十月八日。一朝早起身食完野就計app.(當然係一路開住電腦,一時上下網,一時傾下icq咁計)。到2點零鐘時fish同我講話4點半去摩士踢波,我先記得呢回事,哈哈。(尋日細小息佢有問過我今日踢唔踢,我淨係話踢但佢無講詳情我聽)
計app.計到3點零,終於計哂3(c)。(最尾果條用左我3版草稿....因為條數超長而我又錯左2-3次)之後就換衫出門口,落到去摩士先4點10分,淨係見到羅建明一個,所以即刻打俾fish叫佢落埋黎陪我地吹下水。落到黎先知佢隻腳傷左仲未好所以唔踢得波淨係睇,可惜～～～。過多一陣大頭,陳祖彥,大佬(方崇軒),老林先一齊黎到。由於呢次足球比賽係教會搞既關係,所以熱身前要祈一祈禱先。
祈禱後就開始熱身,做完d熱身動作之後就輪住射龍門。太耐無踢波兼我一向唔精於射術既關係,我次次唔係射歪就係撻Q,無一球中龍......大頭好似都因為疏於踢波既關係,次次都高出。認識既人中係得老林同羅建明入過波,老林2球,羅建明1球。
正式開波我就即刻有得出場,真好。我每次踢波都必然係後衛,有波就清唔駛煩。
一開波我淨係截過一次波傳上前跟住老林話咁快就入左......過多陣佢又入多球......。
之後到我無乜氣時個教練就換左我,老林,羅建明仲有另1個唔識既人出去,太好了,可以俾我抖一抖。果時我地仲係2:0～跟住坐低睇左一陣就睇住我地隊波失分．．．．．．過多一陣條氣仲未順番教練就講定下半場我,陳祖彥,羅建明,大佬再加多幾個出場(即成隊人換哂)。但果時上半場仲未完,跟住我地隊波又失分啦~~老林睇住自己入果2球俾人追番哂應該都幾無奈。
到下半場時我已經得到足夠既休息,又可以繼續盯人。不過今次有個9號仔向我地呢邊,條友超煩,向出場前講到自己點勁點勁,但事實上佢呢位前鋒向前面一拿到波就俾人搶左。仲要有2,3次佢向禁區附近爭波踢時我先醒起原來我地隊波有呢個人,因為佢平時真係好似隱左形咁架。
踢踢下同人爭波俾人撞到成個彈開仲要跌低埋,好彩屁股著地卸哂d力者,所以一d都唔痛,又無傷到。到我就黎無氣時見到前面自己人拿到波,仲要2個前鋒對住個守門員,咁就入埋第3球。
跟住前面有罰球,大佬(守門員)話要射,我叫佢唔好但佢都係衝左上去。即係自己果邊個半場得番我1個......哈哈哈哈。跟住佢地仲要射唔入俾人地拿埋波,2個衝上黎對我1個。當時心諗呢球無硬啦,好彩帶波果個無過半場即刻笠射而我又好好彩咁截到佢個波彈出界外者。
過多陣我,羅建明,陳祖彥同個9號煩人就被換出場。老林出番黎,可惜佢地果邊都黎左個勁人,雖然佢打後衛,但竟然可以向中圈附近遠射近柱射入左大佬......咁就俾人又追平番。
有次差d俾人反敗為勝,對方向禁區向大佬單挑,好彩大佬英勇撲到。之後又有球笠射,唔好睇大佬人仔細細,但佢都救到喎,最後完場時3:3。大佬好波！！！
總括黎講,今次我出場時我隊既戰績係3:0,身為一個後衛而無失過波,都算交足功課啦掛。
之後同大頭,老林,fish,大佬去左樂富街市買野飲。(呢間街市都好多年無黎過囉。以前讀幼稚園or小一小二時都仲會陪下阿媽買 食送 黎呢到既,但之後差唔多都無再陪阿媽買 食送 兼夾佢都唔黎呢到買lu。)用$6買左枝雀巢檸茶就返屋企lu~
文章定位：
