子洋之前話過, 匯進練波, 冇咩system, 我諗, 其實呢樣野大家都知道, 因為匯進冇教練, 所有野都係由d 舊人去諗, 練d 咩, 做d 咩。
不過, 過o左個聯賽之後, 大家都希望o係黎緊o既呢一年裏面, 練波要有system d, 要有目標咁去練野, 同埋加強番我地每個人o既基本功。
上一個week, 大家都唔得閒, 所以冇練到波, 到o左尋晚, 又有得練波喇, 我都好期待, 因為對上一次練波, 個氣氛好好, 所以我都希望今次係可以係咁。
不過, 第一樣失望o既, 就係原來尋日得八個人黎練波, 真係唔講都冇人知呀。 阿水唔會黎, 阿峰整親, 女巫唔得閒, 咁所以就得番八個喇。 不過都ok 啦, 八個要練都練到野o既, 咁就開始練波喇。
第一樣野, 阿細就叫我地兩個兩個, 搓下上手各十分鐘, 我覺得好好呀, 因為咁就證明o左阿細真係想執基本功啦, 咁我同CKL 就搓波喇。 我好like 搓波, 因為來回球多, 所以可以慢慢咁執下自己d 姿勢, 我都執到自己好正o家, 球球都練到自己用腳俾, 哈, 冇計啦, 遲d 仲要做教練, 一定要要求自己再高d 先得o家嘛。
不過, 唔……我見到o既係, 唔係個個都執正自己d 姿勢囉, 我都仲見到有隊友係用手去打個波, 咁落去, 就算練好耐, 都唔會改善到太大。 我想出聲, 不過又冇出到, 因為…又有邊個會聽我講呢? 我又唔係教練!! 不過, 我見到高飛搓上手, 我就忍唔住叫佢張開d 手指, 哈, 我知佢會聽我講o家, 不過, 我都知佢聽完之後都改唔到, 冇計啦, 佢都習慣晒喇, 而家先要佢改, 我諗都有d 難度!!
好喇, 搓完波, 咁就做一打三啦, 阿細打, 我地守, 今次好明顯阿細都要求高o左, 要我地俾靚d 個波去setter 位, 都好o既, 要求高d 當然係一件好事啦。
做完兩round, 阿細要守波, 咁我就去打, 哈, 第一次呢, 平時教人果陣我就打得多喇, o係匯進都係第一次ja。 不過阿細, 高飛同alan, 咁當然同我平時教果d 非常咁唔同啦, 都幾難打得佢地死o家, 不過alan 腳步就比較慢, 要執執喇!!
一打三之後, 咁就做側滾, 阿細就諗o左一個方俾波我地救, 救完之後就做個側滾起身, 唉, 好可惜, 我都估唔到, 匯進裏面, 竟然會係咁多人唔識側滾o家wor!! 我仲以為側滾係排球裏面一樣好基本o既野黎tim!!!! 加上阿細我諗佢應該冇咩教過波, 所以佢方法都比較難練到我地要練o既野, 咁我有見及始, 咁就俾o左d 意見阿細, 同佢講下俾波俾去邊啦, 同埋我地可以點去接。 阿細好好人o家, 佢都好接受我o既意見, 不過, 大家都唔識做側滾, 其實練呢個都係冇用。 所以, 我就捉o左子洋去一邊, 諗住教佢側滾喇, 點知…真係唔怕得罪講句, 打乙組連側滾都唔識, 好似有點兒那個囉, 到我做好心, 教下子洋果陣, 佢就好似覺得好funny 咁, 我就真係唔覺得funny 喇, 竟然要由頭教起, 不過, 唔識都要學到識o家啦, 所以我都會try 去教佢, 不過, 未教完, 阿細就覺得唔好花d 咁o既時間去練側滾, 咁就做o左另一樣野喇!!
阿細諗住練接一傳, 咁就輪住去開十幾球波, 兩個stay o係度接波, 做完一round 之後, 我又覺得有少少問題, 咁當然我又俾o左一d 意見啦, 咁run 落都覺得會順暢d。 做呢個練習, 做o左非常耐, 因為每個人都要接波, 所以做o左好多round, 不過阿東開波就勁攪笑, 佢好似收唔到力咁, 一開, 就一定飛到去最少十二米, 勁!! 而我呢, 我就見到好多隊友o既姿勢唔正確wor, 咁我又盡我自己o既能力, 諗住幫下佢地啦, 點知, 換o左番黎o既就係一個灰字囉!!
可能, 個個隊友, 都覺得我打得差, 平時又俾孖仔指指點點, 久而久之, 我就變o左一個打得差o既人, 好喇, 到我而家想俾意見隊友果陣呢, 灰爆啦, 冇人聽下我講o家wor, 好似當然講o既野係錯咁, 聽完都當耳邊風, 仲覺得我講笑咁。 我知, 我自己係打得差, 不過唔代表我唔識教, 我有o既係基本concept, 我諗係非常o岩隊友用o既, 不過, 我打得差o既形象深入民心, 攪到而家, 我想幫手o家, 冇人聽o者, 當我講o既野係廢話咁囉, 冇咩野o既, 咁我都好識做, 既然大家當我流o既, 咁我唔出聲囉, 就算見到邊個邊個姿勢差, 邊個邊個手形唔好, 都話好波好波咁, 我諗我就only 可以做呢樣野喇!!!!
好失敗呀, o岩o岩前日上完教練班, 尋日就睇驗到俾人當我冇到o既感覺, 真係一個大挫折, 自己樣衰囉, 唔出聲, 咁就唔駛打破自己o既自尊。 我諗, 輝sir 講得o岩o家, 讀完個course, 最多係可以教到學界o既B grade, 我諗唔可以教其他人o既原因, 就係會俾人睇少囉, 咁簡單!!!! 技術, 阿細係勁過我好多, 不過講到教波, 尋日係得我一個識教, 我知應該做d 咩做d 咩, 我識咩叫做systematic, 不過, 我o既知識, 我諗冇機會幫到匯進, 都係等住去教呂明才同天嵐啦, 起碼人地會聽我講野, 起碼人地會去學我教o既, 起碼我有番自尊。
好波!!! 勁呀!!! Good ball!!! 我會掛o係我o既咀邊。
PS: 呢篇日記唔係講笑的, 希望唔好籍此黎取笑我吧!!
23/6/2003 風四字
文章定位：
