今日本來有個單身女子約會，不過尋晚做功課做到差唔多成4點先訓… 都係想早d返屋企休息下。
好鐘意自己一個人係屋企，好舒服，宜家唔同以前，好難有d自己獨處既時間，所以會特別珍惜。
呢個新年都玩得幾盡興，不過初五果日就慘d，做功課做左成日… =(
年初一
細佬叫極都唔起身，所以今年第一次自己一個人出去拜年。去到阿女麻度，例牌都係食飯啦，食糕啦，二姑媽做莊聚賭啦，大姑媽唱k啦，大笑啦。夜晚得返我係度食飯，都係食返晏晝d野。個花車巡遊好好睇呀! 又有跳舞，又有打敲，仲有好多好特別既表演! 大冰都有份係disney果team呀，不過望到實個mon都望佢唔到 :p
現場睇實好正啦! 不過年年都要拜年，都係惟有睇電視啦。
佢地照例去阿婷屋企拜年，我都係例牌唔去，太支力喇…
年初二
去阿婆度，有好好味既年糕~
今年個靚仔都係度過，不過佢都唔理我地既，成日自己走左去同d friend玩。
肥肥姨媽拎左佢去哈爾濱隻3分鐘環遊世界特輯俾我地睇，真係笑鬼死…
夜晚同羊仔去左睇生擒霍老爺。我冇睇第一集，覺得都ok啦，可能呢類戲都唔係咁岩我睇，都唔識笑。
我同羊仔都覺得宜家過年好無聊，以前細個就好玩得多喇，又有沙炮，又有煙花，又有魚蝦蟹玩。宜家拜年就成為左同某d屋企人一年見一兩次既機會lu。
年初三
去左老丸屋企玩，有大冰、傑輝、劉偉、姨姨、pixie、阿叻、阿仁同埋fanty。去到佢地開緊檯，之後又玩uno。可惜我唔方便，周身唔自在，結果要係老丸間房訓左成個鐘先冇事。打完邊爐，玩左陣pictionary，都仲係咁好玩，阿仁依然係咁勁! =)
之後返元朗同佢地睇constantine, 奇洛李維斯好型呀! 套戲都幾好睇，幾鐘意佢果種tone同埋節奏。成個故意都幾新鮮，不過有d位都係睇唔明，要睇完問返人先知 :p
年初四
約左係又一城睇incredibles，今次帶埋李虫一齊，佢又識埋ida pixie佢地喇~
老丸就全程同李虫打交，都冇佢地咁好氣
套戲好好睇呀! Dash好得意，細細粒，佢咁跑係咁跑，哈哈哈
阿媽就好勁，個名都好掂，叫elastic girl，哈哈
反而個老豆就冇乜特別，就係得個蠢字
Jack jack都好得意，最鐘意佢最尾突然變左團火，好搞笑呀，哈哈!
睇完諗住去旺角買公仔，點知講講下走左去唱k，因為大家都好耐冇唱，都好想唱呀! 都比我想像中平啦，話晒年初四又係星期六。例牌唱左神奇同埋十分十二吋，次次唱都咁開心! 今次仲唱埋203040添! 最好笑係老丸唱心病，有句歌詞係「明日我會再上班 從前途著眼」，佢唱唱下問我:「咩叫途著眼呀?」… 真係笑死我呀…..
唱完仲要去埋trendy zone買公仔，咁又搞到11點幾先走喇… 真係玩都玩到冇電….
年初五
今日就慘喇，一起身就做功課… 鬼叫自己之前掛住玩咩…. 真係好唔想做呀…唔係唔想幫佢，不過真係好難做…
文章定位：
