人抱嬰你抱狗
這句是全名叫做「人插花」的日本時代的兒童唸謠的內底的一句，毋知按怎其中的一段「人抱嬰你抱狗 人睏紅眠床 你睏屎礐仔口」我是記甲上清楚，經過六十幾年猶是隨喙就念出來。
全文是按呢：
「人插花、伊插草。人抱嬰、伊抱狗。人未嫁、伊先走。
人坐轎、伊坐畚斗。人睏紅眠床、伊睏屎礐仔口。」
Lâng tshah hue，lí tshah tsháu。lâng phō enn，lí phō káu ;
lâng buē kè，lí sing tsáu ;lâng tsē kiō，lí tsē pùn táu ;
lâng khùn âng bîn tshn̂g，lí khùn sái-ha̍k-á-káu 。
唸謠內底的「人」是指咱台灣人，「伊」是指日本人。會記得細漢時陣所得著的意思，是講這个念謠當時是咧經體、咧剾洗日本人。這首唸謠是看袂起日本人。
到了幾年前，看著彼本「陳夫人」（庄司總一著，林俊育台譯）的時，隨就連想著這首念謠。冊內描寫一个日本查某人安子嫁來台灣，佇生活上，文化上的無仝拄著的種種代誌。予我較深入去想這首念謠。確認著這首念謠是真正差大碼（tsha-tuā-bé），意思是真值得咱深入探討。
台灣人Vs 日本人
插花 Vs 插草
抱嬰 Vs 抱狗
坐轎 Vs 坐畚斗 （人力車）
紅眠床Vs屎礐仔口
這是表示日本人佮台灣人，佇生活上，文化上，經濟水準上的差別。彼个時陣，日本人本國的生活水準是贏台灣濟濟，毋管是公教人員派來台灣，抑是來做生理的，移居的當然就共日本的生活帶來台灣。
日本人已經共便所變做清氣的所在，毋是用屎礐仔矣。而且日本人睏佇地枋抑是tah-tah-mih頂懸是𪜶的生活方式。
狗對台灣人來講是顧厝。日本人是動物伴（tōng-but-phuānn）（pet）。生活毋是干焦猶咧顧三頓，已經到有冗剩會當飼狗矣。
當時的台灣人未嫁進前袂用得去男方的厝。日本人無按呢，是大大方方去對方拜訪，這嘛是生活的習俗而已。
插草（插稻穗）佇日本是代表身分佮一種妝娗（tsng-thānn）。
畚斗-----當時的日本人坐的人力車是成畚斗的形。
咱台灣人就是無去想這種差別的真正的道理。閣按呢做念謠來供體。咱閣會使得用現代的台灣人來共比看覓，是毋是佮彼陣的日本人仝款？毋抱 嬰攏是咧抱狗，抱貓。攏是蹛佇套房，就是睏佇屎礐仔口（便所）啊！
對這个念謠，咱電力歷史的專家前輩林炳炎先生有真利的批評。佮逐家做伙分享。（原文是華語我共翻做台文）
『這首童謠是充滿差別心，強烈的表達著兩族群的文化差異，産生的文化歧視問題。這个童謠表現著台灣人欲留佇前近代，毋願進入近代（Modern）。現今台灣是誠濟人抱狗、未婚先同居。可見毋願進入近代（Modern）的抵抗是失敗的，或者是講近代化是閃袂開的。』
看起來，咱看較早的文獻，咱有需要閣較深入了解伊个背景。若無，拂毋著就會差大碼。
******
「人插花」唸謠的日本文版
「私は花をいけて、あなたは草をいける。私は赤ん坊をだっこして、あなたは犬をだっこする。私が嫁がないうちに、あなたはかけおちする。私はかごに乗って、あなたは人力車に乗る。私はベッドに寝て、あなたは便所の戸の前に寝る。」（日文由宮崎聖子博士翻譯）
*****
（230414Tong-îng）
文章定位：
