荒蕪橘園 我的部落格：荒蕪別坵穡 http://blog.roodo.com/bichhin/

1,149愛的鼓勵 0訂閱站台

我e5皮包仔，夾一張黑白e5舊相片，相片內底彼個儂，生了kap我小可有仝；深深e5目睭窖仔，鼻仔無kah偌獨（tok4，挺），喙唇細版細版，有一點仔翹，無啥笑容，看起來淡薄仔phaiN2-phaiN2；較大e5無仝是，伊e5目睭較大蕊，層循（teng5-sun5，雙眼皮）較厚，面顱仔比我較隘，所以，看起來著比我較嫷款。

根據相片內底e5儂共我講，伊歙即張相片e5時十九歲，已經是二十外冬前e5代誌啊！即張相片，伊干礁留兩張，一張佇我遮，一張伊囥佇相薄仔，藏teh tang-su3（衣櫥）下腳層。佇我即張相片e5後面無寫字，佇伊彼張後面，字寫甲滇滇，這著是伊欲藏起來e5原因。

會記得彼當陣，我共伊討即張相片討真久，伊無啥想欲予我，因為伊拍算欲共另外一張燒掉，我直直拜託兼saiN-nai（撒嬌），伊則毋情毋願the7予我。我問伊，另外彼張後壁，彼e5儂名是誰（siang2）？伊笑笑啊細聲共我講：「較早e5查甫朋友啦！」

我定定teh想伊共我講過：「查某儂若嫁翁，真濟代誌毋是想欲安怎著會使安怎，萬項攏愛照起工，別儂tau e5飯碗無好捧，礁家官（公婆）服侍了無拄好、囡仔教袂乖、煮菜無合逐家口味．．．，查甫儂佇外口做實，轉來根本無時間chhap（了解、處理）厝內e5代誌，咱『拼甲流汗』，儂『嫌甲流瀾』，嘛著目屎咁（kam5）咧，憨憨啊做。．．．」真濟伊交代e5話，我攏毋敢放袂記。做一個查某儂，著愛守「本份」：家內事逐項會曉，siuN（太）過「khiang3-kha」（能幹）嘛毋通；天地輕重愛知，會伸會kiu（屈）則得儂疼。

愈來愈大漢，我讀著一寡關係「女性主義」e5文章，我開始思考，查甫儂kap查某儂有外大e5無仝？啥物則是「查某儂e5本份」？生命e5價值到底建立佇啥儂頂懸？存在e5目的是為著啥？尊貴kap卑微e5界線欲安怎畫？．．．有東時啊，冊讀愈濟，問題煞愈濟。

逐擺看著即張舊相片，我著想起彼工，日頭誠刺目，一個無風無搖e5下晡，伊無聲無說來離開，彼個生了kap我小可仝款e5儂。這段時間，外口e5閒仔話已經無像進前hiah-ni3-a2濟，嘛漸漸較無儂講起，我kap伊親像姐妹仔。當我teh躊躇是毋是會使共伊tang2-su3內底e5衫收起來e5時，我koh開始懷疑：敢講，伊比我較早讀著「女性主義」，伊欲去揣伊家己？證明身為一個查某儂e5存在？

2002/12/27
2003/02/15修


────────────────．
＜舊相片＞　秀蘭瑪雅
詞：謝明訓　　曲：秀蘭瑪雅

心事放一邊　窗外烏陰天
晚風吹來惹相思
往事叼位覓　親像一齣戲
誰人來扮才袂傷悲

思念親像一張舊相片
雖然褪色猶原遐呢美
淡薄仔稀微　陪伴著你的笑面
是你嘸甘乎阮將你放袂記

雙手拿著這張舊相片
親像有你在阮的身邊
不敢算日子　甘願作夢不願醒
因為你永遠在阮的心內面


────────．
刊載於＜湠根母語文刊＞
第五期．2003/03/15