踏話頭
一般tek，佇台語文壇佮學界有一種類似定論的看法：林宗源（1935-）是戰後頭一個用台語寫詩的作家。毋過，關係林宗源的頭一首台語詩到底是啥物時陣所創作？到這陣猶tsiânn歹有定論，因為專家、學者佮作者本人有各種無仝的講法。其實，佇文學史上是毋是會tsiânn做偉大、受人敬重的作家，佮伊是毋是頭一個寫詩的人，一點仔tī代都無。
另外，ùi日本時代hānn過戰後，重要戲劇家宋非我（1916-1992）的406 tsūa長篇故事詩〈蓬萊仙島〉，佇近年來出土。宋非我這首詩是佇二二八事變了後，逃亡去中國所創作的。咱來讀第一段：
台灣東海岸的山嶺，∕自北至南無一塊斜，∕像從海底直疊起來的，萬石壁，∕除了山禽鳥隻∕無人敢來徛帶彼啊。
雖罔ùi tsit-má的角度來看，〈蓬萊仙島〉這首詩的詩質無kûan，毋過，46冬前會當寫出406 tsūa的長篇故事詩，確實無簡單。
若講著林宗源的代表作，khah tsia̍p予人提起的差不多攏是〈講一句罰一元〉佮〈人講你是一條蕃薯〉。其實，筆者khah致意的是林宗源罕得有的225 tsūa長詩〈剪一段童年的日子〉。咱mā來讀第一段的摘句：
天猶是昨日的天∕無張持∕水螺嗚出一聲歷史的陣痛∕阮忍受五十年有身的苦情∕被強權欺騙、刣割、創治的日子∕總希望趕緊生出「愛」的世界
台語詩的兩條路線
宋澤萊佇幾仔篇評論文章裡，講著戰後台語詩大体上分做兩條路線：一條是現代詩形式（自由体詩）、一條是向台語歌借形式的韻文詩（歌詩）。
因為受台語本身豐富的音樂性佮台語歌謠的影響，使致濟濟詩人佇初開始創作台語詩的時，自然tek會寫出韻文詩。筆者佇創作的初期，mā寫袂少這類的詩。
咱代先來看歌詩部分的詩人佮作品。
台語歌詩佮詩人出場
宋澤萊（1952-）上出名的詩〈若是到恆春〉、林央敏（1955-）傳遍海內外的〈嘸通嫌台灣〉攏是台語歌詩的代表性作品。咱鬥陣來讀這兩首詩：
若是到恆春∕就要落雨的時陣∕罩霧的山崙∕親像姑娘的溫純（節錄）
咱若愛祖先∕請你嘸通嫌台灣∕土地雖然有較隘∕阿爸的汗，阿母的血∕沃落鄉土滿四界（節錄）
戰後推sak台語文學充滿運動細胞的黃勁連（1946-），絕大多數的台語詩攏是歌詩体的形式，咱來讀伊的〈夜雨兮港口〉：
捾著漂浪兮行李∕漂浪千萬里∕飄飄來夠日本北陸∕日本海兮海邊∕踏著淒迷兮夜色∕行入夜雨兮日本國度∕夜港口兮暗暝（節錄）
1990年代中期以後，黃勁連牽教的學生群內底，許正勳（1946-）佮藍淑貞（1946-）kiám-tshái 受老師的影響tsiânn深，使致in的大部分詩作攏是以歌詩体為主。親像許正勳的〈曝鹽〉、藍淑貞的〈磨仔心〉攏是顯例。咱來讀這兩首詩：
日頭赤焱焱∕照著一格一格兮鹽埕∕雙跤踏水車∕一下懸一下低一直拚∕卜引海水入淺坪（節錄）
阿母的面∕親像磨仔心∕佇我的面頭前∕踅啊踅 踅啊踅∕踅甲出茫霧∕踅甲出彩虹（節錄）
另外自90年代初才開始創作台語詩的慢熟詩人莊柏林（1932-）佮華文作家路寒袖（1958-），攏寫袂少歌詩的作品。親像莊柏林的〈苦楝若開花〉、路寒袖的〈畫眉〉。咱作伙來讀這兩首詩：
苦楝若開花∕就會出雙葉∕苦楝若開花∕就會出香味∕紫色的花蕊∕隨風搖隨雨落（節錄）
天星伐過小山溝∕伊个影綴著泉水流∕流到咱兜个門腳口∕咱捧著星光啉落喉∕啊，冰冰涼涼感情相透（節錄）
台語現代詩的各種類型
戰後台語文學運動滾絞到這陣超過20冬，佇詩的部分，取得khah大的成就佮美學層次khah懸的是自由体的現代詩形式。特別是最近這10冬（1998-2008），優質的詩作盡出，好的台語詩無論佇詩質、技巧各方面，已經無輸予華語現代詩。近年來，台語詩人佇各種文學獎取得袂bái的成績，某種程度thang看做一款指標性的作用。
下底筆者以主題做分類，舉例指出台語現代詩豐富、多彩的面貌。
01愛情詩
代先出場的是：佇世界上任何一種文學攏tsiânn做重要主題的愛情詩。愛情詩會tsiânn做重要主題，實在是天地所設，毋是弟子作孽。愛情詩一般tek來講，參著一沿romantic的滋味，自從宋澤萊佇2001年提倡寫實情詩了後，愛情詩就加一味生活性。下底咱將愛情詩分做浪漫情詩佮寫實情詩來紹介。
01-1浪漫情詩
浪漫情詩部分欲紹介的詩人有：林宗源、方耀乾（1958-）、陳潔民（1970-）等。其中，林宗源近年來上致意的是伊所謂的「性詩」，咱選這首khah無「限制級」khùi口的〈無禁忌的激情〉予逐家鼻芳：
無禁忌的激情∕親象萬重的風泳∕捲落碎碎的海岸∕無法阻擋的愛（節錄）
方耀乾的愛情詩，絕大多數是對牽手的綿綿情意，《予牽手的情話》第五首，寫出世間平凡的翁某之愛，這首短詩筆者特別意愛：
敢講干那咖啡杯才會當扒出愛的船∕敢講干那戲園內才會當擦出愛的火∕敢會記得 十元兩把的蕹菜∕嘛寄付咱的愛
陳潔民的〈行入汝ｅ畫框〉，浪漫柔美，讀會出女性詩人的詩風特質：
有一個人∕行入汝ｅ畫框∕淡水ｅ美景∕佮伊ｅ形影∕攏畫佇捷運ｅ大車窗∕作伙浮現眼前∕美麗色彩，抹出畫中ｅ人生（節錄）
01-2寫實情詩
寫實情詩部分欲紹介的優質作品有：宋澤萊的〈秋天ｅ溫暖〉、王貞文（1965-）的〈檸檬蜜茶〉、蔡文傑（1975-）的〈生命中的花蕊〉等。咱分別來讀這三首詩：
我陪伊去台北考試∕轉來小莊腳∕已經日落黃昏∕我猶會記，彼時正在秋割∕郊外金黃色ｅ稻穗遍野∕值夕陽之下，金爍爍（節錄）
秋天ｅ早起霜凍凍∕懸懸ｅ天青藍純潔∕後花園ｅ一角∕你挽著兩粒檸檬∕霜凍過ｅ果子冰冰∕咱相遇ｅ目神暖暖（節錄）
彼工，春天來敲我的窗仔門∕目睭擘金，妳咧給一位病人鬥穿尿布∕自彼陣∕善良的妳就沿著雨水的腳跡∕位窗仔墘勻勻仔流入我的心槽∕偷偷仔徙入去我的心肝穎仔（節錄）
02政治詩
台語詩自底佇台灣社會就是邊緣性的戰鬥文体，自然tek，佇運動初期政治詩的書寫量相對會khah濟。咱來看三位詩人用無仝的手法，展現政治詩的光景。下底咱分別來讀李勤岸（1951-）的〈海翁宣言〉、林央敏的〈蓮花火穎〉、蔣為文（1971-）的〈ㄅㄧㄠ ㄨˇ〉：
阮無愛koh新婦仔形∕痀痀khiā tī遐∕講家己是一條蕃薯∕Hō͘豬食koh hō͘人嫌∕從今以後阮beh身軀掠坦橫∕做一隻穩穩在在ê海翁∕背向悲情ê黑水溝∕面向開闊ê太平洋（節錄）
你淪落暴政的烈火中∕一直鍛煉台灣人上散赤的人權∕費五冬血汗，來清洗咱的驚營∕亦挐破獨裁者施展四十年的鐵幕∕為言論自由開一管風，吹入台灣∕逗逗光復被人奴役去的腦筋（節錄）
這是受降的日子∕mā是化粧舞會的暗暝∕阮將beh來進場∕tī武裝憲兵kap便衣部隊的注目下∕希望∕用快樂的舞步∕佔領總統府（節錄）
03鄉情詩
鄉情詩欲推薦予逐家的作品分別是：陳明仁（1954-）的〈做穡〉、向陽（1955-）的〈阿公的煙吹〉、周定邦（1958-）的〈運河悲喜曲〉等。咱作伙來走揣失落去的鄉愁：
雨水未落ê下晡∕日頭bih tī粿笠á頂∕鋤頭hioh tī肩胛頭∕白鴒鷥巡稻á chōa∕草踏青天kap雲影∕溝á水 悠悠á流∕Liâu過ê所在lô-lô-lô∕四kha-á hioh tī水底ê土崙á內∕樹á kha∕Chhu一層陰涼∕Gín-á kap牛搶這頂∕ 發草ê眠床（節錄）
古早古早，阮看∕阿公的煙吹是日落時陣∕蒸煙的煙筒∕對每一戶破爛的厝頂∕飄出美麗的渺茫的故事（節錄）
一隻一隻的白鴒鷥∕展開含笑的雙翼∕飛入半世紀前的記持--裡∕歇佇 中正路尾渡仔頭邊∕彼隻暝日為著三頓咧走chông∕歸身軀黃褐褐的漁船邊（節錄）
04地誌詩
2008年4月，文建會出版《閱讀文學地景》新詩卷，內底選錄四首台語詩。老實講，筆者認為代表性佮藝術性有khah不足。Tsit-má我仝款選出四首地誌詩，請各位讀者來做公親。下底咱分別紹介陳正雄（1962-）的〈安平追想曲〉、方耀乾的〈五妃廟落日〉、林文平（1969-）的〈行過蘭陽平原〉佮胡長松（1973-）的〈棋盤街路ｅ城市〉：
風∕猶是吟著仝款的旋律∕湧∕猶是拍著不變的節奏∕日頭∕是頑固的曲盤∕重覆放送彼個心酸的故事∕海鳥∕是痴心的歌手∕一直唱出彼首悲傷的老歌（節錄）
彼條白色的布條∕摧死一個時代∕鄭氏上媠的五蕊花∕淒豔三百十七冬
攢過雪山長長的磅空了後∕向守佇太平洋外海迄隻∕古意的龜請安∕問伊最近敢有卡消瘦∕蘇澳飄過來的風∕著隨來相借問（節錄）
值某一個十字路口∕會使建立你ｅ原點∕將菜市仔、西藥房、修車場、文具行、剃頭店∕學校、診所、郵局、銀行∕運河、鐵枝路、天橋、港口∕囥入座標∕閣有你時常散步ｅ∕小公園（節錄）
05故事詩
Kiám-tshái筆者對台語長詩有khah大的期待，相對phīng一般詩khah長淡薄的故事詩（50 tsūa跤兜、抑是以上的詩），是我偏愛的類型。下底紹介四位詩人的作品──柯柏榮（1965-）的〈台灣街的教示〉、周華斌（1969-）的〈櫻花之戀〉、楊焜顯（1969-）的〈前進个跤步聲〉佮陳金順（1966-）的〈珊瑚潭之戀〉：
「迒（hāⁿ）入十七世紀的戶橂（tīng）∕倒手展開世界航海史∕正手搵海風練筆尾∕密密膏膏水上絲路∕北迵（thàng）日本長崎∕南貫印尼巴達維亞∕箍一條黃金帗（phu̍ah）鍊∕帗鍊的嚨喉珠仔∕結一粒綠火璇（sūan）∕火璇頂面浮三字∕台窩灣（節錄）
無可能放未記∕因為妳上佮意的さくら（SAKURA）∕逐冬攏會開花∕咱少年時代的故事∕嘛會先佇心肝底熘（liū）過∕一擺閣一擺∕酸澀甘甜∕尤其故事的頭尾二段……（節錄）
前進 前進 閣前進∕走街先 救人先行一步∕踏入惡化青年个烏名單∕總督府警察現代性的水螺∕秒針分針時針針針催逼∕押入彰化街个烏牢∕教示你重秤文化啟蒙个輕重∕和仔先 你先行一步（節錄）
青春ｅ行李綴原鄉ｅ船出帆∕漂浪萬里他鄉徛成故鄉∕你雄心如星，掖遍嘉南大地∕你跤步若鐵，行出開天意志∕春夏秋冬踅十輪∕四箍笠仔畫生活座標∕烏山頭水色清清∕映照烏金碇骨ｅ面容（節錄）
佇海外吟唱故鄉的詩篇
陳雷（1939-）佮胡民祥（1943-）久年定居異鄉，雖罔分別以小說、散文徛在台語文壇的位置，不而過，in的詩猶原透濫厚厚的台灣味。咱作伙來讀〈永遠ê故鄉〉、〈翻頭看〉：
看著是茫茫ê海水，∕思念是遠遠ê故鄉∕三十年飛鳥teh流浪，∕故鄉，∕我ê故鄉（節錄）
一九八二年正月落雪天∕阮老爸捷捷翻頭∕看伊的後生，奈何∕行去機門的通道∕短短無幾步，煞落去∕十五點鐘的噴射雲∕會佫製造十五年的分離（節錄）
話尾：Ùi量變到質變的台語詩壇
經過二十冬來濟濟有志的拍拚，雖罔台語文學猶咧邊緣戰鬥。毋過，量變產生質變這條鐵律，mā ta̍uh-ta̍uh-á發生佇台語詩壇。頂月日（2008年10月），三位以華語詩起家、無仝世代的詩人：張德本（1952-）、陳秋白（1963-）、李長青（1975-）分別出版個人的頭一本台語詩集。向望這個巧合毋thang tsiânn做孤例，筆者相信多數的台語詩人腹腸開闊，袂排斥轉性換筆的詩人參咱放伴戰鬥。
因為篇幅的關係，筆者無法度盡情紹介khah濟好詩予逐家鼻芳。煞尾，咱分別來讀頂面三位回歸母語的詩人的作品〈雨落佇咱查某祖的腹肚頂〉、〈綠之海〉、〈彼粒星〉：
阿立祖換青了後∕規暝攏落袂停的雨∕雨滴聲叮叮咚咚∕落響佇咱查某祖的腹肚頂（節錄）
無人逃會過水的目睭∕彼若春泉∕含著綠色元素的目睭∕踮石岩佮土地的肚臍頂∕順雪的懸度爬起去∕去到遠古冰冷的坑谷∕去感受 攪滾的風雲（節錄）
欲睏的暗暝∕一陣風吹送過來∕挲過頭殼裡底坎坷的∕詩句，牽連著∕詩人的意志佮決心（節錄）
──2008.11.11寫佇赤崁米街
2008.11《台灣文學館通訊》第21期
文章定位：
