爾怹的壓力愈來愈大,無法度去接受這層chân代誌,所以甘願失去我這個朋友,只是為著卜予怹的生活加卡自在。

 

是啦,知影一個人的「秘密」,變成一種「原罪」,竟然比無信上帝閣卡嚴重。予我失去了朋友,嘛小可仔感覺失望,怹為啥物毋相信我會平常心看待怹咧?

 

因為拄過幾個朋友焉爾,所以,以後誰人若是卜向我講出怹的「秘密」,我攏會請怹考慮詳細,上好嘜講卡好。因為我驚怹講了後會感覺後悔,然後決定和我絕交。

 

而且,怹永遠就看未清楚,其實自頭到尾,怹無法度面對的,並毋是我這個知影怹的「秘密」的人,怹無法度面對和無法度接受的,其實是怹家己過去的性命經驗佮記持。

 

唉!我只好向逐家宣布:若卜繼續做我的好朋友,唯一的條件就是──請你嘜向我講出你的「秘密」。

 

──刊於《台文戰線》20144月號,第34



本文已同步發佈到「文創空間」

台長: 陳潔民
人氣(1,096) | 回應(0)| 推薦 (1)| 收藏 (0)| 轉寄
全站分類: 圖文創作(詩詞、散文、小說、懷舊、插畫) | 個人分類: 友情之思 |
此分類上一篇:【台語詩】內心戲

我要回應
是 (若未登入"個人新聞台帳號"則看不到回覆唷!)
* 請輸入識別碼:
請輸入圖片中算式的結果(可能為0) 
(有*為必填)
TOP
詳全文