心 聲／李爺
黃昏的時陣 （時陣：時分）
提著錄音機收集淡水河的聲音
惟海口的風送來的呼呼聲
漁船仔搖震動相碰的篤篤聲
水筆仔互相磋磨的沙沙聲
鷺鷥伸長頸呼喝的嘎嘎聲
囡仔人嬉鬧蹉跎的哈哈聲 （囡仔人：小孩子）
盲者孤獨扭(qiu2)琴的伊伊聲
日頭偷偷仔落水的噗通聲
作伙彙集到 （作伙：一起）
河水低沉的悠悠聲
收拾行囊準備離開的時
遂惟半線飄來一陣溫柔的聲音 （半線：彰化市舊稱）
輕輕叫著我的名字
遙遠又閣清楚
朦朧又閣熟識
浚入去錄音機
使人忍袂稠心跳加速 （忍袂稠：忍不住）
將麥克風對著胸坎
錄下我的心聲
砰－砰－砰
甜蜜一世人／潔民 2001.3.25
看著汝的來批
透過INTERNET
傳送到電腦螢幕浮現
伴著一壺芬芳的潽洱茶
清芳的滋味，甘醇的喉韻
連同滿腹的相思
作夥一喙飲落（re3）
每隔一點鐘久
我一定愛看一擺汝的來批 （批：信）
親像樹枝思戀天頂彼輪
定定來探望伊的明月
佇孤獨的深深暗暝
心內清清楚楚，感受到
有人佇咧關心
有人佇咧數念 （ 數念：想念）
讀汝的所思所想
是一件茲呢快樂的代誌 （代誌：事情）
汝的一句一字
紡織著美麗的紗線
輕輕網著阮的心肝
互阮開始相信
世間愛情的真實
試看覓，我應該勇敢褪去防衛的盔甲 （試看覓：試試看）
試看覓，我應該用愛付出上真的心晟
罩茫的心樓已經透出一點明亮
生銑的心鎖已經揣著一支鎖匙
容穩汝的夢逗逗仔踱入來 （逗逗仔：漸漸地）
容穩汝的人恬恬仔住佇心內 （恬恬仔：靜靜地）
汝的愛已經拍開阮心底的天窗
互阮甜蜜一世人
答海妖＜愛的千字文＞／zenyueh
將汝寫互我的批攏總收起來 （批：信）
袂閣再提出來看 （袂閣：不會）
彼個屬於青春的影跡
一字一句
使我歹勢，令我驚惶 （歹勢：不好意思）
親像風雨吹落厝簷
愛的千字文讀過千萬遍
猶原不識汝的心
啊！
莫怪人講 （莫怪：難怪）
思戀是一首詩
情歌難唱 情詩難寫
3/21/01 9:15 PM
等待相逢／心是孤獨的獵人
安靜的暗冥
想起交你相會的日子
點點滴滴
落入我的心肝
無奈天的緣
這昵厚重
置每個深更將你思念 （置：在）
想起牽你的手
走置都市的街路
你的頭不時靠著我的身軀
講咱兩人甜甜的情話
彼時陣親像置天頂
世界只有咱的愛咧滾
我也知影 （知影：知道）
聚少離多的怨歎
有情人總是無情天
候咱離這昵遠
匆匆的做夥 （作夥：在一起）
親也袂夠抱也袂夠 （袂：不會）
離開時
我看你紅紅的目眶
揮手沈重
疼惜你
置即個短短的世間 （置即個：在這個）
我的心袂離開
陪伴你身邊
等候我返來補償我的愛
文章定位：
