大家可能好奇怪,點解我會開新聞台去寫Dairy。其實我只不過係心血來潮想學人寫下Dairy,同埋又或者可以俾我香港既老友記,澳洲既老友記,遠在加拿大既Joey同將會到New York讀University既Joyce,知道多D我既Daily Life,同埋最重要既係拉近老友記之間既距離,可能有D人不感興趣,我亦都唔知我會唔會三分鐘熱度。Anyway,呢個時候我真係想寫Dairy......
首先係度祝小白生日快樂...因為今日係佢既生日...希望佢愈大愈靚同佢A-Level會考得好好而入到好既Uni(當然都希望其他考A-Level既老友記Joanna, Sam Ho, Sarah & William都係一樣啦)。
今日係12月1日,仲有一個月, Joyce就會去States讀書, 琴日係我返到黎香港第一次同你聚一聚,依然都係無乜野轉變,但係我地每一次聚一聚既時候,話題都會回想起以前我地之間所發生既故事,又或者估計一下將來可能會發生既傻事。
我地由Form 1就識,記得Form 1我同你可以都話係班入面既”攪事份子”,果陣真係玩得好顛,大家都唔讀書,到最後我同你都由Form 1既B班,跌到Form 2要讀D班。到左Form 2果陣,我開始玩發奮讀書,估唔到你之後又學我玩發奮,點知你竟然考得勁過我,都幾灰架。記得果陣我同你同Joanna同Sam Ho幾friend架,我地成日都玩,可能因為咁,我地比以前更加friend。到左Form 3果陣,果一年事情遇上了轉機,我地之間竟然開始曖昧起黎,果然曖昧果陣係最開心,我永遠都唔會唔記得果陣你對我做既野,又或者我地之間做過既野,好似一齊做Drama, 去旅行,仲有俾Joanna點醒先知道果陣我對你都幾衰……講真,正如我同你講,同其他人講,果段時間係我識你咁耐最開心既時候。(梗係啦有人對我好喎) 而我亦都不知不覺地鍾意你,而我亦都有開口同你講,但係唔知係我既問題定係你既問題定係乜野原因,我地始於都無一齊到,相反由果陣開始,你就避開我,我果陣真係爆無奈,我問Joanna,連佢\都唔知咩野事,我真係好hurt架,果陣我諗我都係一個唔識,或者唔會同人表達同傾訴既人,身邊好多人都好關心我我都反而唔同佢地傾,結果我自己受哂,鑽哂牛角尖,攪到自己痛苦左2年幾,Form 4同5,我對你既野簡直係模糊,我同你好似陌生人咁,不傾不講不打招呼不Say Goodbye。果陣真係好upset 。直到Form 5尾, 我俾張記念冊你寫既時候,先將我地之間既冰山劈開,我亦都估唔到你係我張記念冊上寫左咁多野,果陣都幾surprise同開心架。仲記唔記得考會考果陣,我地係以E-mail黎通信架,依家我仲save左你send俾我既每一封E-mail。謝師宴果日,我同Joanna都好想搵你影相,可惜我地都覺得你唔係好想影咁,所以都無影到。諗返我同你之間既合照真係少到不得了。
後來,你會考16分升到Form 6,而我要repeat,我仲以為我地唔會再有contact,點之你反而約我一個week一齊食兩次lunch,不過食得都唔係好多次,因為你成日都放我飛機,好在我都有有賤招屈你請我食飯姐,哈哈! 仲有Ronald同埋L.O.既事,都竟然成為我同你之間既事,我都唔知點解……其實當我知道你地既野果陣,我都有D忐忑不安既感覺。2002年既暑假,當我講你聽我要去澳洲讀書果陣,我估唔到你有咁大既response, 亦都估唔到就係因為咁,我地就開始左(估唔到追左兩年幾既你原來可以用咁簡單既理由就一齊,總之早D用啦,哈哈)。不過一齊左之後,你都無理過我,我唔搵你你就唔搵我,一個星期後,我就好型咁同你講分手,之後我仲後悔,仲諗住復合,好傻。雖然果一個禮拜你對我唔好,但係估唔到我就係係呢一個禮拜搵到我自己,原來我係一個極度需要自由同空間既男仔。Anyway, 多謝你給我這一場戀愛,亦都是我的初戀。到我走之前既一日,我地見面,係我送你返屋企既途中,其實我一直都好想拖你,可惜我唔敢,都唔知點解,到左你屋企樓下,見到你喊,我更加想攬住你,可惜我又唔敢,諗返真係有D灰。其實果日我都好想你黎送我,不過諗返可能我同你咁樣講ByeBye會仲好。
琴日成日其實我都係幾upset, 每次諗起要開始倒數呢一個月既時候,一個月之後你就要走,我原來係咁唔捨得。我記得你同我講過你只係會對住我自私,因為係我寵壞你既,我都覺得又好似係,或者就係因為咁,我被你hurt咁多次我依然都care你,我同你講我好後悔識左你,當然係假架啦,因為我同你之間有好多好多既故事,好難忘,又點會後悔識左你啊? 依家我一路聽容祖兒既 <小天使> 同 <最好時光>,一路打呢篇Dairy, 都幾灰架,有D想喊, 原來送人機既感覺比人地送你機既更加難受。唔知我地係呢一個月裡面仲會見幾多次呢?不過我諗我會好好珍惜我地見面既時間,最多寸你少D,因為可能我地要兩年後先再見,見得幾多次得幾多次。不過當你去左美國,我返左澳洲,唔代表我地之間就會完結,我會得閒就搵你keep contact,因為我唔想失去你,唔想失去一個好朋友。希望係兩年之後,或者你U Graduate 之後,當我再一次見返你果陣,會長大左,比以前更加成熟同對我更加好啊........<<時來易得千兩金 緣來難得有半人>>
文章定位：
