SCRAWL 可愛真“迷客” （愛心動物醫院）

88愛的鼓勵 0訂閱站台

上次講過Stephen Sondheim同James Lapine合作既《Sunday in the Park with George》，今次講吓佢哋另一部作品，就係繼《Sunday in the Park with George》後既《Into the Woods》（1987)。《Sunday in the Park with George》係我買既第一張Sondheim CD，已經俾我一種大師既感覺；第二張就係《Into the Woods》，係一部娛樂性豐富，又充滿諷刺性既作品。好好彩，我都租到DVD睇，先可以寫呢篇嘢。關於Sondheim寫曲詞特色，上回已經略略提過，今回可以唔提。

1987年既Musical，除咗《Into the Woods》，要數既就係大家非常熟悉，Andrew Lloyd Webber既《The Phantom of the Opera》。1988年Tony Awards就係由呢兩部作品瓜分當中四個大奬。要仔細比較兩位大師就免喇；但兩人最大分別在於Lloyd Webber非常擅於音樂變化及劇場效果（大家可以回想下《The Phantom of the Opera》令人難忘既場景；Musical始終係愛嚟睇嘛！），而Sondheim則重於故事主旨及結構，曲詞運用。亦因為呢啲差異，Sondheim喺奬項上贏Lloyd Webber，而後者則係票房常勝將軍。其實，如果只係聽CD，又鍾意咬文嚼字，聽Sondheim係比較過癮。

《Into the Woods》係一部成人童話，第一幕講述角色們為咗願望，不惜一切令願望成為事實，第二幕則講述無常慾望所帶來既災難。故事由幾個大家都聽過既童話故事組成：灰姑娘、小紅帽、Rapunzel（即係被女巫由細到大困喺高塔上，要放頭髮落去俾人爬上去嗰個女仔）以及Jack（得魔術豆到雲層上巨人屋企既故事），重有無子女既麵包店師傅夫婦（只有呢對角色係原創）。「從前……（Once upon a time...）」「喺一個好遠既國家度（in a far-off kingdom）」係所有童話故事既開場白；森林亦係童話故事裏經常要角色們通過，去達成目標既地方；「從此以後（Ever after）」係所有故事既尾句；更有童話Feel既係，呢個故事亦有一個說書人（非常可愛既伯伯，哈～～）。因為非常鍾意呢部劇，所以會講得比較仔細，希望大家唔會覺太長啦。

第一幕，每個角色都有各自既煩惱，佢哋都有一個比世上其他一切都想實現既願望（“I wish... more than anything... more than life...”）：灰姑娘想去王宮既舞會；Jack希望家中既牛Milky-White可以出牛奶，咁佢就唔駛賣咗佢；麵包師傅夫婦則想要有細路。後母、兩個stepsisters刻意留難，酗酒既父親（哈哈，好抵死既安排！）又乜都唔理，搞到灰姑娘去唔成舞會，走到生母墓前喊；Jack既媽媽覺得個仔蠢到冇得救，要佢穿過森林到市場賣咗Milky-White；小紅帽到麵包店買麵包俾住喺森林裏面既婆婆（重一路偷食，最後搶埋人哋啲麵包！）；麵包店隔離屋既女巫（由Bernadette Peters飾演）闖店，要佢哋幫佢揾巫藥材料。因為麵包師傅細細個時，佢媽媽懷孕期間想食青菜（“she wanted more than anything in the world was greens, greens and nothing but greens.....”），於是爸爸到女巫度偷菜（直情係搶至啱），女巫話要攞咗將會出世既BB（即係Rapunzel）做交換，但當時唔知道佢種既魔術豆亦被偷。為咗報復，喺攞BB嗰日亦喺係呢家人身上下咒，要佢哋絶子絶孫。只要麵包師傅可以喺三日內幫女巫揾到四樣材料（牛奶一樣白既牛，血咁紅既斗篷，粟米咁金黃既頭髮，以及黃金一樣純既高跟鞋），就可以解除咒語。

森林裏面，灰姑娘得到魔法幫助終於可以去舞會；Jack帶住Milky-White去市集中途遇上神秘人，話佢隻瘦牛可能只能換豆；小紅帽遇上大野狼。雖然媽媽經常教誨，但小紅帽受到見識廣博既大野狼誘惑，都忍唔住想周圍玩吓，野狼就乘機去咗小紅帽婆婆屋企；麵包師傅首先遇上Jack，偷偷地跟住麵包師傅既太太用五粒魔術豆呃鰦鰦咗Milky-White，令正直既麵包師傅好嬲，兩人不歡而散（“If you know what you want then you go and you find it and you get it.... What matters is that everyone tells tiny lies. What’s important, really, is the size. Only three more tries and we’ll have our prize.”）。女巫到高塔會Rapunzel時被王子偷睇到；麵包師傅救咗小紅帽同婆婆；小紅帽經一事長一智，而變得嗜血狡詐，亦因為有咗狼皮做斗篷，而將佢件紅斗篷俾咗麵包師傅；Jack媽媽將Jack換到既魔術豆嚟手掉咗去，估唔到豆立刻成長成樹，高至及天；Jack發現往雲上既樹，爬上去遇到巨人。得到巨人盛情款待既Jack，竟然去偷巨人既家財，希望可以買番Milky-White。麵包師傅太太帶Milky-White返家途中遇上啱啱由舞會逃跑出嚟既灰姑娘，而發現咗佢既黃金鞋，喺搶鞋時Milky-White偷走，結果麵包師傅太太兩樣都到唔到手。大王子二王子兄弟講述遇上佢哋要娶既女人：灰姑娘同Rapunzel；因而麵包師傅太太發現咗另一樣材料：Rapunzel既頭髮。

女巫發現Rapunzel同王子私通，大怒。雖然佢希望女兒可以永遠留喺自己身邊，得到佢保護，但好心竟遭無情背叛，於是剪走Rapunzel既頭髮，並且將佢放逐，而二王子為咗避開女巫，意外導至雙目失明。（呢一段最講明呢套劇主題：女巫係一個嚴母，為咗保護女兒不受險惡既世界侵害，而將佢困喺高塔上，但做仔女既永遠都唔聽話，由父母所愛，成長為一個父母所失去既人。但父母永遠都會保護子女，所以子女都應該“stay a child while you can be a child.”）

得到神秘人幫助，揾番Milky-White，攞到紅斗篷同黃金頭髮既麵包師傅夫婦，歡天喜地之時，Milky-White竟突然暴斃？？？（哈哈，笑死喇～～！）

因偷竊巨人家財而成為有錢人既Jack，受到小紅帽挑釁而再上巨人家偷嘢，為咗避過巨人，返回地上即斬斷大樹，巨人跌死。雖然王子施計令灰姑娘留低，灰姑娘仍有方法走甩，但佢實在打唔定主意，連佢自己都唔知自己要唔要同大王子一齊，又唔知人哋係點諗，喺留低被抓同逃走間，佢特意留低一隻鞋，等王子自己做決定（好高招呀吓！）。喺逃避王子時，灰姑娘再遇上麵包師傅太太，麵包師傅太太乘機用佢一對平底鞋加剩番既一粒魔術豆換取黃金鞋。王子帶住一隻鞋去揾番灰姑娘；女巫令Milky-White復活，但當材料集齊巫藥仍未成功，原來因為女巫本人唔可以掂過材料，而佢係掂過Rapunzel既頭髮，所以無法成藥；神秘人又再出現，用粟米絲代替頭髮，巫藥煉成。女巫回復年青美貎；呪語解開，麵包師傅太太終於有BB；神秘人身份揭開，原來佢係麵包師傅老豆，但兩父子可以講一句之前神秘人已經斷氣；灰姑娘同大王子結婚，連家人都得到帶契；Rapunzel同二王子重逢。女巫出現阻止（呢個係一個意外：原來女巫係為咗女兒而想回復青春，希望可以相依為命；以為女兒原先背叛係因為自己年老醜陋而覺羞恥），但Rapunzel仍選擇愛情而捨棄親情，王子亦因為Rapunzel既眼淚而重見光明；女巫試圖對付兩人豈料法力盡失。喺一片愉快歌舞聲中，大家從此以後快樂生活，只有女巫一人露出不悅之色。第一幕完，　下回再續。