噚晚收到容西個 msg 話要搵臨記，不文人就拉埋威仔去，容西就留左個聯絡人既電話俾我地。
本來話十點半嚮尖咀123 disco門口等，但等極都唔見人，咁o岩見有個大姐又嚮 disco 門口，威仔就走去問佢係咪聯絡人 S 君，點知搞錯左，不過佢都係黎做臨記既~吹兩吹知佢原來係讀 CU 政政的，正是陳暗既師姐叫阿 wing，世界真係細…
阿 wing 打電話俾 S 君，S 君叫我地等住先，佢地要遲少少到…天氣異常酷熱，大伙兒就搵左間榮x茶餐廳坐下。哩間榮x既茶奶真係好唔掂…飲飽食醉後就收到電話 call 我地上去disco隔離間大廈既三樓一間bar開工~間bar唔算大，有一個水吧，一個大廳同兩間 K 房。班工作人員嚮大廳裝工具，我同威仔、wing 就嚮間K 房呆了好耐先出場…
初初係海俊傑同Amy(理大來的臨記呀…)做對手戲，咱們就做酒客，之後仲有好多場係海俊傑既戲嚮間bar度拍，我地都係走走踼踼…第一次見海俊傑，佢好玩得呢，成日吹水講笑，對臨記都唔錯，仲得閒提點下我地添…
(不過唔知係咪同我地開玩笑…
海：「唔…你一個人坐嚮度扮飲酒呀…」
不文：「唔…」
海：「噢~你個位嚮鏡頭邊喎…唔…千祈唔好以為鏡頭見唔到你，拿~你就…幻想你失戀…你走婆走佬…而個奸夫係…你老竇…要憔悴d!!!記得要入戲呀，千祈唔好以為你冇入鏡，ok~俾心機!!」
不文：「…」)
期間 yoyo (陳自瑤…唔係浪子瑤瑤)黎到片場，威仔真係睇到佢痰上頸，係咁話佢靚，連wing 都睇埋一份，願來wing 有睇女既嗜好…聽S 君講，yoyo好nice，冇架子的。
唔知做咩，不文人做做下酒客變左做水吧佬嚮水吧度調酒，一個人守水吧，仲成日做背景穿穿插插…不過可以睇住海俊傑、amy同yoyo做戲，都幾過癮的~
拍拍下有難得一見之象，爆燈。且說amy企嚮水吧側邊準備行入大廳同海俊傑相撞，剛要開始之時，呯呯聲嚇親我同amy，不過導演未叫 cut 又唔敢郁…好在打燈佬知咩事，立即走去聲源~原來amy 側邊兩個射燈爆左…打燈佬話燒燈就見過，爆燈就真係第一次，仲要連爆兩粒…好在amy冇俾玻璃界到…
話說不文人同yoyo都有過一段接觸…(果陣不文人仲未知yoyo 係乜水…)
yoyo入水吧飲水(佢唔飲酒唔食煙，同煙剷海俊傑好大對比。)，不文人咁o岩要入水吧埋位…唔小心俾果一小梯級絆倒…心道：「仆街?!」…冇咁易~一手就扶住吧檯。
「你冇事丫嗎？」
「冇事~」
「小心d呀~」(勁溫柔的 @.@ )
「唔…」哩個時候先望望佢，心道：「邊度黎個化左妝既靚女臨記？！」…
(不文人拎起個杯玩)
「你係度扮調酒呀？」
「ar…係呀…」
「哈哈~」
導：「埋位~yoyo行開先。」
不文人心道：「邊個yoyo？」…
一望…噢~~~~~~~回眸一笑百媚生！
妖媚…妖媚…天道無常…
話又說回~海俊傑雖然亦係煙剷，都係會講下粗口講下笑，但都冇肥媽果d 咁變態(聽老暗講的…)，佢好似好怕悶，成日搵人傾計，不過咁亦係frdly既表現~同佢嚮水吧吹左陣水，原來佢喜歡飲燕京啤，仲覺得正過青島添~而不文人同佢都認為喜力好難飲…(佢把聲好實，好有男人味~)
片場真係好多笑料，話說有一場要拍yoyo發晒姣咁撩海俊傑，之前準備果陣，海俊傑就周圍問人：「如果有一篤新鮮既屎，俾一百萬你要你食左佢，你肯唔肯？…五百萬呢？…一千萬呢？…一億呢？」當時yoyo點都話一定唔肯，仲同海俊傑講道理，而海俊傑又繼續「曉以利害」，兩個人都勁認真咁傾，睇到我地係咁笑。Wing 唔知我地笑咩就問我，我諗住同佢講果陣，海又插口對住wing講：「阿女呀~阿女，如果俾一百萬你叫你食一篤新鮮既屎，你肯唔肯？…一千萬呢？…」wing搖頭，海：「問親你地d 靚妹仔，個個都鬼咁矜持，都唔知一千萬幾難先搵到…分分鐘做一世戲都冇~唉…d 錢未擺嚮你地面前你地緊係咁講~阿 x 君就唔同~佢話俾一千萬佢，佢含住舊屎一日再吞舊肚都肯呀~錢唔易搵咖阿女，有人俾錢你做咩唔要~」=.=” (海個樣有d無奈…其實海心入面都覺得唔應該為左錢唔要尊嚴，但世界唔係你想點就點，生活迫人…) 大家又係咁笑…拍yoyo發姣，做緊d嬌艷動作表情果陣 (睇到我地眼都凸埋…阿 wing 仲話起晒痰添…)，班燈光、場務都圍住導演部電視機仔叫到嘩嘩聲，搞到 yoyo面都紅晒…
話說為左做到頭髮飄飄下既效果，就搵把風扇住 yoyo係咁吹，最頂癮係放煙佬阿余哩個時候放煙，把風扇好似抽氣扇咁將d 煙抽晒去yoyo塊面度，煙薰yoyo…嚇死阿余…
臨尾影住水吧佬不文人抹杯，用黎做過場，不文人隻手相信會店用全片既三秒鐘…不俗不俗…
拍完後諗住哩次係義助，冇人工收就閃人，點知出去一陣就俾人call番黎，原來有車馬費收呢~咁好彩返去果陣嚮電梯大堂撞到要去第二個片場既yoyo，wing把握機會佢影相，仲開心到手忙腳亂搞跌野 =.=，威仔同不文人都同yoyo影左張相，威仔成機貼近yoyo呢 ^^ ~yoyo真係好nice，唔知冇批盪果陣既佢係咪都係咁靚既呢？
做臨記真係好好玩，雖說一百蚊車馬費多，但見識到好多野，亦識到唔少朋友~多謝容西介紹！
唔使指意嚮電視機入面見到不文人，因為哩套野係無記用黎外銷的。多謝各位。
世界真係細~
文章定位：
