大豬...豬仔...BB豬...豬豬B 幸福的一家...豬

128愛的鼓勵 0訂閱站台

屋企地板裝修, 有一部份傢俬搬左出走廊, 包括鞋櫃。我完全唔知道會有咁既移種….直至佢地搬左之後。本來都無咩問題架搬左出走廊, 但係弊就弊在我今日要去巡房, 即係呢我今日係唔可以著波鞋既….咁我尋晚都諗住無所謂啦, 聽日朝早出去拿就ok啦, 咁於是就大安旨意咁訓覺, 今朝大安旨意慢慢扮靚, 慢條斯理咁走出去走廊拿鞋。點知呢, 一揭起塊布, 先發覺所有櫃門都向住牆既方向….咁我唔想嘈醒人幫手所以就自己黎啦, 我搬左一陣就掉轉左個鞋櫃, 好彩都唔係好重o者。不過, 打開佢發現我要既鞋竟然係另一個鞋櫃入面……到最後我終於都拿到我想要既鞋, 返工去了, 仲要無遲到添, hehe好叻。
其實每逢星期三朝早都係腳軟既時候, 學野既時候, 亦都係傷感既時候, 但係每一次呢三樣野既比重都唔同: 如果教授有黎既話, 就一定係學野既時候; 如果教授有黎而又多複雜既病例既話, 就一定係學野加埋腳軟既時候; 當然教授唔黎都有野學既, 但係就一定唔會腳軟啦, 因為會巡得快好多^^ 而傷感既時候呢, 就唔係由教授黎唔黎決定, 而係在於當日有冇巡深切治療部同埋有無人做截肢手術。(當我講到呢樣野既時候, 個日記就會好長…..)
先講深切治療部啦, 入親去都係好嚴重架啦….而我就最怕係入面見到d青年或者係中年既人, 仲要係因傷入院既。就好似今日咁, 尋日因船艦意外受傷o個個人入左黎, 腳骨斷左, 頭骨裂左, 仲見到佢好似好痛苦咁。佢塊面血淋淋, 因為顱底骨折所以血不斷由鼻湧出黎…..插曬喉既我都見唔少, 但係…..血由眼流出黎就真係太震撼啦!! 我忽然間諗起今日有個人坐係條馬路度等車撞(今日真係發生左几多令人意外既事)…同一個不想死而又受傷既人相比, 我希望呢個世界可以平衡d…
而點解我會咁怕見到截肢手術呢? 係因為我覺得身體無左一部份係一件好慘既事。手手腳腳對左咁多年好有感情架嘛….一日突然無左, 叫人點接受得黎呢? 所以我覺得呢d病人好慘, 同埋都好唔明白點解有d人因為痛或者好得慢就要求要「切左佢」。可能咁樣佢地會快d返到工, 或者無咁痛一了百了…不過…嗯真係好難理解, 都令人好難過...
中午既時候同一個朋友一齊食飯, 佢呢几日好唔開心。其實相比起黎我今日係几開心架, 當然見到佢咁唔開心都令到我有d唔開心, 但係呢一個唔開心既人又點可以令佢身邊既人happy呢, 咁所以我一邊食野一邊同佢傾計。臨走既時候佢話我知佢放鬆左好多, 好高興可以幫到佢呢。KK, 如果你睇到既, 我想叫你唔好咁sad呀, 你仲有好似我咁既「正義既壞朋友」架!!^^

突然間呢几日天氣好冷, 雖然要著好多衫好似個亞婆咁, 但係表示我最鍾意既秋天又到啦! ^^……仲有呢, 今日真係好好好開心呀!!