伊ka7伊e5手牽an5-an5，彩鳳e5手紋na2像菜瓜鬚，穩心soan籐佇劉偉一手keng7起來e5棚--a2，chhan像天災戰亂了後重逢e5愛人，ui3-hiaN2手紋之間共同e5命運流失佇1-e5意外抑是時間無情e5 chhoah流nih。劉偉e5另外1隻手捧tioh8 iau2-koh燒loh8 e5神像。
In靜靜khia7佇夕陽紅霞nih，遙望遠方天kap地交合處，然後注神看tioh8對方。想欲知道e5，想欲問e5，long2佇in e5心內。
一陣烏煙kng2 tioh8世人e5 chhia-gia5，chong5入這個閑sian7 e5畫面nih，ui3彩雲e5 kha底phu5-ek。彩雲kap劉偉發覺這道烏暗煙ngiauh-chhi7-chha7，in 2個人4 隻kha ka7這道煙lap tiau5 leh，chhin-kiaN無tiuN-tu5 hou7烏煙ka7這場寧靜eng-ia7-ka7-kah。
日頭曝kha-chhng，彩雲iu5原醉心佇家己e5溫柔鄉nih。夢中，伊聽tioh8酒仙佇伊夢nih背誦落難天堂e5生活公約。
「其實ma7無siaN2大tai7-chi3--lah。只是有1-koa2小細節愛逐家遵守。M7-thang看chia細節細bong2細，Che long3是落難神定落來e5--ou！」酒仙開始poe2-hoe7生活公約。第一條，來chia toa3 e5人long2是艱苦人，逐家互相，mai3 siuN7計較。第二條，be7-sai2 thng3 腹theh，an-ni對神明不敬。第三，家己私人e5內衫內褲愛收hou7好。若無對神明也是不敬。…彩雲感覺這個夢足清楚，假若當年酒仙對伊講過。
來chia三年--a，假若cha-hng chiah發生。夢nih，彩雲an2-ni想。伊e5目屎無tiuN-tu5 ui3 目墘流siah8。
「Kam2 thang叫li2 a偉？」
「M7，我無意見。」
落難天堂，這間破廟--a2內面奉sai7 e5神明若像是濟公禪師？酒仙是an-ni解釋：「辦事e5時chun7，long2醉茫茫，應該是濟公--lah。」
民間信仰nih，每chit個神明long2有家己e5面模--a2。每chit個木工師傅e5手藝不同，不二過神像e5面形iau2無ham2-kou2 kah使人看teng5-taN5。落難天堂e5神像卻是hou7人無法度分辨。神像long2是坐kah 4正4正。這尊落難神卻是半跪leh？假若有siaN2-mih8意涵佇leh。
「酒醉--a？我酒仙neh！醉八pai2--leh。」每pai2，人ka7問講kau3底有看清楚落難神e5臉無，伊總是回答kap真無pai7-pan2：「就kap lin2看kau3e5相kang7，我騙lin2 ia7無秤頭thang liam2--a。」眾人看kau3e5，就是奉sai7佇廟nih hit尊神像，kui個臉部扭曲，像hou7卡車kauh--過e5模樣。有淡薄--a2怪奇，有人感覺這尊落難神是屬邪神hit類e5。
Che7年前，一個聲音佇酒仙e5體內4-ke3 竄。酒仙根本無teh ka7神經。酒仙離開厝了後，跟toe3這個聲音e5引chhoa7，來kau3客雅溪邊找tioh8伊。
酒仙笑笑--a：「Li2，也有落難e5一天--a，萬幸--lah。死留全屍。」
會能chih留全屍是何等萬幸。有koa2落難e5神是無hiah 好字運--ou。「死」無全屍是su3常有e5 tai7-chi3。
硬beh神明講無影無chi5跡 e5 tai7-chi3，神也有做be7來e5 tai7-chi3--a。
「Na2有siaN2-mih8明牌…」雖然是初初見面，soah若像是熟識百年e5朋友，會使佇對方面前完全流洩家己e5情感。酒仙漸漸ka7臉深深tai5佇家己手面。
酒仙暗想，既然有緣，盡人事聽天命--lah。
「A偉，lan2天堂有4間房，」酒仙指a偉e5隔壁房：「隔壁住e5是文輝。Li2對門hit個是彩鳳。
「來這e5人都有家己e5故事，汝慢慢會瞭解。無得確會ka7汝心肝nih e5結拍開。」
酒仙語soah，ui3房門口離去。Na2行na2搖頭。一直kau3伊hit粒光頭山消失佇巷路e5盡頭。
劉偉一個人孤孤坐佇房間nih書桌--a2頭前，ui3行李--nih theh8出Franz Kafka所寫e5《變形記》。劉偉注神窗外：佇Chia變做鐵甲龜應當無人攪吵？
對門無張持唉叫1聲：「Hah！」拍破劉偉成做鐵甲龜e5思考。
彩鳳予家己e5夢驚醒。彩鳳e5夢--a……
彩鳳坦khi佇床頂，伸手摸濕糊糊e5枕頭。Na2會？A母，瑞隆。In na2知我搬來chia？連後頭厝long2無轉去--a。In猶找會 tioh8？Be7-sai2。Be7-sai2予in入來。彩鳳趕緊起身，將窗仔鎖an5。行kau3房門邊，oa2佇房門。佳哉，猶鎖tioh8。
伊轉來床邊，腦海nih8一直是a母e5形影。好，我走。我走。Lin2 mai3 koh來我chia。彩鳳搥家己e5頭，欲ka7 a母kap瑞隆ui3腦nih搥出腦外。碰碰碰……
是kha3門e5聲音。彩鳳警覺：「Mai3入來，」彩鳳ka7家己chiN入去棉被nih：「Chia是我家己e5房間。
「Lin2 long2 mai3入來，Chia是屬於我e5房間，我家己e5房間。」
半刻鐘，碰碰碰e5聲音停--a。彩鳳偷偷--a2 ui3棉被縫siam--leh siam--leh。這是我e5房間，這是我e5房間。
彩鳳koh再ka7家己藏入去棉被--nih。烏暗e5被管--nih na2會有白色鼓吹花？8蕊？瑞龍ka7我會不是e5 hit工也是8蕊鼓吹花－瑞龍講8蕊花e5語意代表tioh8懺悔，希望我kho再予伊1-pai2機會－He是一個燒lioh8 e5熱人下pou，瑞龍約我佇學校水池邊。伊e5話予我確信我是伊今生e5唯一－Hit年，阮交往。不joa7久，歇熱--a。阮各人轉kau3家己e5故鄉。面對未來e5不安，我選擇bih，bih佇家己e5世界nih。瑞龍，伊吵、鬧，鬧出我對伊e5信任，決心ka7家己e5一生交予伊－佇溫暖e5夕陽nih，我ka7手輕輕khng3佇伊手面，望向遠方e5海洋。伊kam2也kap我同款？描畫阮對愛情e5向往－日後大學e5日子，阮常來水池邊，手牽tioh8手－出業了後，阮猶原甜蜜－工作，等伊退伍。Soah無感覺空虛，因為夢想－直kau3lan2美夢成真，成為結髮夫妻。夢想成真卻是殘酷e5開始。夢想kap現實生活e5差距使人無法度喘氣。
原本想敦睦厝邊e5劉偉鼻 a2摸--leh5轉來房nih：Chia每1個人真正有家己e5故事a。我嘛是1個有故事e5人。
劉偉看tioh8 ui3窗a2框框nih延伸長去e5細條路，樹叢垂掛佇框左角頂lam7 tioh8 chhek8鳥-a2 e5叫聲。罕得好運－自ui3 ka斷我kap媽媽e5 衣帶開始，我就kap好運無緣，至少我認為－會使快速尋tioh8安身e5所在，而且環境kap家己想e5 kang7樣清幽。劉偉無poah8入家己e5思考nih siuN久，遠端細條路傳來酒仙e5歌聲：明知家己無路用，才來酒國做英雄……
酒仙行kau3「落難天堂」這塊家己用油漆畫e5木匾跤看見劉偉khia7佇窗邊：「A偉--a，來！」酒仙備pan7酒配kap酒欲歡迎a偉來落難天堂安身。
「A偉--a，順soa3叫彩鳳同齊落來--lah。人che7熱鬧，酒才香。」
酒仙e5熱情歹the辭，劉偉無koh ke想家己e5故事，踏出門外準備kha3彩鳳e5門。彩鳳e5門也un5-in5開開，彩鳳一手giu2門一手弄頭鬃，無張持看見劉偉：「汝是新厝跤，莫怪酒仙會佇我夢nih唸經。
「Tu2-a2 ka7汝驚tioh8？失禮。」
「酒仙愛我來」
「今仔日我有件欲講，袂tang3陪lin2。」
「喔。」
「歡迎汝來。」話soah，捧tioh8手nih e5面盆ui3浴室行去。
劉偉孤一人落樓。來kau3樓跤，酒仙gia5 tioh8清香3叢：「先ka7落難神招呼。」劉偉提tioh8香，目khoeh。虔誠向落難神問安。心境平和真che7。回身問酒仙：「神仙也落難？」酒仙欲緊 na2慢，坐佇供桌前e5長椅頂：「來chia e5人攏有家己e5故事，落難神也是人修成e5。
「Kiam2-chhai2伊是為tioh8 1寡未了e5心願才下凡，」酒仙提tioh8酒往家己嘴nih栽：「Ah～kiam2-chhai2伊teh等待伊e5恩人也無tek-khak。Ah，世事--a。」
「來，kam杯！
「A偉，汝會來chia，是落難神e5安排。彩鳳來chia，是落難神e5安排，文輝kap我leh？嘛是落難神e5安排。
「這叫做緣分--lah，輪迴，汝知無？」
這時樓梯傳來khah-khah e5響聲，是彩鳳落樓。彩鳳對酒仙講：「酒仙，差不多就好，mai3飲醉koh起酒siau2。」
酒仙提tioh8酒矸：「死查某鬼，ka7我漏氣。來，飲1杯。」
「汝飲就好。我今天有件愛簽約，簽kau3手chiah買酒予汝食紅。」
酒仙歡喜：「予落難神食紅，予我這個落難人食紅。」
彩鳳行出大門，對tioh8劉偉點頭，隨tioh8車離去。簽siaN2-mih8約？劉偉好玄問酒仙道：「酒仙，這個彩鳳teh做siaN2-mih8事業？」酒仙先是飲1嘴酒潤喉嚨：「做保險。做死人留予活人用e5頭路。」酒仙帶tioh8八分醉意：「老細--e5，汝kam2知我嘛有1個後生kap汝平款大學出業，」酒仙想欲ka7手放佇劉偉e5肩頰，m7-ku2手無聽話，搖搖晃晃。酒仙只好用手指tioh8劉偉：「愛我用生命換錢予hit個禽生。Mai3想。
「我是愛博。人講：『船過水無痕』我腳步一時踏差，想要挽回已經siuN慢
「仙人拍鼓有時錯。我是人neh！
「這個禽生，竟然boai3認我這個a爸
「講我是殺死伊a母e5兇手
「我只愛伊a母1個，我忍心殺thai5伊？伊是我e5牽手neh
「本底想座轎步步進，無奈牽罟倒退行。世事--a。」
劉偉na2 aN3耳聽na2勸酒仙：「酒仙，飲酒歡喜。世事過往，mai3 koh再提起。」劉偉心想：kiam2-chhai2只有酒精會sai2夠化解世間e5仇恨，今朝有酒今朝醉，a2若明日leh？
「堂堂大學生，na2會住入來落難天堂？需要我酒仙ka7汝鋪排否
「若講tioh8我酒仙無是佇便所彈吉他，疑難雜症交代佇我手頭，包汝掛無事牌。」
A偉幾杯落肚，較無束縛：「汝家己m7是一直掛tioh8：『唉～世事--a』」
「連汝這個落難天堂e5『菜pi-pa』也ka7我漏氣，boai3 kap汝講lah。
「我罰3杯。」酒仙提tioh8酒矸直栽，劉偉見款：「菜鳥m7-bat世事，我嘛罰3杯。」2個人提tioh8酒矸一直ui3腹肚內灌。
兩人將酒矸nih e5酒1嘴飲ta，oh1聲同時吐tioh8嘴舌頭a2，好親像跪坐落難天堂門前e5苦樂。酒仙先將嘴舌頭a2收歸，目珠bui-bui看苦樂，大罵1聲：「苦樂，汝這隻落難狗，也敢oh8 a偉飲酒e5樣。」苦樂予酒仙教示，青狂將嘴舌收入嘴nih ui3邊--a行去。劉偉也收回予風sian3-ta e5嘴舌。
「我佇想，是我ka7飲ta猶是伊ka7 我飲ta
「落難神toe3我chiah-ni che7年
「Long2怪我愛飲，ka7信徒寄附e5香火long2飲乾。」
劉偉此時已經醉倒佇1邊，有淡薄出酒。酒仙看伊：少年人，沒食3把青菜就想欲peh上天？我酒仙neh。無久，酒仙嘴頂e5笑容無去。落難神toe3我chiah-ni久--a ，我猶是予伊teh落難。汝看，連落難天堂猶是我這個青盲牛ka7伊畫起去--e5。無采落難神chiah-ni靈聖，我soah從來無看伊笑。
「A偉--a
「睡kah na2死豬，猶會oh8豬叫？」設使來去ka7彩鳳買hit個死人留予活人用e5，m7知kam2 thang留予神用？
已是日落西山，文輝趕轉來落難天堂。轉kau3堂nih看見2個飲酒醉e5 cha-pou人phak8佇神桌頭前睏大豬：「酒仙，汝答應落難神今日29欲替世人排解問事，汝na2會醉死kau3第18層a鼻地獄去。信徒是來請神問事，不是欲請鬼開藥單neh
「酒仙，酒仙，」見在文輝怎樣叫，酒仙做伊的春秋大夢。辦事e5時間將近，文輝chhap-chhap伊37、21先將敬果擺好。然後ka7劉偉kng 去房間。因為落難神e5靈聖，信徒順序行入落難天堂待候落難神予in答案。
「文輝--a，酒仙未起駕就先醉--ou？」
文輝青狂狗peh8 上壁，lam5-sam2話：「落難神有tai7-chi3欲交代，tu2-a2才kap酒仙開會soah。Chit-ma2轉去淨身更衣。」
眾信徒看文輝強giu2酒仙坐刺球，kiam2-chhai2刺球會使趕走伊e5酒氣。酒仙一坐起去sui5搖頭晃腦：「更衣，」文輝猶sa無tioh8鬃頭，憨ti3-tu3看tioh8酒仙。酒仙白話講：「換杉--lah！」文輝才驚覺落難神已經降駕，趕緊提tioh8落難神e5袈裟phoa7佇伊e5身軀。
「來，吳春生。吳春生
「來chia尋查某kiaN2？愛去報警才對。」
「有--lah，有去報警察。也愛人也要神--a，請落難神tau3相kang7。」
「好！汝會來找吾，代表汝信吾。我袂予汝漏氣--louh
「汝chit個查某kiaN2目前猶是siau2豬母1隻
「我講話較歹聽汝mai3見怪--louh。」
「袂--lah，落難神，請汝tau3相kang7to be7赴--a。」
「三月日
「我保汝三月日會轉來--louh。」
吳春生緊拭目屎tim3頭。
「但是，吾kap汝講，kaN2食冰支就m7thang驚食歹腹肚
「若是食歹腹肚，汝也愛心甘情願
「好！」落難神手nihe5葵扇拍佇吳春生e5頭。
落難神目seh四周箍lih8--a2 ，葵扇指tioh8 khia7佇門邊e5臭頭cha-pou人：「陳a華，敢來敢擔當。匿佇門後害我尋無。來，kap吾飲1杯。」陳a華行向落難神：「落難神--a，」陳一句話未soah落難神當眾人火toh8：「汝今日來犯了吾e5大忌，吾落難神今日落難落魄就是因為kiau2
「汝這個m7成kiaN2竟然想來我chia求牌支。」
陳a華予落難神khau kah連豆花long2 m7敢bak8佇伊e5面。
「吾問汝，吾e5住所需要翻新，目前欠經費
「m7知吾kap汝貸款，汝利息怎樣算？」
落難神e5葵扇重重拍佇陳a華e5嘴腮：「汝是有妻有兒，pat8人也是。錢銀往往三不便
「吾話講kau3 chia，mai3 siuN ka7汝洩面子。汝家己轉去反省。若欲愛相救，大聲hoah救命。吾念佇汝信吾，吾會助汝。好無--louh？」
落難神接soa3提寫tioh8姓名e5金紙唸：「林國琳，26歲。」
林國琳起初猶聽無，文輝用華語譯講：「林國琳，落難神叫妳。」
林國琳來kau3落難神身kiN，文輝問：「落難神問妳要問什麼？」
「問婚姻。」
「人生在世，龍交龍鳳交鳳。佇汝猶未出世姻緣簿就將汝kap伊牽做伙
「1人1命，命運天定。行路免gia5樓梯。」
林國琳憨憨a2笑，伊媽媽陪佇邊--a講：「落難神要妳眼光別太高。就是這個啦。還不快謝謝落難神。」
「先免說謝，年底再請我食餅。別項無愛吾只愛燒酒kap甜餅。好無--louh？」
「謝謝。」林國琳pi3-su3答謝。
時kau3子時。信徒問事soah，隨人轉厝。酒仙酒也略a2退。酒仙thiN2目看文輝teh整理香案， 問：「落難神有來--ou，今a2日20幾？」文輝勸講：「飲酒要斟酌。汝chit世人會予酒害死--ou。」
文輝將香案khoan2好，準備去樓上歇睏e5時hion5-hiong5想tioh8 hit個醉kah m7知人e5生分人，開嘴問酒仙：「酒仙，hit個羅漢跤是汝e5酒伴？」
「有時月光；有時星光。今a2日tu2搬入來。」
文輝轉kau3房間提塗跤e5杉mih8 ui3浴室行去。Ui3浴室e5巷路文輝看見彩鳳e5房門無關。Lam5-sam2講：「M7知koh kap siaN5人siau2神a2去--louh，用身材換錢財。」
文輝thng3衫thng3褲，準備開燒水洗身e5時浴室門hiong5-hiong5搥聲連連。
「有人--lah，teh洗浴--lah。」文輝心想一定是彩鳳轉來--a。
門外搥聲緊逼逼，ka7文輝ui3時間e5洪流nih giu2轉來。氣kau3 te3--a衫褲無穿就ka7門開開。來--a，妳tng興頭我也m7驚汝，來--a。文輝ka7門開開，劉偉早tioh8袂kham chi2等將嘴nih e5暗sam2 mih8全吐出來。吐佇文輝e5身軀。今a2日食tioh8衰藥丸。
劉偉處理了胃袋a2 nih e5酒精，文輝te3後kheng5尾。劉偉轉kau3家己e5房nih，文輝sui5後行入。劉偉見文輝行入房nih準備ui3眠床頂起身，文輝知伊酒醉未醒：「The leh就好，the leh就好。」文輝坐佇窗前書桌a2：「兄弟，我叫做文輝，是酒仙e5桌頭。咱chia人來來去去，有唸a們e5也有無信鬼神e5。不過--ou，有拜有保佑。落難神袂害汝e5--lah
「我少年懵懂，kap人博流氓氣口。外頭風聲愛我e5命
「好佳哉落難神收留我，」文輝講起過往有淡薄見笑，笑kah有淡薄hu心：「對--lah，酒仙講汝叫做a偉--ou？」
劉偉略略a2起身chhu the佇床邊：「我叫劉偉，tu2退伍。」
「少年人怎樣會來落難天堂？」
「……」
「汝toa3入來落難神有予汝聖杯？落難神三更半夜食西瓜，反症
「汝先歇睏，歡迎汝toa3入來。」
文輝相辭了後劉偉對伊禮貌性tim3頭。文輝行出房門順soa3將房門關起來。落難天堂koh真複雜，有酒鬼，有兄弟，猶有－劉偉想tu2-a2文輝行過房門時無張持聽tioh8文輝嘴nih流出e5字句－落翅a2。彩鳳m7是佇保險公司服務。Chia e5人真正long2有家己e5故事。阮老e5一再束縛我e5人生，kam2講我ui3伊身上得tioh8腎水，就kan-taN7是伊人生nih e5 1粒棋粒。阮老e5 chi2-ma2肯定著急，tu2提tioh8退伍令e5後生佇人間消失。予伊生驚leh嘛好，這世人猶未為家己活過leh。尼采、但丁、波特萊爾chit寡藏佇冊櫃e5冊總算佇我e5書桌頂上探頭。
頭猶真疼。無siaN2-mih8比kiN3-chai7阮老e5鋪排khah頭疼--a，頭pai2飲酒飲kah hiah-ni爽快─若是老爸佇leh，1滴酒long2免肖想欲tam。馬逵斯e5《百年孤寂》佇我手面phut-phut-tio5。
就an2-ni，我tham落馬逵斯《百年孤寂》nih一直kau3天拍phu2光。酒仙走來kha3我e5門：「A偉，食糜--lah。」
劉偉洗手面了後行落樓跤：「酒仙，gau5早。」
「來咱落難天堂是暫時渡時機，時機一kau3厝鳥也欲飛上天
「無食飯欲怎樣飛上天？」
「謝謝。」
食早頓時，劉偉提起文輝e5 tai7-chi3。酒仙聽tioh8袂爽快，罵這個文輝hiah-ni che7年--a，嘴猶是chiah-ni不顛na7-kai3。無影無跡也講kah kap連續劇kang7樣。
「A偉，文輝kap彩鳳像兩片門板kap袂oa2。汝mai3管。
「落難神講這是累世業障，無冤無仇袂結成球。需要時間化解。」
講人人kau3，彩鳳ui3門口行入來。看見酒仙kap劉偉佇神桌前：「千交代萬交代，酒mai3飲hiah-che7。Lin2 2個ui3昨hng飲kau3 chi2-ma2。想欲見閻羅也免飲kau3這款田地。」
「彩鳳--a，汝看汝。暗光鳥
「阮long3食飽飲足，睏醒koh再食飽。汝才轉來
「事業愛拼，身體嘛愛顧。」
彩鳳tim3頭：「Ou。」
酒仙招呼彩鳳，坐佇劉偉邊a2椅條：「燒糜傷重菜，ke食寡。汝m7顧家己，嘛tioh8我。Eng暗落難神koh來唸經，我苦--louh。」
彩鳳提1碗，糜ngoeh8菜，對酒仙微微a2笑tiam7-tiam7食糜。
Hit-me5，天氣chiaN5 hip。劉偉ka7房門拍開，窗外e5空氣入來房nih行動。彩鳳早頓後睡kau3 tu2-a2才醒，行出門ui3便所去。回程看見劉偉書桌前滿是伊大學時代拜讀過e5世界名冊。伊kha3劉偉e5柴壁：「歹勢，kam2 thang 攪吵？」劉偉直覺ui3床頂tio5起來，手頂hit本《百年孤寂》重重摔佇塗跤。劉偉小可整理四週然後予彩鳳入來：「請入來。」
「汝也看chia-e5？」彩鳳khia7佇a偉書桌前，注神世界名冊。文輝嘴nih e5落翅a2也有文學素養e5一面。Chit個查某實在趣味。
「汝合意馬逵斯？」彩鳳看tioh8 th佇塗跤e5《百年孤寂》。
「是--a，人生na2戲，袂輸馬逵斯魔幻寫實e5筆。
「汝bat 真che7 neh。」
「我大學讀外文，這類e5經典是tek-khak愛讀e5。」
「沙佛克力斯e5《伊底帕斯王》？」彩鳳看這本冊好玄。提起這本冊：「這本我無讀過。」
這查某真正趣味，大學讀外文－kap我kang7樣來kau3落難天堂－佇保險業服務－文輝嘴nihe5落翅仔。這本冊是心理醫師介紹e5，主要是佇講伊底帕斯王愛戀母親─心理醫師講我可能也有這種病症，in講是伊底帕斯情節─之類e5故事。
「我老母生我e5時chun7坦橫生。對伊e5印象也只是phu2-phu2 e5相片
「大漢了後，我恨阮老e5。恨伊佔有阮母a2，予阮母a2有胎
「我忤逆。 Lu2忤逆阮老e5管lu2嚴。連讀冊選系long3 tioh8經過伊e5安排
「Chit個劉偉m7是我--a，真正e5我佇脫離母a2衣帶e5時就死--a。」
彩鳳有一種kang7是淪落佇chia e5憐憫，想欲將滿臉珠淚e5劉偉tai5入去伊e5胸槽。劉偉將家己e5面深藏佇家己雙掌，目屎卻是ui3指頭phang7漸漸流瀉。彩鳳行進前去，將伊e5臉tai5入家己胸槽：「大聲hau2，tu2 來 chia，我嘛是chiap8 kham3佇棉被nih hau2。Hau2過會較好過。」劉偉聽tioh8彩鳳e5安慰，也m7顧彩鳳只是tu2熟識e5室友，na2像是囡a2抱tioh8老母，把彩鳳e5杉long2浸tam5去。
酒仙佇樓跤房nih聽tioh8劉偉e5哭聲，趕緊1步做2步去樓頂看mai7。酒仙看劉偉e5面深深tai5佇彩鳳胸槽，生驚。趕緊行上前去。
彩鳳驚予人誤會，輕輕將劉偉sak開。劉偉e5目屎猶然控制袂tiau5 ，將家己e5目屎tai5入手面，kiN3-chai7伊ui3指頭a2 phang7流瀉。
「看戲愛知戲文內nih」酒仙khia7佇劉偉kap彩鳳中間，想欲阻檔siaN2-mih8：「佇chia每1個人long2有家己e5故事，願意kap阮分享汝e5故事無？」酒仙看tioh8胸kham2浸tam5 e5彩鳳，指tioh8伊，愛伊轉房換1領杉：「阮等汝。」
無久，彩鳳換1領素色格a2 siat-chu2，坐佇劉偉房nihe5書桌前。靜待劉偉e5故事。
劉偉手臉洗洗leh，坐佇 眠床kiN。目珠予目屎khau kah 略a2腫腫，劉偉poe2會起家己e5故事，心態堅強。
劉偉un5-un5-a2 gia5頭，望tui3窗外月娘。每1個人long2有無想欲koh回憶e5夢--a。我e5夢，是1場生命e5誤會。我kap伊e5情感只i5持短短10個月，佇我全無意識e5時chun7。佇伊cham7-gam7照顧之下成長。我會eng7予伊siaN2-mih8？每pai2夢nih e5幼嬰--a ui3血潭中hong7抱--出來，伊teh hau2 e5面猶染tioh8血。我想，伊來kau3人世間是1場誤會。夢境是佇護士欲ka斷衣帶e5時結束。我會佇護士gia5起剪刀，準備剪斷衣帶 e5時醒來。
「《依底帕斯王》？」彩鳳看桌頂hit本沙佛克力斯寫e5劇本。
劉偉看向彩鳳，苦瓜面e5笑容。我恨伊侵佔阮a母，恨我家己奪走阮a母e5生命。媽媽e5一生予伊生命中e5 2個cha-pou毀去，我恨阮老的kap我家己。
酒仙講：「Lin2 a母若知汝an2-ni，會艱苦--a。」酒仙講完，孤1個行出門外。情緒行入長長巷路e5 kau3角。
聰吉m7知好無？Chit 10年來我無消無息佇人間失水，伊kam2會著急？猶怨恨我？恨我thai5死伊e5 a母。無冤無家不成夫妻。Kap我牽手，是伊上世人kha3破阮祖公e5 hong7-kim-ang2-a2。相欠債。伊債務還清--a，上天做仙。我leh，猶有1堆世事等待我操煩。聰吉，汝kam2知？活e5有時是比死e5 koh較痛苦--a。
彩鳳khia7佇房門前看tioh8略a2 khiau-ku e5老人siok寞消失巷路e5 kau3角。彩鳳oat8身看向劉偉。劉偉也注神tioh8彩鳳。兩人無話。
天tu2光，罩霧。窗外景色包佇霧nih。KoaN芒垂tioh8露水，aN2 kah ke7-ke7-ke7。雞啼聲佇濕氣nih更加深沈。文輝目珠sa-bui，hoa7 tioh8重hoaiN2-hoaiN2 e5 跤步欲下樓跤。行過彩鳳房間看見房門無關：「這隻野馬。」
厚霧漸漸散去，五月芒phoaN5 tioh8露水更加展現青春。劉偉1夜無睏。天色ui3 phu2色轉成做光明，劉偉心nih有1個hiau5疑。Chit個查某，是1個siaN2-mih8樣e5女子？文輝hiah-ni粗言對待。劉偉soa3手佇床頭櫃提起1本米奇˙艾爾邦寫e5《佇天堂遇tioh8 e5五個人》lam5-sam2 peng2。
Kiam2-chhai2是peng2冊e5聲音siuN 大，彩鳳翻身，醒來。我na2會佇chia？Chia是？書桌前e5 Cha-pou人？彩鳳想kui pou。
「失禮，我佇chia睏去--a。」彩鳳輕聲講。
劉偉予冊nihhit個修理遊樂器材e5老人艾迪所引chhoa7。有因就有果--a。我會eng7活leh，是流tioh8媽媽e5血換來e5。來chia，kiam2-chhai2也是因，也是果。
彩鳳暗想劉偉kam2沒聽見伊e5話：「汝生氣？」
劉偉聽tioh8彩鳳e5話，ui3米奇˙艾爾邦e5世界抽身，轉來現時：「醒--louh。」劉偉接落講：「汝cha-me5佇chia peng2《依底帕斯王》。peng2 kah睏去。」劉偉指tioh8 ka落塗跤e5《依底帕斯王》。
「Lap-sap去--a。」
「Na2有要緊。」劉偉kap彩鳳同時khut身去khioh《依底帕斯王》。2個人e5頭互相khap。2個人各人hu撞疼e5頭，na2 hu na2 笑。
文輝出門e5時錢袋a2無chah。轉天堂二樓。聽見彩鳳kap劉偉e5笑聲：好--a。落難神特別為我量吋量尺專kang定做e5「文輝條款」，竟然予汝chit個初初來chia e5路旁屍破壞。
「酒仙，」文輝氣kah心頭phiN5-pheN5喘：「咱落難天堂真正欲落難--a。汝還kiu佇棉被內睏大豬。」
酒仙頭面袂赴洗，緊ui3房nih闖出來：「汝也予我kou-chiaN5--leh。cha-me5落難神唸經唸kau3天亮，chi2-ma2 tng好眠，汝soah……」
「害-a--lah，落難神生氣--a。
「『文輝條款』hong7破壞--a。」
酒仙驚覺tai7-chi3大條：「文輝，飯會使亂食，話袂使亂講。」
「劉偉kap彩鳳做產氣e5聲ui3房間內傳kau3房間外。」
樓跤廳堂吵雜聲音ka7劉偉kap彩鳳引choa7落樓。文輝直指tioh8 in：「就是這對狗男女。」
劉偉sa無鬃頭，看tioh8酒仙。酒仙講：「彩鳳，汝佇chia 3年，我kap落難神long2無虧待汝。汝講，汝有對不起咱落難天堂無？」
「且慢。這kap彩鳳有siaN2-mih8關係？」劉偉問酒仙。
「設使伊無siaN5汝，汝會kap伊佇眠床頂peng2來peng2去--ou。」
文輝chit款話對1個查某人來講實在傷重。彩鳳m7甘願受污辱，chhun7-pan7尋文輝輸贏。予酒仙阻擋。
「彩鳳，kam2 thang ka7 我講這是怎樣？」
彩鳳氣kah坐佇椅條頂，su3 kui2 na7口氣。氣順，慢慢講：「3年前，離開hit個傷心e5所在…」劉偉插話：「傷心？」彩鳳慢慢講起伊e5故事...
「正月病子佇心內，若欲講出驚人知，看tioh8物件逐項愛，偷偷叫哥買入來」懷胎10月無簡單--a。尤其是彩鳳。
「咱tau世代單傳，我chit個老e5就向望汝予我1個弄孫e5機會，」瑞隆e5媽媽指tioh8彩鳳：「汝chi2-ma2 soah ka7我講：『a母，醫生診斷彩鳳袂生。』！一隻無卵雞有siaN2-mih8路用？」
瑞隆本性有孝，m7敢違背老母，畢竟10月娘胎無簡單--a。「A母，也愛神也要人lah，」吞一嘴瀾：「我嘛是汝栽花換斗換來e5。」
Tng teh 風火頭e5老母khoeh目順氣講：「世事kam2 long2無藥醫？死馬當作活馬騎，總有一日kau3京城。」
「Ah」老母驚喜1聲，「後月日，lin3姑婆e5後生娶新婦，咱來討1粒子孫袋a2內e5紅卵。」瑞隆kap彩鳳看老母歡喜e5眼神，心肝放leng7。至少，彩鳳會eng7過一陣a2好日。
因為期待su2人chah tioh8無確定e5憂愁。三月過去，彩鳳e5生產工廠無聲無息。老母尋遍四界e5土方，彩鳳e5生子袋a2就是無消息。著急e5老母也無法忍受彩鳳這隻無卵雞：「早知an2-ni，就予瑞隆先上車chiah來補票。為tioh8門風，如今換來一隻無卵e5。」氣chhoah e5老母尋尪姨tau3幫贊：「尪姨--a，拜託汝ka7阮tau彩鳳看mai7伊hit盆花叢kam2猶健在？」
尪姨向宮nihe5神像膜拜了後坐佇插滿鋼釘e5棍a2頂，目珠khoeh，不時白au3。辦事e5桌頭提tioh8香煙予尪姨鼻。檀香e5氣味ka7尪姨e5原神驚走。
「老同侍，汝來我chia欲求孫，」尪姨手指蓮花舉案齊眉：「馬無夜草袂肥注，銀角無雙袂tan5。」「汝e5新婦叫做siaN2-mih8？」停一睏chiah講：「彩鳳是無。」「彩鳳彩鳳，無采是鳳，
「老同侍，世間有時終需有，命中無時莫強求。」尪姨牽tioh8老母e5手：「聽吾e5嘴，吾袂虧待汝，好無？」
「尪姨，汝好心做kau3底，阮彩鳳kam2真正袂生？」
「花叢有蕊就有人；生男生女看白紅。
「汝tau彩鳳e5花叢虻蟲害siuN傷重，蜘蛛絲iN纏。花叢long2乾lian。花蕊，恐驚是無機會--a。」
「尪姨，阮tau世代孤生。kam2無法相救？」
「神仙難救無命客，就算汝蟲抓厝拆，憨牛重拖犁也是無采工。
「人生在世1甲子，食好食壞免掛意，兒孫自有兒孫福，強求kau3老1陣風。
「百年了後，汝吾long2是雙手空空，chah tioh8 1堆煩惱走。何苦來哉？
「吾先行離開凡塵，tng2天做仙。世事一切隨緣。吾去了。」
行出宮外e5老母，原神soah留佇宮nih。看起來伊chit 世人是無望抱孫--a。
「伊e5無望予我成真e5夢想破滅。所以我來chia。」彩鳳目屎藏袂tiau5。Hit暗，落難神予我3個聖杯。伊講：這是前世今生e5因果，免怨。第1夜，伊an2-ni對我講。我khioh是災厄已經過。誰人知，chit個m7知見笑e5文輝想欲侵犯我e5身體。
「酒仙，這是真e5？」
酒仙tim3頭，gin5文輝：「落難神驚chit款tai7-chi3 koh發生，特別定規矩，咱落難天堂，袂使有男女之間的tai7-chi3發生。」
「落翅仔假在室。人才初來kau3，汝就按耐袂tiau5。」文輝驚見笑seh8走話題－免辯解。孤男寡女睏同房。－啥，lin2破壞規矩，竟然講我無知見笑？－好--a，我看汝怎麼博杯？
「文輝--a，抓賊在贓，捉姦在床
「汝也袂chio2歲--a，chiah-ni簡單e5道理汝kam2會無瞭解？
「汝看，3個聖杯。汝猶有siaN2-mih8話講。」
文輝頭ke7-ke7：不可能。我明明聽tioh8？
「Cha-me5落難神唸經kau3天光。
「穩當是落難神唸經e5時發生e5。落難神chiah-ni專心，na2猶記得塵世間chit寡。」
「汝這個sut-a2，mai3 ka7罪過牽拖tui3落難神身上。
「Kam2講汝愛我佇落難神面前斬雞頭？」
酒仙無nu2-chun2天堂nih吵ke7鬧ke7：「雞頭若斬--落m7就艱苦kau3hit群雞thun5-a2。
「文輝--a。汝kam2會信落難神袂得過？」
文輝見笑無面，準備soan出門。
這時，細路e5 hit-peng5有2個人ui3 chia行來。酒仙見tioh8 ine5 kheng-khakna2來na2明：「里長伯，早--ou。」行佇里長伯身邊e5是鄭議員。里長伯紹介了後，酒仙請in入天堂大廳：「文輝--a，緊去泡茶。
「人講無事不登三寶殿，」里長伯接soa3講：「汝落難天堂算是國有財產。
「議會有通過客雅溪賓葬管理所開發案。議會想欲收回chit塊地。」
酒仙聽tioh8里長伯e5話。暗想：人生設使失去家庭，猶有siaN2-mih8值得留戀e5？客雅溪原本是我生命e5終站，我佇溪邊大石頂，飲落幾若矸酒。酒醉心頭定。我拍算ka7家己葬佇溪水nih。我e5意識會toe3 tioh8溪水慢慢a2 hoa去。但是意識 soah lu2來lu2清明。溪水nih所見tioh8 e5草木、聽得e5蟬聲鳥叫竟然hiah-ni 使人醉心。溪水nihthai3會有春風輕吹e5樂暢。一直kau3我跳出水面，1尊神像toe3佇我身邊－這是緣？是祂予我an2-ni e5畫面－我phong2 tioh8祂，冥冥之中祂chhoa7我來kau3 chia，落難天堂e5前身。一座hong7袂記tit8 e5厝。
「里長伯，Chit間厝kam2 m7 是老里長a順伯e5？
「怎會變做是國有土地？」
「汝當年怎樣kap阮a爸講我無清楚
「人在情在。我a爸e5骨頭long2 kiong5欲thang拍鼓--a
「koh再講汝落難天堂雖bong2 m7是啥大廟，m7-ku2信徒也是che7-che7
「這幾年來，阮陳家卻無收kau3半sian2厝稅錢。
「食果子拜樹頭e5道理汝kam2愛我poe2會汝知。」
「里長伯，看戲愛看戲文內意，做人愛bat人情義理。若m7是落難神替汝背書，汝連鄰長屎to 無thang食，koh里長--leh。」
「乞丐講仙話，若無阮a爸當年收留lin2這對落難乞丐。Lin2食風飲雨--louh。」
「汝是teh乞丐趕廟公？」文輝ka7茶提出來廳，聽見里長伯對落難神無理，氣chhoah-chhoah。
「Siang5是乞丐猶m7知--leh！」
一直枯坐一邊e5鄭議員見tioh8這3人各人講各人話。起身：「3位先免爭kah紅光面赤。」
「其實，這塊地原本是屬於里長伯e5
「不過咱落難神佇這也10年
「An2-ni--lah，酒仙汝ka7這10年來e5厝稅繳hou7里長伯。逐家無相欠，總是比較較無話講。」
「a順伯當初講只要落難神保佑這所在平安順利，伊這間破厝a2猶得請落難神委屈。根本沒講tioh8厝稅e5 tai7-chi3--a。」
這時文輝佇酒仙耳孔邊輕聲講：「汝看，落難神the教示咱--a。有人敗壞規矩。」
「汝tiam7 khi3。」酒仙對tioh8里長：「稅厝也得愛有契約。我kap a順伯無簽約，嘛沒講tioh8租金e5 tai7-chi3。」
「這是汝講e5，若an2-ni就mai3怪我欲趕汝這個廟公。
「議長，法律汝較利。我kam2 thang告in侵佔土地，抑是私闖民宅？」
議長聽tioh8里長伯an2-ni講，趕緊so圓仔湯：「Na2 tioh8博chiah硬？
「酒仙，chi2-ma2嘛只有補繳租金chit個辦法。議會hit邊我來so soa3
「憑我佇議會e5崁站，我一定予落難神1個交代。但是，汝也mai3予我難做，擋人財路
「里長伯chit邊猶愛得酒仙汝加出心力。」
「愛我付租總tioh8講看joa7-che7。」
「1月2萬，10年算lin2 200萬就好。」
酒仙聽tioh8里長伯開出chit個價數，當場nga7佇椅條頂。彩鳳、劉偉趕緊進前去ka7 插leh。
鄭議員kap里長伯話講soah sui5起身準備離開。里長伯講：「我予汝1禮拜e5寬限。1禮拜無看tioh8錢，就歹勢--a。」說soah 2人ui3大門行去。里長伯頭oa2近鄭議長e5耳孔細聲講：「猶是議員較khiau2，這塊地就準是賣予汝--a。」
2人tng樂暢。Hiong5-hiong5，苦樂追里長伯kap鄭議員。原本得意e5 2人予苦樂驚kah ma2-ma2-kaiN。闖ui3細路hit-peng5，闖kah裂褲跤。一直kau3苦樂無koh jiok8。2人喘pheN5-pheN5：「這隻狗真正棺材內唱曲，m7知死。」里長伯咒懺幾句，sui5後對tioh8鄭議員：「議員--a，歹勢。害汝...」議員顛倒是pat見過大風大湧：「咱是做大事業e5人，kau3時賓葬管理所開發案若成
「咱還有siaN2-mih8怨氣無te3發？」
「時kau3 chiah麻煩議員牽成。」面頂全是貪婪e5笑容。心想：阮a爸留hit塊畸零地hiah-ni價值。珍珠予我當做老鼠屎。
「咱ka7落難天堂拆掉起塔。死人kap神tin7-toe3-chian3？」里長伯心內ui3-hiaN2。
「放心。時kau3雞抓厝拆，落難鬼伊to無thang做！」
Hit暗，天堂nih有辦事。信眾聽見天堂再度落難e5消息，憤慨連連。眾人e5結論是議員勾結里長伯。落難神起駕了後無話一直kau3退駕。桌頭文輝家己主意，對眾信徒講：「我看這pai2落難神也沒chai5-tiau7。」
天頂明月漸hoa。信眾中間有人無意發現tioh8 kong2：「天狗吞月。」信眾中有1個較有年歲e5 講：「破鼓救月！」傳說天狗吞月時只要拍鼓，用鼓聲驚趕天狗。
「這是落難神予咱指示。就算是大官虎。草仔枝，也會kiN5倒--人。」
隔日，落難天堂大門kap四箍lih8-a2掛滿白色布條。這是劉偉e5想法。希望藉tioh8社會輿論kap信眾e5不滿予里長伯壓力。
酒仙坐佇天堂大門口。此時警方gia5起牌a2，頂面寫tioh8：違法集會 儘速解散e5字樣。
信眾中，有1、2個開始拆白布條。其中1人咒懺講：「屎學a2板，na2會tii8做神主牌。」
「夭壽--ou。落難神有靈有聖，記得這個路旁屍--ou。」信眾之中有人大聲罵。原本予信眾圍tioh8 e5酒仙hiong5-hiong5吐水。落難神起駕：「陳a華，吾待汝不薄。想不kau3汝過橋拆橋板。今a2日也趕來吾落難天堂放肆。」
「無錢予查某無話講；無酒予神明無靈聖
「酒仙，hou5-sin5穿鬃sui，假鬼假怪。」
「吾愛汝改過自新。汝soah na2來na2超過。」
「眾信徒，mai3koh聽這個騙仙a2乞丐講仙話。Lin2 e5寄付long2變成伊e5酒錢，」撞場e5另1個人開嘴：「有靈有聖，卻是住破厝。這個騙仙a2，騙咱e5錢換酒。」
信眾不服，問講：「落難神有靈有聖。設使是騙仙a2，na2會hiah-ni靈聖？」
陳a華接嘴：「飼細漢e5。騙仙a2飼m7成鬼a2。」
「免講hiah-ni che7。拆廟。」
陳a華khia7佇1邊心想：君子報仇。Hit日ka7我洗臉e5老鼠冤。得罪土地公，飼無雞。敢得罪阮老大鄭議員。
兩兵相戰，隨時爆發。信眾有e5予陳a華煽動，準備動手拆落難天堂。部份e5信眾受過落難神e5恩惠，一直替落難神感覺委屈。兩軍khiu2l ak8警方也hong7牽涉其中。落難天堂e5木匾予陳a華用棍a2掃落來直接拍佇劉偉身上。劉偉當場昏迷。
劉偉醒來時，嘴nih一直暗唸tioh8落難神。酒仙問：「較好無？」劉偉看tioh8房nihe5酒仙，彩鳳kap文輝。目眶紅：「落難神走--a。」
「落難神siuN氣--a。落翅a2假佇室。」
彩鳳聽tioh8文輝an2-ni罵伊，1陣怨氣ui3心中竄出。Khiu2 tioh8身上e5 siat-chu3。Siat-chu3e5鈕a2予伊piN開。彩鳳頂半身半theh-theh ，siat-chu3無lan2無禮垂掛佇肩頰。彩鳳氣phut8-phut8：「來--a。汝m7是想真久--a。落難神走--a，來--a。」文輝ui3-hiaN2 kah匿佇酒仙身後。
劉偉見彩鳳頂身只穿tioh8內衫掛tioh8siat-chu3，想欲起身提外套予彩鳳遮體。無奈頭猶原痛kah sih-soah叫。劉偉手thuh佇眠床，chhun7-pan7 欲起身。酒仙見款緊叫劉偉the leh歇睏，家己ka7家己身上e5薄衫thng3予彩鳳：「熱--人露水重，m7-thang受風寒。」酒仙將衫交予彩鳳了後，大聲罵文輝：「文輝，愛汝做桌頭，是愛汝修道
「汝道理pat無che7，嘴soah真厲害。汝hiah-ni gau5，乩身chit個缺換汝做。」
「汝還teh替in出頭。菜頭拔起孔原在。若無汝講，落難天堂na2會落難？落難神na2會走去？咱落難天堂就欲鳥抓厝拆，雞仔抓kau3無半隻--a。」
「話是風，字是蹤。汝無證無據就無資格an2-ni講。」
「項羽有千金力，不值劉邦e5四兩命--lah。」文輝氣chhoah-chhoah離去。嘴含tioh8別人e5性命是鑲金koh包銀，音符joa7諷刺leh。
「a彩鳳，行--lah。予a偉好好a2歇睏。」酒仙khiu2 tioh8彩鳳離開劉偉e5房間。彩鳳e5眼神卻一直掛心tioh8劉偉。劉偉也看tioh8彩鳳，na2像彩鳳才eng7予伊力量。
隔日，劉偉是佇jiong2鬧中醒來。頭猶原微微a2疼。劉偉thiN2開目珠，眼前khia7 e5是伊上無想欲見e5人。Pa-pa怎會尋來？高雄離chia hiah-ni遠？「Pa...」劉偉思量，一再暗想。眼前這個頭髮白蒼蒼e5老人是家己e5老爸？「Pa-pa。」
「退伍m7轉厝」劉父看tioh8書桌上劉偉排e5小說：「Kui日kap這寡沒路用e5書做堆。汝chhun7-pan7 ka7我氣m7？」
劉偉起身。行kau3書桌前，無半分鐘，劉偉出手將家己心愛e5小說掃ia7塗跤：「An2-ni汝安心--a，歡喜--a，」劉偉行oa2老爸，手抓tioh8老爸e5衫a2頭：「汝e5劉偉koh轉來汝身邊--a。」
「A偉，是好是歹都long2是老父。袂sai2 an2-ni chih，」酒仙，一直勸tioh8劉偉。但，劉偉聽袂入耳：「A偉，我teh kap汝講話。汝有聽tioh8無？」
「我e5劉偉？」劉老父將劉偉e5手sak8開，問。
「我e5靈魂早tioh8 kap媽媽同齊死--a。汝飼e5只是我e5身殼。」
「Lin2老父猶佇leh。講這款話大不孝。Ka7 lin2 a爸he7失禮。」酒仙na2講na2大聲。劉偉仍然無聽tioh8。
「Lin2父是toh位做m7 tioh8？Lak8屎lak8尿，飼汝大漢。望汝出頭。
kam2 tioh8我ka7汝跪？」
「汝long2 tioh8。是我m7 tioh8。我不應該選擇這個人世。我m7 pat chia e5規則。Chong2-si7我會eng選擇離開。」
「汝e5人生才欲開始。汝mai3亂來。」酒仙急。因為劉偉將咖啡杯tim3 ui3 壁去。撿碎phiN3欲ui3手節割落。
「予伊流乾。流乾了後我就是我--a。」
劉父看見家己e5後生想欲佇家己面前自殺，心頭一驚。趕緊將劉偉手nihe5杯a2碎phiN3搶來。搶e5過程中予碎片lio5 tioh8，血直流。劉父sou腰，手teh tioh8孔嘴：「老父是愛汝，an2-ni汝kam2 m7好？」
「袂sai2做我家己，我活tioh8 kam2有意義？我m7是汝e5棋粒，我欲為家己活。」
彩鳳聽聞劉偉房nih吵鬧聲，上樓。劉偉房門鎖緊，「A偉，開門--a。」
酒仙趕緊出來kap彩鳳講：「In兩父a2子吵kah袂收山，我講siaN2-mih8 a偉long2無ka7我神經。連看to long2看袂落去。」
「緊開門。」彩鳳喊幾若聲，門開--a。是劉父。
「Mai3 koh使性地。酒仙死--a。」劉偉聽見，心涼1半。昨me5猶好好e5人。
酒仙khia7佇門外聽見家己死--a？我好好khia7佇這--a。Oeh！Lin2無看見我？
樓梯khah-khah響，2個護士起來。酒仙舉手招呼護士，soah看見護士thang2過家己e5身體行入a偉e5房nih。
「老先生，我先替汝糊孔嘴。」
劉父na2接受護士e5包紮，na2對tioh8 hau2 kah不成調e5劉偉講：「我是看新聞才知汝佇chia。Cha-hng lin2佇chia抗爭，汝hong7 hip tioh8
「今a2日廟公不幸死亡，電視台long2來報導。Che是天意
「Mai3予廟公死了無價值。Kap我來轉。我e5大位等汝坐。」
天意？我死是天意？我佇這--a。
「Ah！」劉偉喊1聲，ui3樓跤闖去。酒仙驚劉偉koh1-pai2想袂開，趕緊toe3去：「A偉，等leh--lah。」
劉偉來kau3酒仙房間。只看見酒仙床頂一只白布掛佇酒仙身上。劉偉行上前，輕輕將白布掀開：「Ah！」劉偉看tioh8冰冷e5酒仙，目眶眶袂tiau5目屎。酒仙khia7佇門外，看tioh8家己e5屍體。Cha夜，我自二樓a偉房間落來。我看tioh8落難神對我笑－我這世人猶無看過伊笑neh－伊提tioh8酒，行向我。阮兩個飲kau3天光，伊ka7我講：「辛苦--a。」－落難神真憨，眾人e5世事我na2有本事理－落難神，辛苦e5是汝。
酒仙想。外頭行來了1個na2熟悉koh生份e5影。伊e5後生聰吉來--a。警察kap聰吉講幾句話sui5後愛聰吉kau3房nih認屍。
聰吉入kau3房nih，警察hian開白布。聰吉斟酌真久：「Pa-pa。」
「汝chit個雷公a2點心，lin2老爸long2死--a。汝連目屎long2 m7肯流
「酒仙死目m7願khoeh，就是teh等親人來
chi2-ma2來--a，soah予伊傷心。」
文輝心nih思量cha-me5若無kap酒仙冤家，kiam2-chhai2酒仙袂借酒解愁。
「我e5目屎佇阮媽媽死e5就流了--a。」
聽tioh8親生後生e5話，床頂e5酒仙am-kham3袂tiau5家己e5悲傷。血自七孔流出。文輝見樣：「人講，死者見kau3家己e5親人會七孔流血。汝a爸是用血代替眼淚，ka7汝會不是。汝chit個不孝子。」
酒仙khia7佇門口，聽文輝an2-ni講。文輝，Toe3我這hiah-ni che7年。猶是汝較瞭解我。我teh想siaN2-mih8汝long2知道。
法醫確認酒仙e5死因是心肌梗塞後，聰吉領tioh8酒仙e5遺體坐救護車，準備轉厝。
救護車慢慢a2駛，一直kau3細路上遠hit tah，車停--a。救護車慢慢倒駛。鄭議員e5助理長伸手表示愛救護車繼續退，退kau3正邊e5分道。
「人long2死--a，猶愛擋咱e5路。」里長伯坐佇議長身邊，嘴nih kauh8。
「人死為大。讓路。咱做人愛有腹腸。」
救護車退kau3正邊e5分道了後，議員助理坐轉副駕駛座：「大石已經soa2走。安心『上路』。」話猶未講完，碰e5 1聲。鄭議員e5黑頭車phiang3 lin--a。鄭議員行落車，司機對伊講：「頭家，鑿tioh8鯊魚劍。」
「議員--a，荒山野外，thai3有鯊魚劍？是酒仙抑是落難神teh警告？」
議員m7願相信鬼神。只佇心nih暗kiau7： To long2死--a koh 想欲kap我鬥。鄭議員、里長伯kap議員助理3人行路ui3落難天堂去。
3人行入落難天堂：「文輝，lin2師傅也算是好命
「在生飲kau3往生。無煩無腦，上天做仙。」里長伯講。
「免六月芥菜，假有心。」
「好--lah，明人m7講暗話。天堂無大將，汝文輝做先鋒。阮頭家只是來提醒汝。Mai3予阮頭家歹做人。」
「牛知死，不知行。好膽來--a。我chit條命kap汝配。」文輝提tioh8點油燈e5油倒佇天堂大廳toh peng5金紙堆，火將金紙點toh8。
火勢na2來na2猛。劉父kah闖出落難天堂。放火e5文輝也予家己e5莽撞驚ka軟跤跪佇天堂門口。劉父闖出來了後，一直hoah：「A偉，緊出來。」火lu2來lu2大。A偉kap彩鳳佇酒仙房nih。A偉看tioh8彩鳳，彩鳳看tioh8 a偉。A偉說：「Kap我行。」彩鳳tim3頭：「來我e5房間。屬於咱e5房間。」彩鳳kap劉偉ui3酒仙房nih行出來，手緊緊牽tiau5。無顧門外e5 hoah 聲。劉偉牽tioh8彩鳳，捧tioh8ui3正廳請落來e5落難神，無顧chih火大，ui3 hiong5火衝去。衝入in e5世界，屬於in 2人e5世界。
彩鳳房nih，劉偉kap彩鳳相lam2。彩鳳甜蜜問劉偉：「陪我跳舞？」劉偉tim3頭。
「劉偉，汝chit個不孝子。緊ka7我落來。」劉父tioh急，放聲大hau2。
「咱會sai2...」劉偉話kau3嘴邊。2個人同時看落難神。落難神深深1叩首了後，起身坐tioh8。彩鳳接tioh8應：「落難神long2笑--a，猶有siaN2-mih8袂sai2 e5。」
Me2火來了chhong狂，燒lah。消防車予鄭議員e5破輪「免露」chah--leh。火就一直燒，酒仙畫e5匾：落難天堂就an2-ni予火食掉。只留tioh8趕來看戲e5人佇人世間悲嘆。
文章定位：
人氣(848) | 回應(0)| 推薦 (
0)| 收藏 (
0)|
轉寄
全站分類:
不分類
