今日係四日旅程嘅第三日，基本上今日嘅行程可以用「陽光與海灘」嚟形容，故名思義，今日我哋去咗宿霧市外圍嘅島嶼遊覽。正確啲嚟講，嗰度應該係 Lapu Lapu City ( Lapu Lapu，意思係石班咁解，佢就係當年殺咗航海家麥哲倫嘅土著領袖。)，享受璀璨嘅陽光同清澈嘅海水 ( 真係一眼望到海底架 )。
今日由於行程比較長以及地點較遠，所以要比較早起身出發，雖然係咁，但係並冇因為咁而減低自己嘅興緻 ( 雖然我仲係好眼瞓 ) 。我哋首先坐咗四十五分鐘車，到咗 Tambuli Resort Villa，到咗之後再搭多四十五分鐘船去外圍嘅不知名島嶼 ( 導遊話一個叫「椰子島」，另一個叫「望憂島」，但係我始終覺得呢兩個島名係有老作成份。) 。
講起呢個導遊，佢俾我嘅印象係「過期人肉八卦雜誌：中年男裝版」，因為佢經常係咁講埋啲 Out 到暈嘅娛樂圈內幕 ( 有時我覺得而家啲男人真係愈來愈唔似樣，仲八卦過啲女人。) ，例如鄧麗君點死呀、哥哥點死呀之類。小弟雖然從來唔睇八卦周刊同相關電視節目，但係總會偶爾聽到少少呢類消息。兼且尋日俾佢點咗兩鑊，所以對佢冇乜好感 ( 事後至知原來我啲團友都對佢冇乜好感。)
不如講番我哋嘅行程啦，按照原先嘅計劃，我哋會去椰子島對出海面游水，游完之後會去忘憂島食飯，直至下晝兩、三點左右回程，但係由於當時椰子島對出海面有成千上萬隻水母游過 ( 雖然佢哋唔係好大隻 )，有個別團友嘗試落水，但係最後俾啲水母炸到飛起咁番上船，之後唯有先過去忘憂島附近玩，食完飯之後至去椰子島游水。陪我哋一齊出海嘅船伕喺途中潛咗落水，捉咗好多新鮮海膽上船，跟手就即刻開晒啲海膽俾我哋食。而味道方面呢，海水味再加上海膽嘅鮮味，令人回味再回味呢 !!
食完海膽之後，我哋去到忘憂島食 Lunch，呢餐真係豐富到暈，全部都係海鮮，除此之外，更加可以自己俾錢加餸，因為可以同島上面嘅居民買海鮮食 ( 仲幫你整埋 )，一場嚟到，梗係要試吓啦 !! 我買咗一隻瀨尿蝦 ( 超過一呎長 )、兩隻新鮮鮑魚 ( 每隻都有半隻手掌咁大 ) 重有一隻不知名嘅蚌 ( 個殼有成個排球咁大 )。呢餐飯真係食得好痛快，真係飽到上心口呀 !!
食完之後，我哋返去椰子島，雖然當時水面仲有水母，但係巳經少咗好多，所以好多團友都落咗水，游咗一陣之後，我哋都係差唔多要回程。返到去宿霧市之後，到咗 Gaisano Country Mall 買手信，之後食埋晚飯就返咗酒店。
其實喺第一晚，導遊俾咗我哋四百蚊披索泥碼入賭場玩 ( 每張一百披索 )，但係因為每次用泥碼落注，一定要用相同面額嘅籌碼落注，所以當晚就唱咗五百蚊披索籌碼，而嗰晚總算贏咗少少。到咗今晚，因為聽日就要走，所以一定要用晒啲籌碼。未賭之前，我哋有七百蚊披索，賭完之後，我哋有 2,100 披索 ，即係贏咗 1,200 披索。
嚟呢個賭場賭錢，我全程都係賭大細，而注碼方面，細到十蚊披索都可以賭，十蚊披索唱番港幣都係 $1.5 左右，重抵過去機舖打機呀!! 正因為係咁，所以好多人都好鍾意嚟呢度賭錢。
講起賭大細，小弟都算幾有心得令自己立於不敗之地 ( 雖然我平時唔賭 ) ，我嘅心得係：冇把握嘅時候就唔好落注，但係到有把握嘅時候就要落重注；當輸剩本金就離枱走人，到自己贏到咁上下都唔好繼續賭，要見好就收，兼且不時要自我克制。雖然係咁，我自己始終唔鍾意賭，亦都唔鼓勵人去賭。
文章定位：
