坐佇牛車頂，瞻（tann）頭看天，夜暗天色濛霧，天頂的月娘毋知走佗藏？一刻鐘前，佇溝仔尾庄楊家拄欲睏佳睡（ka-tsūe），予砲仔聲、鑼鼓聲pin-pin-piàng-piàng吵睜神，頭殼猶踅（se̍h）神踅神，三、兩下手就予清國兵仔扺（tshi̍h）落塗跤兜，雙手綁揜（iap）後，押上牛車頂。朱一貴規身軀破毿（sàm）破毿，頭毛散夯（giâ）夯，目降鬚氅（tshàng）袂輸監囚，伊這陣（tsūn）是清國朝廷的頭號戰犯。
牛車硞碌（kho̍k-lo̍k）硞碌，透暝唯（ùi）諸羅縣溝仔尾庄起行，沿牛稠溪一路向（ǹg）南，這暝風透，岸邊規遍（phiàn）的菅芒予風搧（siàn）甲咻咻叫。押朱一貴遮的殘兵敗將的清國兵仔，隨個啊隨個寒甲加凜損（ka-lún-sún）。毋過，暗頭仔予楊家兄弟灌酒拍茫的朱一貴，這時頭殼嶄然仔（tsám-jiân-á）清醒，往事一幕一幕浮出伊的腦海。
Wagi五歲彼冬，綴（tùe）老母Isip唯Siraya大目降社盤山過嶺遷徙來羅漢門。伊猶會記，怹（in）的田園厝宅毋那（nā）予漢人佬仔（láu-á）用一領鹿仔皮騙（pián）去，閣較（khah）淒慘的是單純、古意的老爸，嘛予佬仔蹧躂（tsau-that）甲血崩山來離開這個苦情的世間。伊永久永久攏會記得，彼暗怹兩母仔囝佇透風落雨的暝裡，包袱仔凊采（tshìn-tshái）款款咧，連暝走路離開故鄉。伊永遠會記得，遮的畫面一直牢（tiâu）佇伊的頭殼底，毋捌放袂記。
Wagi綴老母行幾落暝日，身軀無半銑（sián）所費，常（tshiâng）再枵（iau）飢失頓，腹肚便若大腸告小腸，怹就挽人種佇路邊的果子佮菜蔬止飢。一步一跤印，一步一滴汗，毋知行幾暝日，怹母仔囝來到山路坎坎坷坷，不止仔揜僻、山內斗底的羅漢門。寢（tshím）來羅漢門的時，Isip參人做山穡，伊雖罔有Siraya查某人天生刻苦耐勞的本等，不而過，儘管伊逐工唯透早做到透暗，嘛干單勉強維持一家兩粒頭嘴的三頓（tǹg）爾爾（niā-niā）。
無偌久，蹛佇羅漢門鴨母寮一位死某拄對年，號做朱旺的中年人。有一日經過Isip咧做山穡的所在，去予Isip剎（sah）著頂八卦。Isip兩蕊重絢（tîng-sûn）的大目睭，烏甜媠（súi）啊烏甜媠的皮肉佮面模仔，予死某的朱旺看甲嘴瀾（nūa）水喢（tsha̍p）喢津（tin），尤其是伊久年勞動包佇粗布衫仔內面彼兩粒婷婷婷的奶，使得朱旺的下身強強欲接（tsih）載袂牢。朱旺央託媒人婆仔講親晟（tsiânn）、看好日，簡單備辦幾桌仔酒菜宴請庄裡的厝邊頭尾，歡頭喜面給（kā）Isip唯破草厝仔娶轉去伊搭佇鴨寮邊的土埆厝，Isip嫁人做後岫（siū），Wagi綴轎後踏入朱家的戶碇。朱旺嫌Isip佮Wagi的名番仔番pì-pà，咬舌歹喚（hiàm），就給Isip號漢名花，Wagi號漢名一貴。
朱旺佇鴨母寮飼鴨通人知，頂庄有名聲，下庄真出名。朱旺做人海派、朋友廣交，不時你兄我弟招招來鴨母寮食鴨肉配燒酒，三教九流攏挺（thìng）好成（tsiânn）做座上客。一貴自七歲起，就綴老母佮後叔參一大陣鴨仔盤撋（núa）感情，會使講袂輸死忠兼換帖的。講嘛怪奇，一貴逐日舉一枝懸（kûan）伊兩倍長的竹竿咧趕鴨仔，毋捌聽伊喝忝（thiám），伊叫鴨仔往東怹就往東，喚（hiàm） 怹落南絕對毋敢上北。無偌久，一貴就展現出領袖的氣質，成做庄裡的囡仔頭王。
朱旺啉酒毋知通準節，閣再加上操勞過度，佇一貴十歲跤兜煞來斷腦筋離開世間。自按呢，母仔囝相依為命，佳哉朱花儼硬（giám-ngē），捍（hūann）起飼鴨家業閣有淡薄仔樣相。不而過，本名Isip的Siraya堅強女性朱花，嘛佮朱旺仝款因為操勞過度，佇一貴18歲的時，無講無譫（tànn）來魂歸離恨天。
18歲的朱一貴，生成高戕（tshiâng）大漢，身懸六尺以上堂堂的查甫囝。踵（tsíng）著老母兩蕊重絢的大目睭，烏金碇骨的皮肉。這時的伊，佇鴨母寮飼鴨早就通人知，頂庄有名聲，下庄真出名，一點仔都無輸予斯當年的後叔朱旺。一貴做人併（phīng）朱旺閣較海派、廣交，閬（làng）暝無閬日，你兄我弟招招來鴨母寮食鴨肉配燒酒，三教九流攏挺好成做座上客。伊一枝竹篙壓倒規陣鴨的功夫，天跤下無人通比，逐家心服口服喚伊「鴨母王」。
高戕大漢、身懸六尺以上的朱一貴，雙手雙跤夆（hông）綁咧牛車頂，嘴焦喉渴（khuah），欲講偌艱苦就有偌艱苦。毋過，好漢敢做敢擔當，伊心頭掠定，無咿哼（hinn-hainn）甲一聲半句，橫直頭伸出來是一刀，頭勼（kiu）入去嘛是一刀，20冬後猶是英雄好漢。牛車硞碌硞碌，唯溝仔尾庄沿牛稠溪一路向南，岸邊規遍的菅芒予風搧甲咻咻叫。欲到八掌溪墘進前，雄雄嘩仔（hûa-á）一下，雨捙桶倒，眾人匿（bih）無路。這個時陣，無論是領月俸的清國兵仔，抑是放某放囝夆綁咧牛車頂的落難好漢，天公伯仔對怹攏無私無偏，隨個啊隨個沃甲澹（tâm）漉漉、漉漉澹。朱一貴瞻頭向天，粗枝強猛（mé）的雨箭無時停，一點仔都無咧同情伊落難，一直射落來、一直射落來……，射著伊的面底皮，射迵（thàng）伊的筋骨，伊全然無顫悶（tsùn-būn）著，伊目睭展大蕊，唯伊目裡看出去，看著一枝續（sùa）一枝的紅色雨箭，一直向伊射落來。
朱一貴目裡紅色的雨箭，無一搭仔久就斷點斷點。天拄拍潽（phú）光，押送朱一貴等人的牛車陣，來到八掌溪墘下茄苳福建水師提督施世驃暫時安營的地場。施世驃是助清國滅鄭氏王朝的大功臣施琅的第六後生，受老爸致蔭，施琅死了後，康熙皇帝賞賜伊傳承福建水師提督的官位。坐佇營帳裡的施世驃老神在在，當伊看著徛（khiā）咧面頭前這位六尺以上、規身軀破毿破毿，頭毛散夯夯，目降鬚氅袂輸監囚的人，伊隨臆（ioh）出對方是清國朝廷的頭號戰犯朱一貴。唯朱一貴展大的兩蕊目睭裡，施世驃讀出一款毋捌看過的堅決意志，伊知影朱一貴毋是普通的腳數（kioh-siàu）。若無，欲哪有法度佇較無半月日，箍偎（úa）30萬群眾，佔領台灣、諸羅、鳳山一府三縣大遍的土地。施世驃心內暗靜咧想，設使今仔日伊參朱一貴毋是對敵，減采舖排佇目睭前的是英雄惜英雄、好漢疼好漢的場面。
伊激一個威嚴的面腔，對朱一貴歹聲嗽：「朱一貴，見著本官猶毋跪落？朝廷對待百姓仁德深厚，是按怎恁欲徛旗造反？你敢（kám）知罪？」
朱一貴目睭展大蕊凝（jîn）施世驃，「哈！哈！哈！」大笑三聲，「查甫囝跪天跪地、跪老爸佮娘嬭（lé），無跪恁遮的貪官污吏。設使康熙知影仁民惜物、造福百姓，我朱某人敢有才調出來徛旗造反？即馬（tsit-má）落入恁的手頭，欲刣欲剮隨在恁。」
施世驃見笑轉受氣，命令下跤手人舉鐵鎚仔摃朱一貴雙爿（pîng）跤頭窩（u），欲迫壓伊雙跤跪落地。儘管朱一貴雙跤血湤（sai）湤，疼甲強欲泄（siàm）屎，伊猶原牙齒根咬咧，賭強徛在，無哼甲半聲。施世驃看朱一貴不止仔膽漢，無遐（hiah）簡單落軟，隨下令：「即時將朱一貴佮其他反賊，押送北京城受審處置。」
透早鑿（tsha̍k）人目的日頭光，照佇大天后宮面頭前的高台，廟埕前一陣厝角鳥仔踮遐啁（tsiù）啁叫，這座高台是為著中興王朱一貴登基透暝趕工搭好勢的。吉時一到，摳（khau）鐘擂鼓，鐘鼓齊鳴，響亮蔥脆的聲傳遍赤崁城。朱一貴頭戴通天冠、身穿黃龍袍，威風凜凜，一步一伐（hu̍ah）跁（peh）上高台，伊四正四正坐佇頂懸的王座，身軀邊是國師王玉全。朱一貴看唯高台下底，文武官員按照太師、國公、將軍、都督、尚書……的順序排甲好勢好勢。廟埕四箍（khoo） 輦（lián）轉好玄圍觀的百姓揳甲實捅捅（tsat-thóng-thóng），厝邊頭尾的囡仔看著這款生目睭毋捌看過的場面，嘛踮邊仔嘻嘻嘩嘩、跤挵（lāng）手挵。
登基大典起鼓，國師王玉全大武聲宣告：「大明國即日起立國，年號永和，立朱一貴做中興王。第一道禁令如下：凡淫掠百姓者，無論身分，一律就地正法。」王玉全宣告煞，文武官員雙跤跪地，面向朱一貴齊聲喝：「吾王萬歲萬萬歲！」
這時，國公排頭名的杜君英那（ná）想那不服，規膦葩（lān-pha）火無地消敨（tháu）。伊目睭皮睨咧睨咧，目降鬚氅，袂癮（giàn）正眼看朱一貴。伊暗靜咧想：「朱一貴這箍猴死囡仔，憑佗一條理路做王坐大位？」三工前，抗清大軍攻入台灣府城，客籍的杜君英自認是第一功勞者，數（siàu）想欲立家己的後生杜會三為王，本人匿咧後壁面成做太上皇。毋過，伊tiak的如意算盤予眾人拍亂阻擋，逐家公推朱一貴做王。自彼陣起，杜君英滿腹怨恨，墊（tiām）落報鳥（niáu）鼠仔冤的種籽。
實在講，抗清大軍的勝利袂輸秋風掃落葉，來甲雄介介。三工前，對敵兩軍佇春牛埔交戰幾落回合，唯天拄拆ha̍h戰到透中白晝，朱一貴掣（tshūa）領數萬兵眾，親像海湧一湧續（sùa）一湧溢入台灣府城。雙方刀光劍影，人聲馬聲齊聲喊喝，戰甲難分難解。無疑誤，清軍把總楊泰陣前雄雄使（sái）倒頭槌，一刀抵（tu̍h）向總兵歐陽凱，歐陽凱袂赴閃身跋落馬跤，朱一貴部眾做一下圍偎過，給歐陽凱的頭tsûi落來。到遮，清軍大失敗，統領兵眾的總兵大人陣前人頭落地，拍輸走贏的兵眾死的死、逃的逃，一路跤底抹火油──溜辿（suan）到鹿耳門，坐幾落十隻戰船敗走澎湖。事實上，台灣知府王珍佇朱一貴部隊猶未拍入府城進前，就偷偷仔辿去澎湖。這場大戰鬥了後，朱一貴的部隊一睏頭就絞甲超過30萬大軍。
清國官兵拍輸走贏，袂輸揜尾仔狗相續脫逃，朱一貴大軍無拄著啥物抵抗，順序進入台灣府城。當朱一貴的大軍進入城內，沿路雙爿邊褪赤跤、穿草鞋、粗布衫跪地迎接王師的民眾徛甲滿滿是。朱一貴為著安搭被兩軍相殺驚破膽的民心，代先頒布安民令，嚴格禁止部屬做出刣人放火、強掠民女等天地不容的代誌，違反命令者斬無赦。續落拍開府庫、粟倉，給庫銀、米糧分phenn予有功的部將佮散赤的低層民眾。按呢做，毋那安搭驚惶的民心，嘛予府城免除茹（jû）亂的危機。
隔轉工，抗清北路軍攻破諸羅縣治佳里興，清軍參將羅萬倉戰死，頭殼夆剁落來、串（tshiám）咧竹竿頂，部隊大範（pān）大範、沿路送轉來府城獻予統帥朱一貴。到遮，台灣、諸羅、鳳山一府三縣大遍的土地，齊（tsiâu）落入朱一貴的手頭。這時，街裡風聲謗影，一嘴傳一舌喊講鹿耳門外海浮出玉帶佮七星令旗，朱一貴部將認定這是天降聖人的吉兆，怹隨時拍鑼摃鼓前往鹿耳門拜請玉帶、七星令旗轉來服侍（sāi）。講嘛怪奇，當朱一貴的結拜兄弟李勇、吳外來到鹿耳門外海欲拜請玉帶、七星令旗的坎站，天無照甲子，雄雄嘩仔一下，雨捙桶倒，紅色的雨箭向怹兩人一直射落來，使怹目睭一時睇（thí）袂金，等待拜請煞，雨停日出，一切照原。李勇、吳外順利給玉帶、七星令旗請轉來朱營，獻予朱一貴，同時向伊報告鹿耳門外海玄奇的天象。朱一貴聽煞心情嶄然仔定著，干單哈哈大笑。
春天尾，鳳山地界塗牛大翻身、海湧滾蛟龍，海水倒頭灌，造成（tsiânn）民不聊生、活不如死、淒慘落魄的現象。埤仔頭的百姓為著祈求庄仔內大細平安，逐家公開（khui）出錢搬請戲班登台謝神。戲台頂鏗（khin）鏗鏘（khiang）鏘，鑼鼓聲響遍規庄頭。台灣知府王珍接著報馬仔傳來這個消息，硬賴講是結拜兄弟密謀抗租造反，大肆機一睏頭逮捕40外人，唯死的摃倒轉來，隨個啊隨個尻川摃甲腫歪歪，袂輸廳頭咧敬拜神明、公媽的麵龜。
王珍手提方子（hong tsí）出力頓（tǹg）桌仔，逼問墾戶黃阿土口供：「堂下跪者何人？猶毋速速招來？」
黃阿土透世人毋捌看過遮呢（tsiah-ni̍h）大粒的大官虎，煞驚甲泄尿，塗跤一垺（pû）誠大垺，伊那搐那講：「啟稟大…大人，草…民…草民號做黃阿土，是埤仔頭的小…小墾戶。阮無彼個膽抗…抗租造反。毋過…毋過…」
王珍閣出力頓桌仔：「大膽刁民！毋過按怎？」
黃阿土毋敢瞻頭看王珍，伊這回深深吮（suh）一口喟（khùi），做一睏給話講予透：「阮干單偷偷仔走去山頂剉樹仔爾爾（niā-niā）。」
王珍聽著有人偷剉樹仔毋納租，氣甲規腹肚火無地通消敨。另外，連暝閣派人掠百外個埤仔頭庄民，齊齊刣頭，一律斬無赦。
續落來，洲仔尾大雨捙桶倒，三暝三日落無歇，好親像天公伯仔欲做一擺給伊的目屎流予焦仝款。佇海裡掠魚袂赴匿雨的漁民，佮蹛佇海墘仔的一陣散良人，攏有看著一陣一陣的紅雨，一直落無歇。民間風聲謗影，喊講鄭成功的亡魂欲倒轉來報寃仇。嘛有人佇偎海邊的瀨口看著一隻怪獸，踮大雨裡走闖（tsông），落海了後過三鯤鯓上岸，閣唯大井頭軁（nǹg）入台江內海，出安平港了後走甲無影無跡。牠究真是海翁、鱷魚抑是水牛？無甲一個人講會通透。
仝時，鳳山縣赤山地界的火山大爆發，裂開的空嘴有八丈深、四丈闊，烏色的路糊糜仔一直溢出來，暗暝紅色的火光蒸（tshìng）甲丈外懸，燒氣hannh甲幾落里內無人敢偎近。
諸羅山嘛夆喊講山崩地裂，山頂噴落來的塗沙，袂輸血水喢（tsha̍p）喢滴。
若按四時節氣，照理講這個季節刺桐花該當大開，滿城紅記記才對（tio̍h），毋過，今年煞是無開甲一蕊半蕊。
種種變天、玄奇的異象傳遍府城內外，撓（lā）甲規個民心亂操操。世間事無奇不有，閣較怪奇的代誌出現矣。有一日，一位穿插各樣、離經的和（hûe）尚，青碰（pōng）白碰佇安平的街頭巷尾踅過來行過去。便若拄著人，就自稱是玄天上帝派伊來報知台灣人民，四月裡恐驚會歹星入境。「請問大師，欲按怎才會當閃災避厄？」若有人按呢問和尚，伊一概應講：「時到日到，恁愛佇門口埕排設香案，」伊嘴鬚摸兩下，續落講：「用黃紙做細枝旗仔，頂面寫『帝令』兩字，插踮香案裡，按呢自然通消災解厄。」講煞，那行嘴裡那唸：「天機不可露洩，天機不可露洩啊。」
公元1721年（清國康熙60年）4月19透中白晝，赤颺（iānn）的日頭光照佇羅漢門。朱一貴出招52位平素時仔信任會得過的死忠道友，佇鴨母寮煮酒祭拜天地、義結金蘭，成做異姓兄弟，為揠（ián）倒清國暴政拍死無退。雖罔，朱一貴毋是會中歲頭上濟的，不而過，眾兄弟早就給伊當做頭兄看待，逐家順風駛船推搡（sak）伊成做盟主。
「各位兄弟，多謝逐家無相棄嫌，推搡我朱某人成做盟主。」朱一貴倒手搭踮正手面頂，舉到胸前，面對眾兄弟流露真情：「佇清國貪官污吏的界管之下，苦情的百姓早就民不聊生、活不如死。春裡，滿狗王珍心肝歪坦欹（khi）爿，私偏伊的後生做鳳山縣令，爸囝兩人狼狽為奸、為非滲（sám）做，已經造成天怒人怨，到甲天地不容的地步，即馬是咱兄弟揠倒滿狗、徛旗造反的好時機。」
「盟主講得誠對（tio̍h），」三工兩頭捷（tsia̍p）來鴨母寮行踏的黃殿，接續朱一貴的話尾：「這陣是三千年一擺海漲，揠倒滿仔狗上好的時機，天時、地利、人和攏偎咱這爿。盟主通順勢宣稱是大明皇室的後嗣，只要舉出反清復明的旗號，陪綴的百民定著親像滾絞的海湧，一湧續一湧。」
「黃兄，」朱一貴給黃殿搭一下肩胛頭，「若干單舉反清復明的旗號，泛（hūan）勢只會當牽挽極其少數的人，咱斟酌給想看覓（māi），清狗界管之下的百姓，絕對多數攏是做穡、手面趁食的艱苦人，先顧腹肚才（tsiah）有才調顧佛祖，這條千古真理你我攏通徹。若盡靠反清復明這帖藥方，不如順應時勢舉起拍倒貪官污吏的旗號，刺激濟濟散赤的民眾投入抗暴除奸的隊伍，按呢，革命毋才有摒（píng） 碟（phiat）仔的可能。」朱一貴啉一甌酒，續落講：「緊事袂當寬辦，用咱現此時的步數，四界去出招人結拜陪綴。兩日後午時三刻踮這個地場會齊。」
兩日後午時三刻，鴨母寮絞絞滾，短時間內唯每一角勢聚集千外名、互相之間無在穩相捌的結拜兄弟。經過朱一貴簡單的調教，操兵點將了後，眾人剉竹仔做尖槍、綁旗幡，頂面用毛筆字寫「官逼民反」、「激變良民」、「大明重興」，數百枝旗幡仔予風搧甲翩（phia̍t）翩叫。隊伍上頭到，翁飛虎手裡舉一枝極其大枝的戰旗，頂面「中興大元帥」的紅字，可比逗逗仔（ta̍uh-ta̍uh-á）斜西的日頭映照千外粒熱撲（phut）撲的心肝。朱一貴徛踮戰旗下底，佇tong-tong-long-tong-tshiang的鑼鼓聲裡，征戰的號令好親像強欲衝破天蓋（kùa）。欲暗，抗清民軍緊猛徙動跤步，彼暝怹直透攻佔竿蓁林汛塘，人掠厝拆，傢俬頭仔搶了了。
朱一貴四界出招跤手，徛旗造反的消息傳到府城，台灣鎮總兵歐陽凱看怹殕（phú）殕，干單認定怹是一陣放尿攪砂袂做堆的烏合之眾。隔轉工透早，差派鎮標右營游擊周應龍掣領400名兵眾，另外徵調新港、目加溜灣、蕭壠、麻豆四社平埔番鬥陣平亂。彼工，雨毛仔無時停，沿路醬漉漉，路糊糜仔牢鞋歹行路。周應龍部隊佇雨裡那行那歇，結局干單行五里路就佇半路店歇睏過暝。日頭閣一擺掛踮天頂，厝角鳥仔目睭擘（peh）金啁啁叫的早時，周應龍部隊起跤行，這回減采是前暝睏了有夠飽眠，怹一睏頭向東行15里路，行到二層行溪北爿岸的角帶圍才安營歇睏。彼暝，朱一貴掣領幾落千名部眾，當（tng）趁夜色攻入槺榔汛塘，把總張文學一看著烏影，走甲膹（phùn）跤脛（king），朱一貴部隊假若咧推（thui）軟仔，輕車熟路取得濟濟傢俬頭仔佮焦糧。月娘吊佇半天懸的時，周應龍部隊早就onn-onn睏，身魂走甲十三天地外去。
第二工，朱一貴部隊徙跤到小崗山，偎晝，清國軍佮怹佇崁跤正面對敵。抗清民軍戰未曾兩回合，就沿那戰沿那退入內山斗底。周應龍叫是朱一貴部隊畏戰，隨時以飛鴿傳書向佇府城的總兵歐陽凱報告大勝。尚且傳令平埔番，便若刣抗清民軍一名賞銀三兩、刣頭目一名賞銀五兩，平埔番受煽動為錢貪功，沿路刣人放火，四界割人頭討賞銀。聽著風聲的在地民眾逐家跤手尾疲疲搐（phi̍h-phi̍h-tshuah），到遮來，辜不二三衷，若閣毋拚絕對會孤毛絕（tse̍h）種。因為這個因端，抗清民軍一目睨仔滾絞到兩萬外人。
4月27，清國軍沿路落南行到楠仔坑。捌派人佮朱一貴參詳鬥出力揠倒清軍的杜君英手下兵眾，前一暝拄攻破清軍下淡水營，搶盡兵器。周應龍聽著風聲驚膽忍（lún）命，號令部隊以退為進，走假若飛。兩工後，朱一貴佮杜君英兩路部隊聯手佇赤山合攻周應龍部隊，清國軍可比對敵相觸（tak）輸勢的雞角仔，偆無甲半絲仔元氣，千總陳元戰死，清軍齊滅。周應龍看毋是勢，起跤閬（làng）辿轉府城，朱一貴大軍沿路追殺，杜君英部隊踅翻頭攻佔鳳山縣治。這個坎站，二層行溪以南齊落入抗清民軍手頭。
清國軍大敗的消息傳轉來府城，濟濟文武官員透暝落跑（làu-phâu）過鹹水去澎湖。台灣鎮總兵歐陽凱緊猛調集水陸兵眾1500外人，屈守春牛埔，排好陣勢當（tng）等朱一貴部隊入府城決一死戰。
中興王登基進前兩日下晡，朱一貴佮王玉全佇暫設王府的道台衙門大廳參詳立國大業。朱一貴問王玉全：「賢弟，咱的勝利來甲遮呢趕狂，一切攏猶未備辦齊全（tsiâu-tsn̂g），敢必然愛佇兩工後登基立國？」
王玉全微微仔笑：「回稟主公，五月初四是登基立國的良時吉日，早日安邦定國才會當安搭浮動的民心。」
「既（kah）是按呢，咱的國號、年號、典章制度又閣如何是好？」朱一貴問。
「古早人講新例無設、舊例無滅。勝利來得過頭緊，典章制度袂得佇一夜之間建立，咱不如定國號大明，恢復明制、剪斷年尾仔；定年號永和，表示永世和平的意思。毋過，主公佮文武官員的服裝就較惱（lóo）喟著力，搬請裁縫師傅趕製的確袂赴。現步極加通向戲班借戲服thap額爾爾。」王玉全直理直路回應。
朱一貴跋入記持的深窩大窟。伊毋那毋是正扮的大明皇室，反倒轉是純然的Siraya人。伊猶會記，三歲的時綴老母Isip去大坑尾公廨，伊捌指（kí）公廨內面的矸仔問：「Raren，咱拜奚（he）矸仔是欲創啥物？」Isip總是會踞（khû）落來，用重絢的大蕊目睭掠伊看一下，順續用厚實的手蹄仔挲（so）伊的頭殼碗，笑笑仔講：「Wagi，奚毋是矸仔，奚是咱的祖靈。後擺千萬毋通亂肆（sú）指，知否？」嘛捌佇秋裡的深更夜暝，踮庄頭的埕裡看一陣婦仁人身疊（tha̍h）素衣烏裙、手牽手雙跤跳輕快的舞步，嘴裡唱好聽幼軟的歌聲。五歲綴老母唯大目降社搬徙到羅漢門，了後老母嫁人做後岫。從（tsīng）彼時起，伊疊漢姓朱，Wagi 嘛改名一貴。潦落反清革命，自來毋是為著孤家寡人彼款的皇室家業，伊全然干單想欲敨放清國狗官界管之下百姓所受的不公不義。想到遮，朱一貴心肝齊清，可比雲開見明月。
為著朱一貴登基佮文武官員的服裝，王玉全費盡苦心，差派人借遍府城內外所有戲班的戲服。毋過，官員傷（siunn）過頭濟，就準講給戲班的戲服借透透，衣冠猶原鬥袂合袾（su）。所致造成朱一貴的登基大典，出現袂少頭戴明朝帽、身穿清朝衣的詼諧（khue-hâi）場面。
斯當時，朱一貴入府城為著安搭民心，頒布安民令，三吩咐四交代，嚴格禁止部屬做出刣人放火、強掠民女遮的袂見眾（tsìng）的歹代誌，違反命令者斬無赦。誰知，開天地以來所有惡質的人性，遮呢緊就現出原形。干干仔有人掠準伊是開國功臣，就會當靠勢為非滲做，無顧別人的死活。無偌久，國公戴穆強娶民女，雖罔伊是朱一貴手下的勇將，朱一貴講會到做會到，當眾人面前給戴穆斬頭示眾；太師洪陣違反軍紀，朱一貴仝款無顧對方的面底皮，下令刣頭。眾人看著這款場面，知影朱一貴令出必行，毋是凊采講講的，所致逐家攏毋敢閣假痟（siáu），獨獨杜君英佮眾人無像（siâng）。
本底，杜君英就認定抗清大軍會當順利進入府城，伊是掛頭名的功勞者，偏偏仔眾人遐呢白目，袂曉看迵伊的心腸，助伊搡怹後生杜會三做王。開基大典彼工，朱一貴干單封伊國公的名號，伊規膦葩火無地通消敨，早就想欲揣機會報鳥鼠仔寃。這陣，杜君英靠勢伊手搦（la̍k）兵權，對戴穆、洪陣夆斬頭的下場，全然無顫悶（tsùn-būn）著。伊強掠七名婦女關踮府裡淫樂，內中一人拄好是國公吳外的親晟，吳外揣伊討人，杜君英毋那無應允，顛倒起呸（phùi）面，派兵追殺吳外。
吳外走甲頂喟接袂著下喟，緊猛拚來王府面報朱一貴。「可惡至極，」朱一貴氣甲頭殼頂蒸煙，「杜君英刁意故欲挑戰本王的威信，親像這款有天無日頭、目睭生佇頭殼頂的匪類，一點仔都無資格通統領部眾。」朱一貴當場差派平平客籍的楊來、林璉去苦勸杜君英，要求伊放回七名民女。無疑悟，杜君英見笑轉受氣，去倒拍給楊來、林璉兩人關踮大牢。朱一貴瘕痀（hê-ku）袂硩（teh）嗽，命令李勇、翁飛虎領兵逮捕杜君英。雙爿人馬刣甲濛煙散霧，削甲裂囊（lông）散（sàn）甲，赤崁城跤紅色的血水潸（san）潸流。杜君英部隊佇朱一貴大軍圍攻之下，猛虎難敵猴群，杜君英掣領數萬客籍兵眾，向北溜辿到虎尾溪，沿路成做刣人放火無所不至的土匪軍。
杜君英部隊一寡兵眾走轉來下淡水通風報信。五月初十，彼箍圍仔13大庄、64小庄的客籍代表，聚集佇內埔媽祖宮連暝比接，眾人議定給庄民組織做六堆部隊，參朱一貴大軍對削，指揮總部設踮萬丹，峙「大清義民」旗號，計共12000外人。朱一貴輸人毋輸陣，即刻派兵渡過下淡水溪，佇萬丹佮六堆部隊拄敵，仙想都想袂伸，朱一貴部隊中計，受六堆部隊三面閘（tsa̍h）後尾路。進無步退無路的坎站，翻頭挨挨搡搡闖落下淡水溪，註死拄著水崩溪，朱軍死傷不計其數。六堆部隊續接追殺，朱軍齊滅。
告 示
大兵登岸之日，家家戶戶書大清良民者，即為良民，一概不許妄殺。有能糾集鄉壯，殺賊來歸者，即為義民，將旌其功，以示鼓勵。凡擒朱一貴者受上賞，擒賊目者次之；獻都邑者上賞，獻營壘者次之。惟拒敵者殺無赦，倒戈退避，革面為農皆許之。
六月上旬，府城街頭巷尾夆偷偷仔貼滿告示。遮一簇、遐一簇的百姓圍踮告示頭前指指抵（tu̍h）抵，袂輸紙頭紙尾寫的字是金仔粉硿（khōng）的。論真，圍踮遐指指抵抵的憨百姓，十個內底有九個九毋捌字，看無究真是圓抑是扁。不而過，朱一貴的國師王玉全見著街頭巷尾的告示，目睭皮睨無停疲疲搐，隨時差派部屬便若看著告示，見一張扐（liah）一張，見兩張扐一雙。
六月十六天拄拆ha̍h，清國軍六百隻戰船直破進攻鹿耳門，福建水師提督施世驃佮廣東南澳鎮總兵藍廷珍，仝時攏佇船頂。彼日，鹿耳門鎮守蘇天威掣領兵眾硬死守牢砲台。兩軍正面對敵強猛發射砲彈，海面這爿射過來，海岸彼爿隨反擊轉去，一搭久仔濛煙散霧幔（mua）天嵌地，砲聲lìn-lòng哮，響遍附近幾落個庄頭。唯天拄拆ha̍h戰到欲偎晝，一直攻袂過手，藍廷珍敖（gâu）摒變（pìnn）給施世驃建議相準砲台邊的火藥庫。誠實有影，清國軍向火藥庫爆擊，規個天頂隨予熱赤的火焰染甲紅phà-phà，朱一貴的兵眾承（sîn）著拳頭皮，彈甲骨肉離身血湍（tshùann）流，屍體疊甲袂輸一座小山崙。蘇天威看毋是勢，掣殘兵敗將棄守鹿耳門，向安平城請求打紮（tánn-tsah）。註死，這時台江內海雄雄滇（tīnn）流，清軍當趁風勢給戰船駛入安平港。雙方佇安平城跤戰甲血潺（tshâm）潺流，朱營兵敗，安平城落入清軍手頭。
踮府城貼告示招安百姓，是藍廷珍向施世驃獻的計智。窮（khîng）實，告示頂面的檄文是來自藍廷珍小弟藍鼎元的手筆。閣再講，原底施世驃主張唯打狗進兵台灣，毋過，藍廷珍想真打狗港無利便戰船起水。尚且，上陸了後欲向北攻打府城，必然愛tsánn過百外里的無水田，沿路甘蔗林密啁啁，萬不利朱一貴部隊暗伏摔（sut）後砲，恐驚會遭受大敗。施世驃目識巧用人精功，所致，今仔日才（tsiah）有才調佔領安平城。
三工後，朱一貴加派幾落萬部眾反攻，向望早日班師回轉安平城。兩軍佇二鯤鯓對敵，戰甲烏雲罩霧，朱一貴部隊手提盾牌，用牛車陣作頭攄（lu），無顧火砲、炸藥，毋驚死一直向前衝，殺聲震動天，使致清國軍死傷累累。藍廷珍見勢面危急，親身潦落拍派調度，指令火砲無閬縫連環齊發，舞規晡久誠無簡單才破解牛車陣。續落，雙方真拄真刀劍近身，刣甲血湤（sai）湤。落尾，朱一貴部眾退回岸邊硬死屈守，兩爿煞造成平拄thing的勢面。
「啟稟主公，這當今安平城陷落清國軍的手頭，咱不如暫時退守諸羅山，等待風雲再起的時機。」國師王玉全給朱一貴做暫退安居的建議。
「論真，即馬猶毋是退守的時陣，」國公江國論自動請命，「我願意掣兵唯西港仔搧清軍的腹肚邊，西港仔徛佇灣裡溪出海口，離台灣府城無偌遠，沿路林投、竹刺密（ba̍t）插插，利便咱暗伏摔後砲。若會得通成功，我軍就毋免暫退諸羅山。」
朱一貴接受江國論建議。誰知這個計策予清軍報馬仔攔閘，施世驃拍派藍廷珍兵分八路，給朱一貴部隊四箍輦轉圍甲密啁啁。六月廿二天拍潽光，雙方大戰蘇厝甲，江國論看清軍士氣當旺，一步一步逼偎嚨喉空，緊猛翻頭退守台灣府城。
翻轉工，兩軍閣一擺正面對敵。這個流擺，朱一貴部隊的鬥志，袂輸離塗的花蕊雄雄湅（lian）焦，予清軍拍甲倒籬顛斗，一路追殺到蔦松溪，逼近府城。朱一貴現看水強欲淹到鼻空口，親身幔戰甲掣領部將參清軍正面對衝（tshiâng），拚盡帆猶原無法度kiāu清軍利劍劍的氣勢相拄手，激戰規半晡朱軍輸甲褪褲，辜不二衷棄守府城，向北脫逃。
朱一貴部眾向北脫逃，沿那戰沿那退，半途偷走兵佮投降對敵的，十個佔九個較加。渡過灣裡溪的時，朱一貴看著黃昏的日頭映照溪水，暮色裡，早前跕（tsàm）跤會地動、絞動風雲的30萬大軍，如今只偆千名殘兵敗將。堂堂六尺以上的英雄漢朱一貴，儘管穿插落（làu）肩裂甲，猶原毋願三聲無奈唱哭調仔。
閏六月初五，朱一貴部隊走到諸羅縣溝仔尾庄。舊底kiāu朱一貴熟似的庄民楊雄、楊旭刣豬屠羊好禮款待，尚且調集就近六庄頭漢草粗把的男丁，假仙假觸假影欲保護朱一貴，窮實尻脊後成做抓耙仔，暗靜密報清軍，想欲順趁半暝更深夜靜活掠朱一貴。彼暝，楊家兄弟掩（ng）掩揜揜偷偷仔給朱一貴部眾的大砲灌沙摻水，煞尾砲仔聲、鑼鼓聲pin-pin-piàng-piàng，暗伏佇庄仔外的清軍做一下拚入來，朱一貴部眾面仔慄（lik）色，隨個啊隨個giān giān袂消腱（kiān）。暗頭仔予楊家兄弟灌酒拍茫的朱一貴，頭殼猶踅神踅神，三、兩下手就予清國兵仔扺落塗跤兜，雙手綁揜後，押上牛車頂。
頭戴明朝冠，身穿清朝衣；五月稱永和，六月還康熙。
八月十三日時，規個台灣府城袂輸人間地獄。狡怪風、雄狂雨搧甲厝瓦滿天飛。海湧倒頭灌，安平港裡的大小船隻碎骨分屍。透風摳倒路樹，牆崩厝倒，雷公熾爁（sih-nà）透暝霆（tân）無歇。施世驃的行營齊毁，有人看見伊規暝徛佇風雨裡，驚膽忍命，嘴裡噪（tsha̍uh）噪唸。煞尾，施世驃佇台灣府城僥倖死。民間風聲謗影，喊講施世驃的靈魂去予朱一貴掠交替。
八月初，北京城郊外的刑場四箍輦轉、重重疊疊齊官兵戒管。莫講興看鬧熱的憨百姓，就連半隻蝴蠅、蠓（báng）仔插翅都飛袂過。午時三刻，風大透，秋裡的日頭走去藏。徛踮刑場中央，彼位六尺以上，雙手綁揜後，尻脊骿（phiann）插一枝待斬令牌，規身軀破毿破毿，頭毛散夯夯，目降鬚氅袂輸監囚的人，就是清國朝廷的頭號戰犯朱一貴。三月日前，朱一貴差一屑仔就給台灣地舞甲變天，康熙恨袂得食伊的肉、喫（khè）伊的骨，特別指派上致意的四皇子胤禛代表執行朱一貴死刑。行刑時間到，胤禛見朱一貴徛婷婷毋願雙跤跪地，即刻下令摃斷朱一貴的跤目，續接命令摀（óo）出伊的兩蕊目睭。當當（tng tang）刀斧手欲摀朱一貴目睭的時，雄雄摔（siàng）大雨，雨水青狂摔落來，直透拍佇朱一貴的面裡，伊的嘴唇皮啖（tam）著鹹siam鹹siam的雨水，目裡看出去是一枝續一枝的紅色雨箭，一直向伊射落來。煞尾，胤禛下令一刀一刀勻勻仔鏤（liô），給朱一貴凌遲到死。計共，朱一貴受3357刀凌遲才過喟身亡。
Wagi憑伊茫茫渺渺的感覺，轉來大目降社九層嶺的故鄉。踮遮，伊假若閣鼻著空氣裡玫瑰花的芳味，伊假若閣看著用踵甲khàng會流紅色血珠的胭脂葉，猶有囡仔時老母Isip掣伊去祭拜祖靈的大坑尾公廨，庄頭埕斗一陣查某人手牽手雙跤跳輕快的舞步，嘴裡唱好聽幼軟的歌聲。Wagi想欲綴遐的查某人跤挵手挵，煞致覺家己雙跤踏袂牢地。目睭前一遍烏影，一直搭偎來。
──2008.8.24寫佇赤崁米街
2008台灣文學獎創作類台語小說入圍
2009.7《台文戰線》第15號
文章定位：
