巴黎朝早o既天氣得15度左右，當然係好涼，但由於我地今日要出發去巴黎總店，所以一早就著到去飲咁，著條裙仔化行粧，打算全力出擊。
我地首先前往歌劇院影下相，再經過麥德勒神殿、協和廣場，就搭巴士去香謝麗舍大道喇！阿Sam帶左我地去一間食青口餐好好味o既Leon餐廳食Lunch，雖然一個青口餐要成€11，但d青口真係好鮮甜，而且成盤咁多，所以都叫抵o既。(我總共食左三次呢！)而今日Cindy都約左佢表姐相聚，順便叫佢表姐幫下手買LV。CiCi佢地三個先出發，Cindy同佢表姐就隔十五分鐘先入去。由於巴黎總店每日都有好多旅客o係入面買野(而且夠大)，所以就算到時我地七個都o係裏面都唔怕。今日我真係好驚，唔知係咪加上凍o既關係，真係由心打冷震出黎。步向LV shop o既時候不停叫自己鎮定 d，終於到左呢間萬人朝拜o既LV旗艦店喇，吸一口氣就入去喇！
入到去…哇…真係好鬼多人，迫爆o既程度直迫旺角。旗艦店真係名不虛傳，好大好似迷宮咁，我o係地下行左一圈，真係多人到埋唔到櫃台睇野，所以行去二樓睇喇！二樓少人好多，我首先叫個女sales比銀包我睇，點知佢叫我搵d戴住條巾o既黎serve。咁我走開一陣又再行返去，叫個一睇就知係gay o既sales比個Lockit新款我睇喇。佢o既蘭花手真係好頂癮，佢d眼捷毛又長到不得了，講野陰聲細氣又慢條斯理，所以我一聽佢開口就忍唔住笑，佢見我笑佢又笑啦，就咁開頭沉默o既氣氛就打破左喇！揀左幾樣items後 (順便一提，巴黎總店係任你揀幾多樣，不過可能臨比錢時佢可以cancel晒你o既order架！)，我為左減低佢o既戒心，就叫佢帶我去揀tie喇。本來佢叫我自己去就得，但我扮聽唔明同搵唔到路，所以佢都好無奈咁要親自帶我去。
當佢幫我試tie時，我又順便讚下佢啦，話佢戴咩tie都咁好睇。佢即時心花怒放，更加落力試比我睇。跟住我就讚佢 Your eyes are so attractive！哇……佢真係開心到不得了，態度好殷勤，不過唔係佢睇中左我，而係可能佢以為我非常冧佢……唉！買LV要買到咁…由於我怕最後會cancel晒我o既order，所以選多幾樣野就埋單喇！我又讚佢So nice啦，問佢叫咩名，跟住佢就派左張咭片比我，話如果第日要排隊入黎，show張咭片比”石Q”睇就OK。就o係呢個時候，Gay Gay叫我坐低，因為佢要去packing，佢問我飲唔飲野。我有d受竉若驚，所以話要水OK喇。點知佢話No No No! We have Coca Cola, Orange juice and champagne, don’t drink water！咁我要左杯橙汁喇～等左差不多十幾分鐘，我心諗佢咁信我，無理由買得€2000就走架，所以決定等佢返黎再叫佢帶我再睇。
佢返到黎後，我就叫佢帶我睇腰 bag，跟住再買多個銀包、電話繩，諗住買單前再”立”多個大袋就走。今次佢又親自帶我去比錢，本來有個中東人比緊錢o既，點知佢截停人地，叫個cashier收左我錢先。最後佢仲問我識唔識出返門口，送埋我去搭lift先走。
今日我總共買到13樣items，加埋都有三千幾Euro，當然好開心啦！不過一山還有一山高，Cindy個表姐買左四千幾Euro，Tammi都係三千幾 (仲有兩個sales送埋佢出門口叫佢聽日再去)，而Sammi更成為最高紀錄，買左五千幾Euro！！不過有人歡喜有人愁，CiCi佢地竟然買得好少，可能總店check到佢地有兩本passport啦～因為我地四個今日有咁好o既成績，所以，明爭暗鬥就開始進入白熱化喇……
巴黎總店正門
巴黎總店側面
文章定位：
