「森」情小品文 ...

323愛的鼓勵 503訂閱站台

今年農曆潤咗一個月，所以到呢個時候先過年，一向農曆年都比較凍今年又好似幾暖，真係有種大地回春的感覺！呢個月都幾多節日，先有情人節，仲有年三十又踏入大年初一，假期都有好幾日…今個假期又可放多一日，又唔錯喎！

今個過年自己就無咩應節習俗，都係簡單執拾一下當大掃除，自己認為著得到的衣物就唔會浪費，結果就買了新鞋新褲，不過係咪過年都要買架啦！唔知大家過年前又有咩習俗到今時今日都會守住呢？！

過年最重要都係餐團年飯，最應節都莫過於能夠安排在年三十做節…至於過年都不外乎食…食…食…以前的人日日都係青菜白飯，到過時過節一定食得豐富啦，至於而家啲人日日都大魚大肉，食嘢真係要節制一吓！到過完年後，搞到肥腫難分就唔好啦！哈哈

中國人都好講意頭，大桔跟吉字同音，所以年吉就唔少得～寓意來年事事吉利！樣樣事情都變得好，呢樣就最為重要啦！

另一個我自己就好喜歡的成語，就係一帆風順，無論遇到好事唔好事也好，都能夠順利渡過，當中的枝節都唔成問題，仍然能夠拉起帆桿，迎風而上一路航行…所以自己就買了一個帆船擺設，相當有意思！（並不是相中的金帆船，我又冇資格做土豪…XXD）

在此！森Blog就祝各位Blog老友記兼自己，羊年大吉大利，吉事連連，順風順水，金光閃閃，金銀滿屋，真真正正做個港產土豪！！…壓軸呢句至希望～哈哈哈