Chit 日，赤kha 大--e5 chhoa7 我步攆去到i e5 苦瓜園：「Tak8 日就ti7 我耳孔邊she-seh念，害我耳孔kui2-a2 透暝吱boe7 停。Na7 koh m7 ka7 你chhoa7--來？Eng 暗我koh 免睏--a。......」赤kha 大--e5 叫我去園--nih chhoe7 春花嬸--a2。Chit-e5 赤kha 大--e5 M8ä teh 笑詼，我thah e5 知春花嬸--a2 生做圓iah 扁？無ka7 問hou7 詳細na2 會sai2,苦瓜園hiah-ni 大phian3 ，苦瓜旋（soan） 藤旋kah 密chiu2-chiu2。無 i 是beh 叫我ti7 苦瓜園摸針--ou？無phoe，赤kha 大--e5 ka7我tan3--e5 做i去，我taN害--a 我。Beh 摸就來摸，天無絕人之路，摸久總--是會hou7 我摸tioh。
摸--leh 摸--leh，誠怪奇？Hia na2會有1-e5 戴草笠a2 koh kham3 頭kham3 面，boe7 輸是胡蠅teh 戴(ti3 )龍眼殼--leh。來ka7 問看--leh，看i kam2捌春花嬸--a2。
原來hit--e5 就是春花嬸--a2.。既然chhoe7 tioh--a 就kin2 ka7 問看今a2 日e5 工課是siaN2 ，食人頭路就kah活叫--leh，na7 無3～5工就hong7 “get out “ chhia 畚斗--a。Beh ka7苦瓜翻身兼品管--ou。春花嬸--a2 講苦瓜e5 特色就是khah kah意有日頭e5 所在，所以苦瓜long2 生ui3苦瓜藤e5 頭殼頂。 今a2 日e5 穡頭就是將匿ti7 苦瓜籐koan5 頂e5 苦瓜sui5--e5-a2 sui5-e5 翻身，hou7 in 吊ti7 苦瓜籐kha 。另外，na7是有kho3傷e5 ，形kah bai2 e5 就挽落來hiat8 ti7 藍a2內。
M7-thang 料叫我講e5真簡單--neh，chit-e5 赤kha大e5 別位e5 田園m7 bauh8,soah 來bauh8 chit 坵撐 ti7半山腰。Lian -mi koan5 ，lian-mi低。M7是我新手低路， ma7 m7是我chit--e5 都市song5 驚艱苦。 連老鳥春花嬸--a2 ma7 haiN-haiN 言--a，看赤kha 大--e5 bauh8 e5 園有joa7 phaiN2 做tioh 好。赤kha 大e5 bauh8 e5 田是起起落落，原來e5 主人koh是生做落落koan5。害阮beh peng2 chhoe7 苦瓜e5 時toe3 leh 起起落落koh 兼躡kha尾。
田園phaiN2 行，穡頭koh 誠無趣味。Chhoe7 苦瓜、hou7 苦瓜翻身、挽phaiN2 看頭e5 苦瓜。挽kah 我是kui 腹肚e5 苦瓜露，無細li7 phah 1--e5 噎，koh 會hou7 苦酸e5 苦瓜露激著。無法度--lah，食人e5 穡頭就算是koh-khah 艱苦也tioh 做。Koh 再講，來chia 本底就是beh 清洗腹內e5 am3-sam3 mih8,na7 無苦藥是beh an2-choaN2 排瀉體內e5 毒素。趣味？趣味是家己chhoe7--e5,kap 春花嬸--a2 bong2 phou3 豆，手--nih e5 穡頭na2 做--lah ma7 是boe7-bai2。莫怪，莫怪吳樂天會chiah8-ni 食e5開。Khah早阮 ma -ma in 工場e5 女工tak8不時ma7 teh 聽後吳樂天。作穡無聊e5時，無聽人講古是beh 聽siaN2 ？ Ti7 chia，m7-taN7是有人phou3豆，雞a2 na7是樂暢e5 時koh會奏山歌鬧熱1--e5。1日e5 穡頭落--來，人teh 講--e5,土地na7 是phah荒；重新壅肥是誠艱苦e5 tai7-chi3。Chin2時我酸軟痛總來e5 身軀kap phah 荒去e5 土地kang5樣，總--是tioh8愛辛勞才有koh kah 勇壯e5漢草。
悲--a，哀--a。向時人人叫山豬e5我soah ti7 山城漏氣漏觸。Na7是beh 講起khah早。mai3 好--a，好漢無teh說過去，只是苦瓜園e5勞動致使我檢討誠choe7事項。想起khah早gin2-a2時代吵beh 動物園看猴e5景致。猴ti7 人e5印象中算是khiau2 kah有剩e5 動物，m7-ku2我幼年e5印象內面，猴na2像m7是猴，連lio5-lio5--a2 猴e5習性tioh8無。Che是我gin2-a2 時代e5 悲哀iah是猴e5悲哀？Long2是khah有iaN2。Ti7 煙花城市e5 我chham我記持--nih 動物園e5猴kam2有無siang5?相siang5。關ti7籠a2內e5 山豬漸漸也會失去i 原來勞動e5本性。
「累趴了」是thiam2 kah phak--leh hit樣。卻是心肝頭有1種莫明怪奇e5爽快，無tiuN 無持m7 知暢siaN2 ？Kam2是為tioh8做1-e5勞動者e5樂暢；iah是對事項新鮮e5好奇？Na2像拔大索1-peng5來 1-peng5去，ah long2是lah。橫直tioh8是1種thiam2 koh心適e5矛盾ti7 心頭。
人講phak--leh phak--leh khah boe7 tioh8 槍，偏偏我明明就「累趴了」soah 無phak--tioh8。赤kha大--e5 iah 知是an2-choaN2？ 可能是看我有起，iah 是thiau-ti3 chhong3-ti7。I 叫我chit--e5 酸軟痛增差iau2-boe7「趴」e5 身軀tau3 相kang7 i chhiau肥料。肥料是臭koh激--人，我是強beh hou7 hip kah 險險半相死。SiaN2人會知大--e5 應我講in 某e5 芳水long2是我認為臭koh 激--人 e5 肥料換--來e5、in 厝--nih e5 開銷是chit 寡硫安chhiau雞屎tauh8-tauh8-a2 1點1滴liap 出--來 e5,koh 有lah，我tak8 日long2 tioh8 食e5 果子青菜long2 ma7 tioh8 靠i才有hit 款甜度chham青脆。聽大哥an2-ni 開破，臭激e5氣味雖bong2 iau2是臭mou-mou，m7-ku2以食果子拜樹頭e5心情 看待，臭激bong2 臭激，聞久ma7 lio5-a2有臭芳水味。果子e5 甜味我就kah 無瞭解--a，聽候我na7 有起khong e5 1日，可能會知硫安chhiau 雞屎e5 甜度kap喉運。
搬徙肥料kap chhiau 好勢了後已經是日頭落山m7知過joa7 久--a，身軀m7-taN7 酸軟痛。Chhiah-iah8 兼iau 同齊來。赤kha大e5 叫我身軀緊去liu5-liu5--leh，i beh chhoan5 chit 味讚--e5請--我。i 講到chia我聽到te3,心肝chhiang2 --leh chhiang2--leh.來到山城也beh kui 禮拜--a，誠久無sut-tioh8 好料e5--a。Kam2會是大e5 看我今a2日穡頭認真，beh 請--我？Ke講無效，先來ka7 身軀洗洗leh，聽候赤kha 大--e5 變siaN2 把戲。
洗掉kui 身軀e5 chhia-iaN7 行出浴間。Chit 種芳咪，是薑e5 氣味。Kam2會是chia e5 名菜，薑絲炒大腸？M7是，聞無酸醋e5 味。Iah知大e5 teh變siaN2戲？結果e5 答案是－－烏糖煮薑母。
Chit 味算siaN2-mih8 好料--e5 ？無iaN2 無跡soah hou7 赤kha 大e5 講kah na2 有1枝柄thang gia5 --leh 。赤kha大e5 1碗烏糖薑母捧ti7 我e5 面前嘴na2唸：「烏糖改毒，lim-lim--leh，都市song5 就是都市憨，long2 相siang5 意思--lah。M7 知寶koh 嫌寶臭臊。來--lah，ke lim--寡，有好無bai2 。 」想boe7 到我beh phiN3-siuN3--人顛倒hong7 phiN3-siuN3。臭頭有iaN2 誠厚藥，赤kha 大--e5見擺肥料chhiau soah iah 是藥水洗soah long2 tioh hiaN5 1-kou2 烏糖薑母茶來排瀉體內藥毒。我心頭起疑問i看是有siaN2-mih8憑據？「無--lah，人放落--來e5話tioh聽，照做就好。問hiah-ni 濟beh chhong3-siaN2。」kam2有iaN2？kam2有iaN2 ? 我m7知。M7-ku2 赤kha 大--e5 hit句話「人放落--來e5話tioh聽」誠hou7我信服。橫直無敗害，有lim有保庇。
Hit 暝，骨頭酸kah piak--leh piak--leh tit8-tit8 kaiN-kaiN叫。無電視thang 陪拌失眠e5 我只有坐ti7 工寮門埕吹tioh8 微微夜眠涼風看tioh8天頂光光月色。Lio5-a2 有想厝e5心情。誠怪奇，ti7都市生活e5 日子na2會對厝無siaN2感覺？koh-kah奇e5 是na2會來到chia了後soah tiaN7-tiaN7 有思念厝e5 心情？無瞭解，也無想beh 知。Kan-taN7 想beh靜靜看tui3 天邊，拜託月娘照出阮故鄉模樣。
看--leh 看--leh，赤kha大--e5靜靜坐ti7 我e5身邊：「無意無思，偷看月娘long2 無teh相招。」I 手--nih bih-lu3 2罐，開嘴koh thih8 ：「na2-thang無酒來配。」講soah，bih-lu3 chit 開，阮2-e5 1嘴hou7乾，灌tou7-kau5 hit樣hou7 乾。
講南說北，飛天鑽地話虎瀾。阮2-e5 boe7輸司公a2 神杯，赤kha大e5 講天，我來說地。我講來山城e5 理由，i 講 i ti7 山城e5 遭遇。赤kha 大--e5,新竹人。Khah早是大工廠e5 大頭家，ti7 台灣經濟飛tioh8比時間kah kin2 e5 年代，土地1寸貴過1寸e5 年代，錢銀tui3 大--e5來講是比水kah 好趁。M7-ku2 台灣人講是無三年e5 好光景，工廠過大陸、接無定單。赤kha大--e5殘殘ti7 工廠iau2-boe7 了錢e5 時ka7 工廠收起--來，留某kiaN2 ti7 新竹，i家己1-e5 走來山城bauh8 田做gi7-niu7 bong2 渡日。我，也是新竹人，無出脫e5 大學生。對日子失去趣味，想beh chhiau-chhoe7 eng2過 e5 生活走來到chia。
尾--a 赤kha大--e5 問我頭1日做穡e5感覺。感覺誠好，日子ma7 感覺過了khah 充實。M7- ku2 也是有giau5 疑e5所在，春花嬸--a2就是。
春花嬸--a2,ti7 苦瓜園kap i phou3 豆接觸了後i hou7 我chit 款誠特別e5 感覺。春花嬸--a2 e5 話語親像eng 暗e5 月色hiah-ni 精采，重巡e5 眼神soah有行過人生苦疼e5滄涼悲哀。
大--e5恬恬坐ti7 門埕看tui3 chhan像春花嬸--a2 e5 eng 暗e5 月色。3分？5分？過了1段誠久e5 時間，赤kha 大--e5 koaN2走恬chih-chuh e5 景致：「春花--a2算是苦瓜kun5 鰱魚－－苦憐！」
春花嬸--a2 16歲嫁來客人庄，本底kap in 翁同齊看雇5分地e5 柑a2園。生活m7是kai3 好額，m7-ku2 3頓iah 算雇會chiau5。雖然錢水kah少，chhiaN5養2-e5後生koh 算會tit8 過。
Hit年，山城e5 柑a2欉tit8-tioh8病蟲害，春花嬸--a2 in tau生活chit 時soah 失去oa2靠，柑a2欉1欉死過1欉。姑不2將春花嬸--a2 in翁才來出外討趁。好死m7死e5 悲慘tai7 1-chan5 kham3 過1-chan5,1場意外車禍紮走春花嬸--a2 kui 口灶e5 依oa2。想來人ma7 誠趣味，有人是為tioh生活來離開山城，我chham 赤kha大--e5 soah 為tioh 生活來到山城。阮ti7 山城chhoe7-tioh8 新e5 生活，卻是有人客死他鄉。
赤kha 大--e5 講就iau2-boe7 soah，撐倒ti7門邊iah 知是醉iah是thiam2?睏kah hun7-hun7 kiam-chhai3 死死--去。Chhun天邊月娘照tioh8勞動了滿身酸痛e5 iau2是睏boe7去e5我。
過tng2 kang，猶原ti7 苦瓜園--nih chhoe7 苦瓜、替品質好e5 留落來e5 苦瓜thah 1領保護身軀免驚病蟲咬tioh8來破害i美麗外貌e5外裘。替苦瓜穿外裘hou7我koh kah斟酌看tioh8繚脯脯e5 苦瓜藤。Na2像是經過年歲風霜了後所殘剩落來e5痕跡；na2像時間e5無情行過所留落來e5 kha跡。看kah有旋(seh8)神--a soah boe7 記tit8 手--nih e5穡愛做。春花嬸--a2 大聲hiu我：「kha手kah 猛chheh--leh，m7-thang lok8 逃。」
看春花嬸--a2經過人生無情e5 霜雪，繚痕lio5-lio5--a2 開始爬滿 i e5 面。Kiai5-chhai3 i 驚我無聊？kiai5-chhai2 i 家己teh無聊？春花嬸--a2 手--nih工課na2 做na2 ka7我講起苦瓜e5 故事。
苦瓜，ui3歐洲傳過--來。歐洲人欣賞 i 外形sui2, long2提i做觀嘗e5植物，m7-ku2到咱chia soah hou7 咱提來做疏菜食(sit8 )用。老1輩e5人teh講是因為咱認為苦e5 mih8件會tang3降火氣、雇身體......
愈聽愈斟酌e5我可能是昨瞑無睏好勢致使tioh8 我koh 再旋神，春花嬸--a2講 i e5,我想我e5。春花嬸--a2 早年死翁守寡，家己chhiaN5養2-e5 gin2-a2。也tioh8 厝內也tioh8 厝外，日子e5 傷痕tiaN7-tiaN7 khng3 ti7 i 無重巡e5目睭。I講現chu2時生活e5理想是beh chhiaN5養2-e5後生讀冊，ng3望in出脫。只要有望，koh-khah艱苦e5日子也tioh8渡--過。I就親像苦瓜老藤，風雨淋，日頭覆，只要有望，人生苦汁koh再苦澀落喉也甘願。
文章定位：
