瘋語童路 瘋言瘋語記低童年走過的路。 【瘋語童路】是也~~~

215愛的鼓勵 0訂閱站台

多數行山都係同同事去行, 今日就唔同喇, 同tony 佢地一班去行, 都好似係第一次ja~~

今日係熱o左d, 不過都ok 啦, 我同banly plan o左去行麥理浩徑o既第一二段, 唔係太難, 應該都ok o既~~

一早就o係市中心食早餐, 食完之後咁就去搭車, 出到去坪石附近就轉小巴入西貢。
今日我地好齊人, 原本以為會得我, kamen, banly 同tony 四個, 但係franky, 政文同肥蒲(p 仔) 都黎埋, 咁就有成七個人喇。

搭車去到西貢, 咁就去買野啦, 點知買買下就收到今日第一個惡號, 就係tony 俾公司急call 番工...好快就走o左喇...唉...得番六個~~

好喇, 買完野咁我地就去搭小巴入去起點, 呢條路我非常咁熟啦, 去到, 做下熱身, 之後就起程喇。 麥徑第一段係好易行o既, 雖然有十公里咁長, 今冇上山落山, 所以要黎熱身就o岩晒喇, 但係...都未行完1 km, franky 同kamen 就話俾我呃o左喇, 事關一開波就要上一段大斜路, 哈...冇計啦~~

上到去有平路喇, 今日都幾晒, 所以我一早就叫定佢地帶傘, 如果唔係上到西灣山就死得人喇。
今日都好開心, 因為有得影相, 次次行呢度都係練山, 冇得慢慢行, 今日終於可以慢慢行, 欣賞下風景喇。

我地每一支標距柱都影下相, 慢慢行, 又好多時都休息, 所以都比我地預算中慢o左d~~ 終於去到東壩尾個亭喇, 黎到呢度就差唔多完第一段, o者係差唔多行o左一半, 但都係辛苦路段o既蒞臨。
o係度休息o左好耐, 又食下野, 之後都決定繼續行, 咁我地又起行喇。
下一站, 浪茄, 好靚o家, 今日終於可以行下個沙灘喇, 經過咁多次, 都係o係側邊經過, 今次就唔同喇, 可以行入去欣賞下一個咁靚o既海灘。

當然今日冇預到黎游水, 咁就睇o左一陣咁我地就繼續行喇。
過o左浪茄就黎料喇, 因為要上西灣山, 真係唔講得少, 大家做定心理準備就行上去喇。

上呀上, 上呀上, 上下又停下, 今次行當然冇之前咁趕頭趕命咁辛苦啦, 去到中間我地就可以休息一下, 回o左氣我地又去繼續喇。 繼續上山, 今次冇咁笨喇, 梗係搵d野講下啦, 咁我地就玩結尾故喇~~ 講都冇人信, 玩玩下話咁快就到o左山頂喇~~

上到去又休息, 休完息咁我地就落山喇, 落呀落, 落山都可以落到腳震o家~~
一落就落到去吹筒坳, 咁因為我地時間唔夠, 而且kamen 都好累喇, 咁我地就決定去西灣食埋個tea, 之後就行番轉頭去西灣亭走人~~

落到去西灣, 搵o左間茶座, 食餐蛋麵, 順便打埋俾tony。 食完野就行番轉頭, 咁我地就行去西灣亭喇。 食完野果然係唔同d, 行o左廿多分鐘咁就到o左喇~~
果度已經有的士, 咁就好快就走得人lu~~
打的一直出到去西貢, 之後搵埋tony 咁就去食海鮮喇。 我地去o左洪記度食, 其實就唔係好識o家ja, 不過應該間間都差唔多o家啦~

坐底就去揀海鮮食喇, 真係好多海鮮呀, 花多眼亂, 最尾我地揀o左五樣野就埋位等開餐喇~~
我地叫o左有大聖旨, 花螺, 扇貝, 蝦, 仲有就係超大隻o既墨魚, 不過我地要半隻o者~~

開餐lu, 好豐富o既美食, 真係好好味, 好味到我地一滴不留, 樣樣清呀~~
banly 因為轉新工, 咁就被屈出o左五舊, 最尾每人都唔駛二百, 我覺得ok wor~~

食完大餐, 咁就食滿記, p 仔都被屈, 請我地食~~ 多謝晒兩位~~ :D

呵, 好開心, 有得行山, 有得影相, 仲有得食海鮮, yeah!!!

7/5/2006 風四字