嘉義布袋戲團"三昧堂" 教做春仔花.傳承技藝

嘉義在地的表演藝術團體三昧堂，有一身號做時間女神的布袋戲尪仔真出名，尪仔的戲衫頂懸用誠濟春仔花做妝娗，三昧堂這陣舉辦免費的春仔花教學，推廣的布袋戲佮這項傳統手工藝。

大人囡仔逐家攏專心共手中的線一輾一輾纓做春仔花，嘉義縣在地的表演藝術團體三昧堂，最近免費舉辦春仔花體驗的課程，推廣這項傳統手工藝。
參加民眾 馬先生表示：「(春仔花)閣袂䆀，因為伊的材質，線遮的物件，攏誠特別。」
參加民眾 林小姐表示：「我感覺誠特別，閣誠新奇，嘛會當增加囡仔的注意力，我感覺袂䆀。」
三昧堂創作的精工布袋戲尪仔當中，有一身造形誠特殊，號做時間女神，伊的戲衫毋但代表台灣數百年的歷史演進，閣使用誠濟春仔花來妝娗。時間女神捌綴海軍敦睦艦隊去到帛琉展覽。
三昧堂藝術總監 嚴仁鴻表示：「時間女神規身軀的春仔花有三百蕊，一蕊一千箍計共愛三十萬，所以伊是阮目前三昧堂的鎮館之寶。」
三昧堂表示，當初因為這身尪仔，才有機會佮彰化鹿港的施麗梅老師合作，了解春仔花嘛拄著傳承的問題，所以舉辦活動來推廣，希望民眾認捌這項代表祝福佮喜氣的傳統手工藝。