FM88.3 STAR RADIO長榮之聲22【台語觸喙鼓】
主持人：陳淑蓉小姐、紅樹林台語推展協會會長藍淑貞老師。
播出時間：逐禮拜拜五下埔6點到7點
播出內容：刊佇明日報個人新聞台紅樹林台語推展協會網站。
播出方氏：分四個單元：
一、拍喙鼓：
「「蓬萊海上一仙島，山青水秀人呵咾，卜食卜穿免驚無，愛唱山歌來相褒。」各位聽眾朋友逐家好！今仔日又閣是咱「台語觸喙鼓」的時間，歡迎各位聽眾朋友做伙來聽台語、學台語、講台語，了解台灣事，台灣心，台灣情，予滯佇台灣的各族群，予咱的母語文化會當永永遠遠一直生湠落去。
府城成年禮－做十六歲
成年禮是古早傳統的禮俗之一，禮記：「男子二十而冠，女子十六及笄（ke1）1。」是講查甫的到二十歲，就會當共頭毛梳起來，由老父共伊2戴帽仔，教伊做一個大人的道理佮責任，這是「冠禮」；查某的到十六歲的時，由老母替查某囝共頭毛梳起來插「笄」，教伊做一個「查某人」的道理，這叫做「及笄」。
府城的文化一直帶領台灣文化，也是台灣文化的重鎮。佇先民來開發府城的時，就傳承即種古禮。代先佇開隆宮舉行即種成年禮，不過，佇開隆宮舉辦的成年禮，無論查甫、查某攏是十六歲，成做咱台灣真特殊的文化禮俗之一。
府城的開隆宮，位佇中區中山路79巷56號，創建佇清朝雍正十年，奉祀「七星娘娘」，逐家攏叫伊「七娘媽」。伊是對中國浙江寧海縣分香過來的，是台灣奉祀「七娘媽」上蓋早的廟（其他是屏東大埔的福星宮、嘉義太保鄉的福濟宮、台北新莊的義妙聖賢宮、宜蘭羅東的勉民堂），到今（tann1）已經有二百外年的歷史矣，嘛是咱台南地區民間信仰三大性命神之一。若是求子就求註生娘娘；有身就求臨水夫人生產平安；嬰仔出世了後，就求七娘媽保庇囡仔平安 大漢。有人講七娘媽是保庇囡仔的守護神，所以府城人自囡仔出世滿月了，就由阿母抑是阿媽，抱去開隆宮拜七娘媽做客囝。
以後，逐年的七娘媽生即日（舊曆七月初七），攏來廟裡拜拜，一直到十六歲迄一年3，佇十二點以後，父母準備雞酒油飯、麵線、生果、六色菜碗、七碗甜芋、紅龜粿、帶尾的甘蔗、胭脂水粉、圓仔花4，七娘媽亭佮五牲等， 滿十六歲的囡仔，來開隆宮上香拜拜，答謝七娘媽的保庇，也予囡仔了解做大人的意義。拜了，淪（nng3）過5供桌、七娘媽亭了後，將七娘媽亭燒予七娘媽，表示成人禮完成。另外由外家準備禮物，像：新衫、金手指、金鍊仔、腳踏車----等送予外孫，禮物濟少，愛看外家的經濟能力。雖然我的阿母是府城人，可惜我不是出世佇府城，所以我無做十六歲。會記我高中的時，我的同學有人做十六歲，伊的外媽送伊一台自輪車6，伊騎來學校，逐家偌仔欣羨咧。
府城的成年禮是按怎查甫的是做十六歲，不是做二十歲？這是有伊歷史的原因。根據府城耆老的講法：佇清朝，府城西區五條港7是上鬧熱的所在，因為船隻的出出入入，起貨落貨需要真濟工人，迄當時，逐家生活攏真艱難，若會當渡三頓飽就真好矣，父母攏早早就共囡仔送去碼頭做工。工資分囡仔工佮大人工，囡仔工的薪水才大人工的一半爾，未滿十六歲，干礁會當領囡仔工的薪水，所以囡仔到十六歲迄一日，父母就足歡喜替伊做十六歲，宴請工頭佮親情朋友，見證囡仔已經長大成人，會當得著大人的待遇，領大人的全薪矣。
2005.3.28
註解：
1.笄：女子束法用的簪子。
2.共伊：合音讀作「該」，替他---、幫他---。
3.迄一年：那一年。
4.圓仔花：千里紅。
5.淪過：鑽過去。
6.自輪車：早期，南部人稱腳踏車為「自輪車」；北部稱為「孔明車」，有些地方稱為「鐵馬」。
7.五條港：指舊台南城以西，包括安海港、南河港、南勢港、佛頭港及新港墘 港等五條河。這些河道現今已成地下排水溝。
二、今旦日介紹的姓是
1.經管會主委龔照勝的「龔」，華語讀做「ㄍㄨㄥ」，台語音「king2」。
2.歌星巫啟賢的「巫」，華語讀做「ㄨˊ」，台語音「bu5」。
3.倪賓的「倪」，台語音「ge5」佮胡瓜的「胡」，台語音「oo5」。
三、台灣諺語、俗語：
1.藥店甘草——雜插（chap4）
甘草，漢藥名，藥性甘平無毒，有調和藥仔的作用，差不多所有的藥方，攏有甘草即味。即句孽頡仔話，就是借伊逐項攏插（chap4）著的意思，來剾洗愛管閒仔事，無論大細項代誌，都卜插一跤的人。雜插的人，雖然有時會「予人」感覺真家（雞）婆，不過，現此時的社會，有時嘛真需要即種甘草人物，去做一寡仔逐家不願去做的代誌，社會功能才會健全，有一寡仔甘草人物，社會才會和諧，當然就愛做有意義的代誌。
2.籠床（sng5）蓋（kua3）蓋（kham3）無密（ba7）——漏氣
咱台灣諺語，差不多攏佇日常生活中體驗出來的智慧，所以也真忠實反映出台灣人的生活方式。
台灣人過年過節，攏愛炊粿，甜粿、鹹粿、芋粿、發粿，攏有伊代表的意義，炊粿的工具就是籠床，炊粿的時，籠床一定愛蓋予密，粿才炊會熟，佇遮用籠床蓋蓋無密，比喻卜掩蓋某一項代誌，掩蓋無好勢，就像籠床蓋無密，氣漏出來矣，所以講漏氣矣。
即句諺語一語雙關的文學技巧真懸，龍床的「漏氣」含洩漏代誌的「漏氣」音義完全相仝，講起來也真紲喙，所以佇民間一直咧
四、台灣歌詩、歌謠：
做十六歲 藍淑貞
自細漢 歹育飼1
阿母仔講
七娘媽 上慈悲
共阮契予伊做囝兒2
一年一年大
一冬一冬過
阮也已經十六歲
生做聰明面肉白
阿母講 愛去感謝
七娘媽的栽培
米糕油飯 圓仔花
甜芋 胭脂水粉攏褿齊﹙ciau5 ce5﹚3
閣起一間足嫷的七娘媽亭卜乎坐
阿母拜了閣再拜
叫阮著雙跤（kha1）跪乎齊
淪﹙lng3﹚4過七娘媽亭佮5桌下
阿母滿心歡喜
輕聲講阮會使嫁
見笑滿面皮
阮想卜愛天頂的月
拜託契母共阮尋（chue7）
註︰
1.舊曆七月初七，七娘媽生日，這一天做十六歲是台南市禮俗上最重要的節日。
2.歹育飼︰常生病，不容養育。
3.契囝︰就是華語的「乾兒子」這裡是指「乾女兒」。
4.褿齊︰齊備
5.淪﹕從下面鑽過去。鑽過七娘媽亭和桌下，做十六歲的儀式才算完成，表示已
經長大了。
6.佮：和。
1998.8.15.
1998. . .台灣日報副刊
文章定位：
