31/7
心情唔多好，不過見肥賊兄弟叫到，跟賊以及淫唐出去逛逛當散心，點知有好多意外收獲~
哩次算唔算麻甩佬香港遊既其中一站呢？管他媽的，總之正啦~點幾兩點去搵間叫樂香園既茶餐廳，係賊話見到報紙介紹，好似好正喎~搵左都算耐(出街搵人帶路最好唔好搵肥賊…)終於搵到…哩間兩層茶餐廳都算正~真正地道舊式茶餐廳，好多野都有好耐歷史，喜歡懷舊既人一定鍾意。無論係卡位、吊扇、空氣清新機、水牌…全部都係歷史~去茶餐廳當然係要試下d 野啦!!!果度d 奶茶同菠蘿油簡直一流，特別係d 菠蘿油，即使係凍左都勁香勁好食，難以言喻~可恨唔可以試下剛出爐既菠蘿油，相信一定更好味…可惜呀!!!!!!!!中環威靈頓街15c 「蛇竇」…一定要再去!!!
之後湧去書展，排左超過半粒鐘，又熱又焗…不文人件衫都「白化」，不過老子都忍得住，很不容易入到會場…由於怕遲來的搣時支持唔到排咁耐隊，就建議佢唔好join我地，搣時唯有自己一個人嚮外面行左幾個鐘…
書展入面真係接踵摩肩，完全令不文人反感，買書係一種樂趣，但書展入面一定搵唔到~但係書展入面有大量書籍，絕對可以滿足不文人，見到一大堆書放嚮度，真係大飽眼福~雖說周圍都有書店，但可以一次過見到咁多書俾你選購，我諗香港任何一間書店都做唔到。行過雁門攤檔，見到好多正野，不文人發現稀世奇珍《墨子》，當然不容放過!!!而由於不文人發覺莊子原文好難明，順道買埋文言白話對照既《莊子》，合計一百，抵到冇得再抵~(以五十蚊價錢買到稀世奇珍《墨子》，咁都話唔抵???你冇病呀嗎???)本來想要埋同一叢書既《文心雕龍》以及《世說新語》，但又有猶豫…仲有好多好多好多好多愛書，不過時間同金錢都係問題…
行左好耐，怕搣時等到唔耐煩，就離開會場去食dinner。賊話想去北角食排骨麵，一聽不文人就知邊間~不文人同肥賊在普查期間都在北角區工作，果間叫「金祥」既餐廳點會冇去過丫~去到食番出晒名既排骨(其實係炸豬扒)飯，味道真係好好，不枉佢咁出名~除左排骨既味道，仲有回憶既味道…幾大對比…
食完去北角村，以前細個成日同媽黎…學肥賊話齋，我阿媽好識享受人生，觀塘碼頭有海鮮佢唔買，偏偏要坐小輪過北角買…之後嚮北角村附近游弋，咁就係一日假期。細個唔明阿媽做咩咁笨，只知有得去側邊間茶餐廳食野，陪佢都冇所謂，而家先知哩d都係一種享受…可惜北角村已經係一個地盤…冇人賣魚…冇茶餐廳…冇我阿媽既縱影…冇細路既縱影…只有在新巴開出時，在塵土飛揚中尋找一個個好矇矓但溫暖既回憶…
馬寶道鬼屋~嚮肥賊既憶述下終於得見，果然有鬼屋既氣派!!!人係怕黑?!怕鬼?!定怕死?!人怕恐懼…原來搣時都幾細膽既…
番屋企大覺訓…唔知仲有冇機會再周圍行下呢~嚮遊歷間得到好多，搵番好多，希望仲有機會再咁行下啦，真係令人感到高興…
好多野都只可以嚮夢度搵番…或者幾年後…我只可以夢見馬寶道鬼屋…
1/8
下午收到細路消息，佢俾介紹人呃，而家既情況係俾人「賣豬仔」，兩頭唔到岸…做大佬既異常唔咁心個細既俾人咁玩法!!!不過夜晚約左賊佢地再會書展，唔可以等佢放工番黎斟斟…
又係要等勁耐先入到去…此行多左得閒冇事幹既大王一齊，好事好事…雖然大家既「目標」唔同…決定要將《文心雕龍》得到手，不過見住最後一本俾個阿嬸買左…係親眼見住…
行到書展打烊先走…又俾肥賊老點，行左好耐先搵到個巴士站…
機會應該點把握???
我細佬「把握」，結果俾人「賣豬仔」…
我放棄，換黎點點後悔…
2/8
今晚同細佬吹下對策，有結論，希望件事快d 了結~
諗住湧去毫四屋企，點知毫三又臨時失蹤…兄弟聚會不了了知…
ron 會戰期間媽又痾又嘔…即刻離場陪佢睇醫生…
麻煩事、令人傷腦筋既事總係圍繞人咖喇~不過又唔使湧住黎既…
如果係命運之神玩野，我死左之後一定走去打佢一身~
不過哩個世界冇「神」!!!
文章定位：
