終於，有命在四日三夜後回來了。
其實一開始並不是太想去細O，可能一來係SoHo O’ Day玩得開心，去到細O就要mix埋其他department既人，感覺怪怪地咁……（雖然明知身為BA人，識得人多係一件好事…）二來係入camp之前知道自己入左Shaw，感覺更奇怪，planning好似一下子被打亂咁……知道入左Shaw 0個個moment，我呆左三秒，第一件事就係諗到我O’ Camp會唔會變得好恐怖？有傳Shaw既人玩得好癲…第二就係諗到我會唔會唔夠船去exchange lor……（咁當然呢個係杞人憂天啦，讀都未開始讀～！）
究竟我呢四日三夜做左ｄ乜？
哈，呢個問題我during camp既時候都問過自己，但除左嗌四七dem beat之外，我真係諗唔到ｄ乜。五位組爸組媽都唔係讀HMG（Hotel Management），變左選科唔係太幫到我，地方就始終行熟左ｄ既……不過，肯定既係，四日三夜後，我既感覺唔同左……
Day 1，剛入camp，開始發現我係玩緊一個mini size既大O，形式同我想像中好唔同……第一次見大組長感覺『奇怪』，全部人要肅靜，唯大組長馬首是瞻，好有希特勒式個人崇拜feel……【後來知道，大組長係代表全college既靈魂人物，呢個係特意營造既形式……hee，關於大組長，一陣仲有野寫～ ^^】
我既組mates冇話個個好active，不過女仔個個都幾肯玩幾肯嗌，而我都有一個跳舞好型既組媽Dilys&一個搞氣氛既組爸Cyrus～大家可能慢熱ｄ啦，組內氣氛唔算十分熱烈咁……命中註定，我鮮有在此類情況下遇到一班active既人…（By the way，可能先入為主，相比之下，我愛SoHo老豆阿達多ｄ，同外貌無關，而係我真心feel到佢有heart…亦係佢有份影響我對Shaw& O’camp既態度～遲ｄ講！）
時間慢慢過，我開始適應個camp，玩beat玩cheers愈來愈熟，夜晚Treasure Hunt熱到件tee濕晒都在所不計…其實好玩與否，在於自己係咪投入：「既然入左camp，點解唔試下投入去玩…入camp唔玩可以做咩？」入camp之前阿達咁講過；如果因為個college頹而唔玩，咁你去邊度都會係頹過架啦～過得開唔開心，在於你點揀點玩je…！何況Shaw guys真係喪架，食宵時完全表現出……
四日三夜，我總共sleep左七個鐘，但可能natural high啦，玩緊既時候勁精神，不過一坐低我就想訓…第二晚本來唔會玩咁夜，兩點鐘沖完涼gather左一間房玩，原本打算四點鐘就散，但途中ｄyr 2-3老鬼不斷加入，連大組長 + 四個影子都入埋黎，二十幾人逼入一間雙人房，由玩game到熄燈講偵探鬼故，中途加插大組長批准&協助下，組爸Cyrus於組仔女面前示範被con + 發表感受～～結果？玩到朝早6:12先返房，一個鐘頭後起身繼續活動……
講到大組長，請容許小譚美用100字歌頌下先，因為…靚仔！（我知道呢個答案好冇水準，but sorry…原諒我）Day 1 just覺得佢幾好啦，但因為日日見多左，加上另外三個colleges大組長既綠葉襯托下，不少Shaw freshmen不論男女，都認同我地敬愛既大組長係最靚仔～！起初CC既大組長都可以比較下既，但最後始終由我地大組長既左邊酒渦 + 染得靚過佢既頭髮領先勝出！形象所限，第一次見佢既時候有ｄcool，但之後大家一齊玩，佢真係幾nice + 玩得～而Day 3既war of cheers，SC同UC交換camp tee，當眾除衫下大家再發現佢身型勁fit～一個字，型！
Day3 半夜12點進行最後一個節目：出沙角鸷食宵～一坐低，個個先開一枝Diamond / 生力細啤，yr 2 and above個個開始隊酒猜枚，我地組亦慢慢加入戰圈，皆因組mates有跳舞好勁既Ivan，靚女阿羊，Night Show為Shaw爭苐仔一對幾個男仔，贏足大半場而成為全Shaw焦點既阿Joan～個個走過黎敬酒，我地都慢慢high晒，猜枚猜酒猜Å，噴汽水鬥舞鬥酒嗌beat嗌cheers（連續跳左三次meal gap呀陰功），加上一班癲左既老鬼，我地好似拆左人地大排檔咁，百幾米以外既公廁都清楚聽到我地ｄ噪音～凌晨兩點幾先返宿，隔籬公屋報警都得～玩得一ｄ都唔斯文，high係high，但冷眼旁觀一下，玩到咁喪，成班人仲要著黑色衫，似黑社會多過大學生……投入不代表盲目，有ｄ部分我仍然不能認同，例如互片，抬高自己炒high氣氛絕對冇錯，但我無法理解點解要用敏感話題去貶低他人……成件事，忽然變得無意義。但我明白其實BA已經算係斯文，唔係太過火，自我安慰，唯有當遊戲看待啦。
呢個camp發現自己另一強項：作四七～！我成為組內出貨不停0個位，一日出三四set，大約五分鐘出一set～CU呢個「習俗」都幾考急才，短時間內出押韻四行七字slogan，玩得多，訓練腦部思考都唔錯～！通常出完都係我lead埋，（又成為我粗魯又一力証，帶四七唔駛用咪，仲要俾組mate讚我有氣勢=.=……）除左ｄ少少尷尬四七就拋波俾男仔，事關雖然係我作&撐大組長係main theme，但我始終唔想一個對住百幾人大嗌「我愛ｘｘ」……唔係咁好嘛～不過呢一組就一定要再抄一次：
『四一仔女好福氣
組爸組媽有心機
裝飯斟水湊我地
大嗌一句我愛你～！』
不過……我既責任，last三個字repeat得唔夠多就俾我收左，唔夠完美……組爸媽真係好辛苦，區區幾句唔夠多謝佢地～～
有人話讀大學必做5件事：讀書、上莊、住宿、拍拖、搵錢，我一定做唔到住宿先，其他…唔知啦～玩完camp，見到其實Shaw未必如想像中咁頹，一樣有值得玩值得enjoy既0野～而家我既小組+大組長全家福就放於電腦檯上面，感覺…係我大學三年一個美麗開始，而家我可以講既係：I’m glad to be in Shaw！
【P.S.呢篇日記有好多中大BA terms，我諗唔係人人睇得明～唔明的話我可以嘗試於留言板解釋～BA有好多cheers玩，可能形式同其他細O唔同，但若果有人他日入左CUBA，恭喜你～真係要把握機會玩喇～！】
Tammy
23rd August, 04
文章定位：
