讀初中的記持
之一
我是 1962年入去「清水中學初中部」。阮彼年初一有十一班，一班50个總共550个。查埔的7班，用甲乙丙丁的順序，查某的四班，用智仁勇禮的順序。我是夆編入1年庚班，是按怎會編入去第七班，是隨機的（Random）抑是照入學考試的成績？到今我猶毋知。
毋過，實在講我無偌認真讀冊，當然部分的原因是佇厝裡攏愛鬥做工課，主要應該是家己猶未開竅，成績就普普仔。彼陣，逐禮拜攏著愛用毛筆寫週記佮寫大字，我攏有照起工寫。升二年是照一年的成績重分班，我就分到丙班，二年三年攏是丙班。彼陣乙丁己是好班，甲丙戊就毋是好班。
之二
會記得清水中學初中部入學考試，阮彼年國語的作文題目是「清中大禮堂」。應該是彼年拄起好，是真氣派大間，當時海線的學校上大間的禮堂——這是後來入學以後才知的。當時應該新聞有報導，蹛附近的人應該攏知。毋過，阮蹛追分的是毋知半項，彼陣猶毋捌看過報紙咧！
會記得彼篇作文嘛是我家己用想的，發揮想像力嘛寫甲一支柄，有考牢應該是寫了無偌䆀才著。閣較好笑的是，阮老師𤆬阮這陣同學坐7點07分追分發的火車到清水中學，考試前猶是佇「清中大禮堂」外口的樓梯邊仔等，猶毋知彼就是大禮堂咧！看起來阮老師嘛料想袂到會出這款的題目。
之三
初中的三年，逐工早起行到追分車頭坐7:07開的火車去清水讀冊，欲暗仔坐清水5:07開的火車轉來。會記得是穿一雙10箍的「兵仔鞋」（軍便鞋），襪仔是穿無偌久糾帶（kiù-tuà）就會冗去，襪仔就會勼入去跤底。攏是衝衝碰碰坐火車去讀冊，學校轉來就鬥做工課。追分車頭攏是經過爾爾，罕得佇遐停留。
拜六是上早起時四節課，中晝就會當轉去，毋過，會記得12點外的彼幫火車是趕袂赴，攏是坐兩點外的彼幫轉去。
之四
彼時學校是允準使用兄長用過的冊，只要提去學校確認頓印仔，就毋免買新冊矣。好佳哉阮表兄嘛讀清中懸一年，我初中三年就攏用伊的冊，這就予我每學期減省幾十箍的冊錢，這對阮這款的散赤家庭是真大的幫贊。阮表兄是頂真清氣相的人，冊攏無皂（tsō）烏，到今猶足感謝阮這个表兄。
之五
會記得當時的中晝頓是紮便當去學校，學校是用蒸氣來用予燒，阮攏叫做「吹便當」。逐工早起同學到位就共便當囥入去便當籠仔，人到齊值日生才扛去吹。我的便當菜，攏是卵佮配鹹，配鹹是家己豉（sīnn）的醬瓜仔抑是菜脯。當然看著同學有人是魚魚肉肉，講會欣羨袂？當然是誠欣羨，我會記得當時是毋敢去想！
彼當時兩个小弟佮我攏差兩歲，仝款咧讀冊攏愛紮便當，阮a̋u（阿母）用兩粒卵摻麵粉抐予齊，煎做3个便當的菜，當然是鹽囥甲濟咧較會落喉。大漢了後，捌有機會共這个「兩粒卵做3个便當」的代誌講予人聽，攏無人欲相信。
佇阮a̋u（阿母）破病佇台中入院的彼站仔，著家己攢便當。無啥菜通紮就想著：紮米去吹做飯嘛紮一屑仔糖，飯燒燒摻糖做米糕食，紮幾若擺攏袂䆀食。毋過有一工學校吹飯的蒸氣機煞壞去，袂用得吹飯。捌人的冷飯猶會用食，我是白米浸水！今害矣！落尾，會記得是去福利社食一碗一箍的摵仔麵做中晝頓。
（240822Tong-îng）
文章定位：
