我的母校清水中學
我是 1962年入去「清水中學初中部」1965年出業，是第17屆。
彼个時陣清水中學全名是號做「臺灣省立清水中學」（清中），1946年（民國35年）3月成立的一間完整中學，有初中部佮高中部閣是男女合校。當時是台中海線上好的學校，到1980年代以前猶是上好的，培養足濟的人才。
當然這是因為交通無發達，普遍經濟條件猶無好所造成的。彼時台中地區比清中較好抑是會比並的中學，有台中一中、台中女中、彰化中學、彰化女中。清水、沙鹿、梧棲這箍圍仔的學生去台中讀冊，坐火車單逝通學著愛一點半鐘，誠了時間，無就愛蹛學寮，這是一般家庭負擔袂起的。若是去彰化讀，坐火車著30幾分，咱閣攏知影彰化中學佇八卦山頂，對彰化車頭愛行一二十分，按呢加加鬥鬥咧單逝著愛一點鐘久，不如就就近通學讀清中。就按呢，北對大甲，南到大肚追分的台中海線的學生攏就近讀清中。
會記得清水出身，有名的「蔡前輩」蔡焜霖先生，佇伊的自傳《我們只能歌唱》(玉山社)有寫著一段（中文）：
「清水子弟讀台中一中很辛苦，從清水到台中要先搭海線火車到彰化，再換山線火車到台中火車站；下車後還得走幾公里才到學校一趟路程將近一個半小時。搭公車從清水小學沿著山路取道大雅在進入台中，砂石路顛簸難行，搭公車通學還是得花一個半小時，被震得全身肌肉痠痛。」
當時學校無濟，譬如初中入學考試攏是仝一工，考無牢著愛讀私立學校---這會予家庭經濟負擔傷大，有个就按呢失學去。小學老師就會看你的實力揀考會牢的學校考。初中畢業考高中，幾个仔較特別的以外攏就近留佇清中讀。就按呢清水中學初中部高中部學生的程度就攏袂䆀。
當時大學有保送制度，會記得是連紲幾年幾个以上考牢台大，後一年就會當保送幾个。清水中學逐年攏有保送台大，大學的錄取率誠懸，考牢台大嘛誠濟。會記得入去初一的彼年，一位高三姓黃的前輩考牢台大醫科，伊的名字到今欲六十年猶記牢咧。
阮彼年的同學嘛是士農工商、各行各業攏誠出擢（tshut-tioh）。幾年前猶佇台北辦過同窗會咧。阮彼年畢業的第一名是查某同學姓劉，伊直升高中部無讀，去讀北一女後來考牢台大醫科。後來我到台北讀冊，參加清水中學旅北校友會，會後阮幾个同學捌做伙去伊的實驗室咧！會記得伊畢業後來台中服務。當時初二三就照成績分班，阮彼班毋是好班，毋過以後的升學嘛袂偌頇顢（hân-bān），有一位姓顏的同學高中繼續讀清中，考牢醫學院。到這陣猶佇第一線看病，閣是骨刺開刀的名醫咧。
1960，70年代 的經濟普遍猶無好，交通無發達。讀冊是一項無簡單的代誌。較開明的家長肯予囡仔讀冊，毋過經濟的限制只會當予序細就近讀冊，就按呢清水中學徛台中海線上好的學校有二十外年！後來台灣經濟起飛，家庭經濟變好，交通改善，造成幾間「明星高中」的現象，閣繼續有二三十年。
【這款的「一極集中monopolar concentration」的現象對社會是無好的，毋過誠不幸，這个現象敢若是有人的所在就一直會存在。】
好佳哉！後來教育政策有修正，譬如「繁星計劃」等等，予這款一極集中的「明星高中」現象有小可仔解消，囡仔較有意願留佇故鄉就近讀冊。
（240815Tong-îng）
文章定位：
