告訴我 每天都要讓自己大笑三聲．．．．有益身體健康唷！！！！

14,413愛的鼓勵 40訂閱站台

 

透早柱欲開車出門，我迄台心愛的自動車仙發都袂起動，一點仔反應都無。今日是新春第一工上班，呣去擱袂用得。 趕緊牽著水某的腳踏車出來，來去火車頭看有柱好的火車班會用坐冇？

 

真好佳哉，水某的腳踏車過年前才換過內外胎，那冇即聲著麻煩啊。

 

尚好佳哉是我要猶擱會曉踏腳踏車仔，阮後生前工有寫一篇「三十五年後的我」，文章內面講三十五年後，人攏貧憚冇愛振動身材一粒那球咧，一切攏靠電腦完成。

 

厝來有四台電腦但是，但是目前冇半台電腦會凍送我去上班！難道三十五年後會出產，會凍送人去上班的電腦嗎？

 

凡勢有喔！現在的科技攏是咱細漢的時袸，根本冇可能的發生的夢想，但是現在攏出現在眼前，不過三十五年後我已經超過八十免上班啊！

 

自從高中畢業後，踏腳踏車的機會就道蓋少啊，看著街路上騎車趕上課的高中生，想起迄袸的我嘛是青春年少，如今騎著腳踏車的我卻是兩個囝的老爸。

 

時間底過真是佇不知不覺中流失，突然間越頭才知影做人老爸已經幾落年啊！

 

以前曾經有坐早班火車的經驗，這的時間通車的學生真濟。迄時袸有鳳中、鳳商、雄女、雄中以及雄商的學生。

 

迄袸佇車頂，高中生攏會扎一本冊認真讀認真背，每一個人攏掛一枝目鏡，冊包是大大的褙甲強欲瘾痀，可能是冊讀規暝的款沒一個有精神的。職業學校的學生卡少人咧看冊，大部份攏安靜安靜坐咧厾龜。

 

透早坐這班通勤電聯車人冇蓋濟，頭前坐三個高中生，手機仔是唯屏東講到鳳山，欲落車猶擱講賣煞，講一寡少年人的言詞是聽攏無！我甘真正赫濟歲嗎？抑是對時代無著？

 

唯後庄起來一個，頭戴葵笠面包著包巾，擔一對竹籃的阿婆。

 

可能是唯鳳山擔菜來賣的，上車後伊共葵笠摕落來剝開包巾。

 

看伊頭毛象蔥根是白蔥蔥，面皮上佈滿歲月的痕跡，歲月仔歲月．．．，這種年紀有人也擱會凍擔蔥賣菜，但是嘛有人踮在安養院沒囝孫咧底看顧。

 

所以有人講：「老來身體健康，會凍自在行動才是福報！」

 

到甲鳳山站阿婆欲共葵笠戴起來的時，迄頂葵笠煞去勾撌破徛佇邊仔，穿短裙迄位水姑娘的絲襪仔。

 

阿婆一直共迄位姑娘講：「失禮、失禮．．．」

 

水姑娘笑瞇瞇講：「阿婆冇要緊啦．您免掛意啦．．」

 

一雙絲仔襪是冇偌濟錢，不過透早才粧甲水水出門絲襪道被勾破，有的人是喙講冇要緊，但是表情是喙烏面土擱凝面腔。

 

這位水姑娘冇共阿婆計較擱笑瞇瞇，這位姑娘真正是人水心嘛水。

 

2005.05.01刊載於　海翁台語文學雜誌第41期