2003/05/24
今日, 當圖書館工讀生既最後一日, 雖然冇咩特別唔捨得既心情, 不過其中一個館員送左條頸鍊畀我做畢業禮物, 真係好感動, 我只係一個普通既工讀生, 竟然有咁多館員錫, 原來醫圖仲係一個有人情味既地方, 都不枉我O係度做左兩年幾咁耐. 而且, 今日呢份已經係第四份畢業禮物啦, 我幾個親戚啦、舊同學仔都送左畢業禮物畀我, 原來畢業可以咁warm ga.
最近因為sars既影響, 圖書館已經冇咩人黎, 不過今晚要帶接班既學妹, 最後一晚啦, 希望可以教識哂佢所有既野. 唔止希望佢對於圖書館既野快D上手, 仲有港澳會既野都係. 唉...我都冇做會長年幾, 估唔到而家仲要去畀意見, 仲要去睇佢地開會. 無辦法, 今年會長係我直屬學弟, 當日係我有份推佢出黎做會長, 我應承過佢唔會唔理佢, 就算我返左澳門, 只要佢開聲, 我一定撐佢. 而且, 今次連上屆會長都開到聲, 我唔可以唔幫. 其實咁樣睇港澳會, 都幾warm架, 一屆幫一屆, 我地透過互相支持, 先可以撐住個會到今日, 我諗, 只有做過會長、做過顧問, 先有呢種體會.
講起直屬學弟, 又令我諗起都計系, 我之前講過都計系既兩大好男人. 前幾日因為唔舒服, 冇去家聚, 如果係一般朋友, 可能仲會嬲你甩佢底, 不過我地呢家人不但冇怪我, Billy仲即刻打返電話黎問我有冇事, 另外兩個學弟第二日見到我都問返我點, 真係好warm. 我會永遠都咁鍾意呢個都計大家庭. 聽日我地又去BBQ家聚lu, 今次幾忙都好, 一定要去.
講左三樣warm既事, 第四件唔算warm, 不過係一件好令人振奮既事. 校園改造計畫呢份功課, 係時間認真咁做啦. 今晚我同班上一個好叻既同學討論, 好開心今次可以再同佢同組, 雖然有人認為同佢一組係自己囉苦黎辛, 但係我覺得每一次同佢討論都學到好多野, 辛苦D又有咩所謂呢?? 可以同到一個咁叻既女仔一組, 係咪好應該開心呢??
最後一件事當然係最warm架啦. 因為我知道有一個人, 雖然o係好遠既地方, 不過佢會關心我既事, 擔心我既健康, 嘗試去了解我既感受, 為我而開心或者心痛....會幫我分析我既困難, 太夜會叫我去訓覺, 會緊張咁話要買口罩畀我. 原來除左屋企人之外, 仲有人可以為我做到咁. 雖然呢排要面對好多野, 不過每一日都有人陪我一齊面對.
今日真係好warm既一日....寫呢篇日記, 係希望我可以記住每一刻動人既事, 希望 "從今之後, 我要永遠幸福快樂."
文章定位：
