昨晚與友人相聚,笑談至凌晨三時才歸家!
當到家門下,忽發奇想,想食隻咸肉糉!
我見凌晨難得返家,想起家鄰有間廿四小時營業的點心檔,早排端午,此檔門前掛滿大小不同的七色糉,更大寫標語,打正旗號話出售既係”秘制咸肉糉”!咁我見佢”賣廣告賣到咁勁”,便打算於六月中,回食呢隻”秘制五月糉”...
怎料,當我到達舖頭,向事頭婆要一隻糉之制,佢卻答:
”下?咸肉糉?我地售售售...沽清啦喎...”
”沽清?”
”係呀,我地端午至賣糉既!而家冇賣架啦?”
”下?你地早排d秘制咸肉糉講到咁鬼出色,乜賣得幾日架咋?”
當事頭婆見我不滿該舖冇糉賣之制,便立即向我推銷該舖既另一樣既"瑰寶":糯米雞!
”冇糉食唔緊要丫,我地有糯米雞!好靚架,又大隻過d糉,都一樣收你十蚊隻啫!”
”er..."
”好靚架!我地啱啱蒸起之嘛!又大隻!”
當事頭婆努力遊說我”以食糯米雞取代食糉”時,我看著蒸籠中,一隻隻用荷葉包到實,同咸肉糉外貌類同既糯米雞,最後都講左句:
”咁俾隻糯米雞丫事頭婆,堂食喎唔該!”
當我坐入內堂,拿起筷子,打開糯米雞,食左一口後,我感覺有d唔對勁..
我明明話想食糉,凌晨三點特登走到街上搵糉食,但點解最後,我食緊既竟然係”糯米雞”既呢?
心諗:做咩呀我而家?打算食"糯米雞",可以代替食"糉"呀?
抑或我頭先以為"糉"同"糯米雞"好似,所以食邊樣,其實都"一樣"?
最重要既係,我根本唔肚餓,我原本食糉既目的好單純,真係因為我有強烈想食糉既慾望,所以去食,但點解最後,我會俾人遊說到去食糯米雞既呢?
我突然反問自己:小芷,你究竟知唔知自己要乜?
當我食到第二口,我開始對自己既行為作出反思...
人生中,我究竟做左幾多次決擇,係好似呢件事咁,明明己經好清楚知道自要乜,但由於事頭婆遊一遊說,就以為"糯米雞"同"糉"可以互相代替,一時之下,竟把有限既胃部空間,食左一d根本冇打算食既”糯米雞"!!!
如果人生既時間有限,就好似我地個胃既容量咁!
如果人生本來係追尋一d我地最想得到既野,就好似我要上街搵糉食!
但最後尾只因為一個無關痛癢既阻礙,就好似事頭話佢冇咸肉糉賣!
最後,當經過一輪遊說之後...
我竟然會”妥協”!
最後我竟然在"妥協"之下,入左舖頭,食左一隻我人生中,根本冇打算要食既:糯米雞!
一刻間,我諗,呢類人生中咁無聊既妥協,究竟我做左幾多次???
人生既路途正多如賣糉既舖頭,如果我真係想食糉,理應去搵個第二間有糉賣既舖頭,而並唔係入去食左隻”糯米雞”佢!
因為只要我一食左隻”糯米雞”,我既胃己經唔會再有空間去食其他既野....而最後得出既結果,就係我地既人生中,從未食到我本來想食既野:咸肉糉!
最後,我們會”後悔”?把"糯米雞”吃餘一半,然後再去尋找賣糉的舖頭?
抑或,反正食左隻糯米雞,唔食埋佢好浪費,所以零願放棄本來食糉既慾望?
還是好阿Q地,用"精神勝利法"去告訴自己:”其實食糯米雞都冇乜唔好丫,味道唔太差0者?!”等等...
我想,我們的人生就真的就如這樣...
最後能堅持,不作無謂妥協,而成功在凌晨三時,找到賣糉的舖頭,吃下原本已有強烈慾望而很清楚自己己想食乜既顧客,本來就不多...
想吃的是糭,還是糯米雞?
文章定位: